2 S 5
5
Ok Dab'i te nimaqkawil toj Israel ex Juda
(1 Cr 11.1-3)
1Yajxi'tzuntel, kykyaqil tyajajil Israel exi' yolil tuk'i'l Dab'i toj Eb'ron, ex xikyma'n te: Qchk'el qib' tuk'i'la, 2axxi'x, maskye atoq Sawul qnimaqkawile', ateju'ya nejeneltoq kye aj Israel ajkyex q'ojil. Expena', teta oje tzaj ttziyana' Qman Dyos tu'n tiq'inte twitzju'ya tnam Israel ex tu'n tkawina toj, chechij te.
3Iktzu'n eb'aj yolina'ju' tijwnaq tuk'i'l Dab'i toj Eb'ron, ex kyej b'entti'j jun kyol tuk'i'l twitz Qman Dyos. Okkyq'o'ntzun Dab'itz te nimaqkawil toj Israel. 4Tetoq junaq lajoj (30) ab'q'i Dab'i tej ttzyet tkawin, ex kab'naq (40) ab'q'i kawin: 5kawin wuq ab'q'i tk'i' nik'jan toj Eb'ron tib'aj Juda, atzun junaq oxlajoj (33) ab'q'i kawin toj Jerusalen tib'aj tkyaqil Israel ex Juda.
Tzyetju' ipumalj toj Syon tu'n Dab'i
(1 Cr 11.4-9)
6Xi'tzun Dab'i nimaqkawil kyuk'i'lu' t-xjal te q'oj toj Jerusalen q'ojil kyi'j jeb'usey, najlqe'toq toju' tnej tx'otx' lu. Toj kynab'l jeb'usey qa laytoq b'ent tokx Dab'i toju' nintnam kuwsa'n, xikyma'n te: Lay b'ent toktzta tza'lu, naqpe' kyu'n moẍ ex tzkajqe' lay b'ent toktza'ya, chechij. 7Atzunte Dab'i kub'ti'ju' kolb'il kuwsa'n toj Syon tu'n, ju' tok tb'i Ninttanam Dab'i. 8Matxitoqtzun txitma'n Dab'i toju' q'ij lu: Alkyete matxi' q'ojil kyi'j jeb'usey, kutokx toju' tb'e a' tjaq' tx'otx' ex b'yonqeku' moẍ ex tzkaj, qu'n aye' ju'lu majx inche elwik'o'ne' b'a'nxi'x, chij. Atzuntzu' tzaja'ju' in q'manjtz: Lay b'ent kyokxju' moẍ ex tzkajqe' toj tja Qman Dyos, ch. 9Kub'tentzun Dab'itz toju' kolb'il kuwsa'n, oktq'o'n tb'i Ninttanam Dab'i, ex jawtb'incha'n nimaqtapi ti'jile, tzajx tk'etzu' plansa'n ex ponx tk'etzju' ja te kawb'il.
E'tzaj tchq'o'n Iram t-xel tk'etz Dab'i
(1 Cr 14.1-2)
10Ljo'nxi'xtoq tch'iyju' tkawb'il Dab'i, ex atitoq Qman Dyos nimtipumal tuk'i'l. 11Qu'mtzun e'tzaj tchq'o'n Iram, nimaqkawil toj Tiro, t-xel tk'etz Dab'i, e'aq'unal ti'j tze, eb'inchal ab'j, b'aj tzaj kyiq'i'n tze k'ute ex jaw kyb'incha'n tja Dab'i te kawb'il. 12Kanetzuntz toj twitz Dab'i qa matxi'toq japun tyol Qman Dyos tuk'i'l tu'n tok te nimaqkawil toj Israel, ex matxi'toq ch'iyju' tkawb'il naq tu'nju' tk'u'jlalil ti'j Israel ttanam.
Txqantl tk'wal Dab'i
(1 Cr 3.5-9; 14.3-7)
13Tetzlenxi'tzun Dab'i toj Eb'ron pon toj Jerusalen, ex e'tzaj tiq'i'n txqantl t-xu'jil ex tqya atzu', e'itz'ji txqantl tk'wal kyuk'i'l. 14Aye' tk'wal ja'lu e itz'ji toj Jerusalen: Samuwa, Sob'ab', Natan, Salomon, 15Ib'ar, Elisuwa, Nepej, Japiya, 16Elisama, Elyada ex Elipelet.
Kub'kyi'j pilistey tu'n Dab'i
(1 Cr 14.8-17)
17Tetzunj kyb'inte pilistey qa matxi'toq xjansanjtz Dab'i te nimaqkawil toj Israel, eb'je'tz tilj jyolte kykyaqil; tb'itzun Dab'i ex xi' toju' kolb'il kuwsa'n. 18Eb'ju'ltzun lq'eju' pilistey ex eb'ajkub' ten toju' b'ya' Repaym. 19Tu'ntzunju', xitqani'n Dab'i te Qman Dyos:
—¿Ma b'a'n tu'n nq'ojine' kyi'ju' pilistey? ¿Ma kchin toni'ya tu'n tkub'kyi'j?, chij.
Atzunte Qman Dyos tzaj ttzaq'we'n:
—B'a'nte' tu'n txi'ya q'ojil kyi'j, qu'n che kxe'l nq'o'nwe' toj tq'ob'a, chij.
20Pontzun Dab'itz toj B'aal-perasim, ex ekub'ju' tajq'oj tu'n atzu'. Qu'mtzun tmaya': Matjaq Qman Dyos nb'eye' kse'n jun tnimal a' kyxolu' wajq'oje, chij. Ex oktq'o'n tb'iju' tx'otx' lu B'aal-perasim. 21Expe' e'kyaj kyxon aj Pilistyaju' kydyos, atzunte Dab'i kyuk'i'lju' t-xjal eb'ajxkyiq'i'n.
22Aye'tzunkye' pilistey eb'aj pon jumajtl toju' b'ya' Repaym, 23xi'tzun tqani'n Dab'i te Qman Dyos, atzunte Qman Dyos tzaj tma'n te:
—Lalun txi'ya q'ojil kywitzxi', kytxolink kyib'e' kyi'jile ex xi' txa'ya b'yolkye kytze'lkyi'j ajtpona kyxe tqan b'alsamo. 24Aj txi' tb'i'na ajtq'ajti qanb'aj twi' tze, wixtzun txi'tzu'ya b'yolkye, qu'n a techlalju' qa nejlqine' twitza, tu'n kyb'aju' xjal pilistey te q'oj, chij te.
25Tb'incha Dab'i kse'nxju' tchaq' Qman Dyos te, e'kyimu' pilistey tu'n, tzajx Kab'aon ex pon kanun Kyeser.
Currently Selected:
2 S 5: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
