Jer 20
20
Tqanil tib'aj Pasur, ajq'oj ti'j Jerusalen
1Tej tb'inte Pasur, tk'wal Imer, pale ex ka'yil nim toklen toj tja Dyos, tb'aj tma'n Jeremiyju' tqanil lu, 2tchaq' tu'n tokb'yo'n Jeremiy ex tu'n tok xmo'n toju' tze atitoq ttzi tjpel ja te B'enjamin ati jawl tk'etz tja Dyos. 3Tojxi'tzun jun q'ijtl tchaq' tu'n tel tzaqpi'n Jeremiy toju' tze, tmatzun Jeremiy te: Matxi' tch'exb'e Qman Dyos tb'iya, Makor-misab'ib' tb'iya ja'lo, myatl Pasur. 4Qu'n lu xtma Qman Dyos: K'okyela wu'ne' te xob'ajil texa ex kye kykyaqilju' tamiwa, twitzku'ya che b'ajelju' tamiwa tu'n kyk'uẍtx'e'nb'ilu' kyajq'oj. Che kb'el nq'o'ne' kykyaqilju' najlqe' toj Juda toj tq'ob' nimaqkawil aj B'ab'ilon, che b'ajxe'l q'i'ntzuntz B'ab'ilon mujqa che b'elb'y'o'n tu'n xuyb'il. 5Ex ikx kxe'l nq'o'ne' tkyaqil tq'inumalju' nintnam lu toj kyq'ob'ju' tajq'oj, tkyaqilju' ati te ex e'ti'xti' twi' wi'yal ex tkyaqilju' kyk'uwen nimaqkawil toj Juda, tu'n kyb'ajx q'i'n tzmax B'ab'ilon. 6Extzunta Pasur, kxel q'i'na tzmax B'ab'ilon kyuk'i'lxi' toj tjaya. Atzu' kkyimela'ya chix ex atzu' kb'elexa' mqu'na exqe' tamiwa intoq b'ajx tma'na tpakb'ab'la mya ax kye, Chi Dyos, chi Jeremiy te.
Tkub'sb'il Jeremiy te Qman Dyos
7Nman Dyos, machin kub' t-sb'u'na,
Ex mawaq' sb'u'wib'e',
kuwxi'xa ex makub'wi'je' tu'na,
jachq'alx nchin okye' te kytzeb'l xjal,
kykyaqilx nchin kyxmayi'ne'.
8Majx o'kx tqanil xitb'il
in nma'ne' ajnyoline',
kukx wok i'li'ne' ex nchin xmayinjtze'
qu'n nxintx'olb'a'ne' tyola.
9Qama kub' nxima'ne': Lay chin ximantle' ti'j Dyos,
lay chin yolintle' toj tb'i, qa nchije',
injaw q'aq'b'ixju' tyola toj wanmiye'
naku'j q'aq' ntz'e'ysan,
majx nex meq'eq'en kyoj nb'aqile'.
Inkub' ntzyu'n wib'e',
mixti'xtzun nb'ent.
10In nb'i'ne' nche b'ajwulub'ti xjal:
¡Ati xob'ajil tkyaqil plaj!
¡Wiqe'xe', qpoqonx!, chechij.
Exqepe' wamiwe'
kyajb'il tu'n nchan yole'.
Qape ksb'etel qu'n,
kb'eltzunti'jtz ex ktchja' qu'n, chechij.
11Atzuntz Nman Dyos, atiya wuk'i'le'
kse'n jun q'ojil layx kub'ti'j,
kb'elte' kyi'ju' ljolte toj nq'ije',
ex layx kub'wi'je' kyu'n,
che takpujel ex che kb'el ch'ixwi,
che kb'el b'o'lj tejumajx toj kych'ixaw.
12Nman Dyos nimtipumala,
in b'ajtka'yi'nta toj tnik'alilti'j,
intka'yi'nta tojku' tanmi xjal,
q'oma tu'n nlonteye' se'n kttz'e'ysaya'ya kywitzju' xjal lu,
matxina' kub' nq'o'n wib'e' toj tq'ob'a.
13¡Che b'itzan qe'ye' te Qman Dyos, kyajwali'nktze',
intklo'nju' nb'isun toj kyq'ob' b'inchal myab'a'n.
14¡Mixyab'ante' q'ij in itz'ja'ye'!
¡Mixwitlo tzaja' k'iwla'nte' q'ij tej witz'jiye' ti'j ntxuye'!
15Mixyab'a'nte' okq'onte ttzalajb'il nmane'
tej txiq'ma'n te qa q'aju' tk'wal itz'ji!
16¡Tz'okxwitu' ichan lu kse'nqe' nimaqtnam
kub'xwit t-xitu'n Dyos tejumajx!
¡Tb'ixwit jun nẍch'in toj k'ixk'oj te prim,
ex q'oj ntenun te wanq'ij,
17mixnati'x nkyime' tu'n Dyos toj tk'u'j ntxuye'!
Axwittzulotzu' nkyaja' muqliwe' toj t-xmilal ntxuye',
exwitlo mixti'x nnitz'jiye'.
18¿Tiqu'ntzun nnitz'ja'ye'
naqx tu'n woke' toj k'ixk'oj ex toj yajb'il,
ex tu'n nkyime' toj ch'ixb'ajil?
Currently Selected:
Jer 20: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
