2 S 6
6
Iktoq tiq'i'n Dab'i tkax Qman Dyos
(1 Cr 13.5-14)
1Eb'aj tb'u'yi'n jumajtl Dab'i xjal te q'oj sk'o'nqe' kyxol aj Israel, oxmutx' o'lajk'al (30,000) kyb'aj. 2Eb'je'tz toju' tnam B'aala toj Juda kyuk'i'lju' b'a'npun tnej xjal te q'oj, kub' t-xima'ntzuntz tu'n tik'tiq'i'nju' tkax Qman Dyos atzu', jaina'yeta' tb'i Qman Dyos nimtipumal, ju' tkub' tq'uqb'il kyib'aju' kyerb'in. 3-4Etzkyiq'i'nju' kax tja Ab'inadab' ju' najlitoq twi' tal witz, xikyiq'i'ntzuntz tib'aj jun karwaj ak'a'j. Nejlqe' Usa ex Ayo, tk'wal Ab'inadab' twitzju' karwaj. 5Atzunte Dab'i kyuk'i'lju' aj Israel intoq che b'itzan ex nche b'ixin tuk'i'l tkyaqil kyipumal twitz Qman Dyos, kyuk'i'l chnab' arpa, tzintzin, chilchil, tzo'tz ex txijtxij. 6Tetzunj kypon toju' najb'il Er te Nakon, e'jaw takpuju' tman wakx, atzunte Usa oktune ti'ju' kax tu'n mikub'a' tz'aq. 7Atzunte Qman Dyos tzaj ttx'u'jil ti'j Usa tu'n tpaju' okttzyu'n kax, qu'mtzun eltiq'i'n tchwinqlal axtzu', kub' tz'aqtzun Usatz tk'etzju' kax kyimnitl.
8Tzaj tb'is Dab'i tu'n tpaj eltiq'i'n Qman Dyos tchwinqlal Usa, qu'mtzun oktq'o'n tb'iju' najb'il lu Peres-usa, ex majx kyej tenju' tb'i ikju'. 9Textzunju' q'ij lu oktchi Qman Dyos ti'j Dab'i, ex tma: ¡Layx txi' wiq'i'ntlwe' tkax Qman Dyos njaye'!, chij. 10Axtzuntzu' tchaq'a' tu'n txi' iq'i'nju' tkax Qman Dyos tja ob'ed-edom te tnam Kat, qu'n mixti'x xiq'i'ntl toj Ninttanam Dab'i. 11Oxe' xjaw kyejten kax te Qman Dyos tja Ob'ed-edom, ex kub' k'i'wla'n Ob'ed-edom exqe'ju' toj tja tu'n Qman Dyos.
Pon tiq'i'n Dab'i tkax Qman Dyos toj Jerusalen
(1 Cr 15.1—16.6)
12Tetzunj txi' q'ma'n teju' nimaqkawil Dab'i qa matxi'toq che kub' k'i'wla'n toj tja Ob'ed-edom kyuk'i'lxi'ju' ati te tu'n Qman Dyos naq tu'nju' kax, xi' Dab'i q'ilte kax tuk'i'l tzalajb'il tja Ob'ed-edom tu'n tpon tiq'i'n toju' Ninttanam Dab'i. 13Axtaqtzun kyik'b'etju' iq'ilte kax te Qman Dyos, kub' tb'yo'n Dab'i jun tman wakx te chojb'il ex jun tman rit q'u'sqe'.
14Inxi'xtoq b'ixin Dab'i tu'n tkyaqil tipumal oksa'ntoq jun t-ẍa'y sed, 15ex ikxqe'ju' aj Israel intoq che ẍch'in tu'n kytzalajb'il toj tq'ojq'ojel chun, iq'i'nju' kax te Qman Dyos kyu'n.
16Tetzunj tponju' kax te Qman Dyos toju' Ninttanam Dab'i, etz ka'yin Mikal, tmyal Sawul, ttzi tokix spik'un; tetzunj txi' tka'yi'n intoq xlik'pu'n ex in b'ixin nimaqkawil Dab'i twitz Qman Dyos, tzaj tx'a'l titk'u'j ti'j.
17Xiq'i'nju' kax te Qman Dyos toju' tkub'el, toj jun pach xb'alun kub' tb'incha'n Dab'i texju' kax. Axtzun kmuju' kub' tq'o'n Dab'i chojb'il k'ok'sb'il ex chojb'il te mujb'ab'ltib'il twitz Qman Dyos, 18tb'ajlenxi'tzun ja'lu e'kub' tky'i'wla'nju' tnam toj tb'i Qman Dyos nimtipumal, 19ex b'aj t-sipa'n wab'j kye kykyaqil aj Israel, ichan ex qya, ex junjun kylo' tzqij ub'a. Kyb'ajlenxi'tzun wan eb'aj anj kyja.
20Ex ikxte Dab'i anj tja tu'n txi' tqani'n k'i'wb'il kyib'aju' toj tja; atzunte Mikal, tmyal Sawul, etz k'lulte ex xitma'n te:
—¡Chiloya qa b'a'n xtb'inchaya kywitzju' qya k'ayi'n majen kye tmajena, wichaqa mixti'x tnab'la! chij te.
21Atzunte Dab'i xittzaq'we'n:
—Twitz Qman Dyos ẍin b'ixina'we', aju' jaw sk'onweye' te t-xel tmana ex kyxol kykyaqilju' toj tjaya, tu'n wokye' nejenel te tnam Israel. Qu'mtzun inchin b'ixine' twitz. 22Kpena' chin nimalxi'xtlwe' kyetwitzu' ja'lo; kb'el nb'o'si'nxi'xtl wib'e' twitz, kyetwitzju' nt-xima'na, aye'tzuntlju' qya nche tma'na, kche nimal weye'.
23Ex mixti' alan Mikal toj tkyaqil tchwinqlal.
Currently Selected:
2 S 6: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
