1 S 24
24
1Tetzunj tanjtzkyi'j Sawul q'ojil kyi'j pilistey, xiq'ma'n te qa atoqtzu' ta' Dab'i toju' chq'ajlaj En-kadi. 2Jawtzun t-sk'o'n Sawul wuqk'al lajnaq (3,000) ichan kyxol kykyaqil aj Israel, exi'tzuntz jyolkye Dab'i kyuk'i'lju' t-xjal twitz xaq wa'lxi'x kywitz. 3Intoqtzun che b'et, tej kypon kyk'etz junjun ch'laj rit, atitoq jun jyom nqayin kyk'etz, jatoq nche ewana' Dab'i kyuk'i'lju' t-xjal. Okxtzu'n Sawul k'u'jal toju' jyom lu, 4xi'tzun kyma'n t-xjal Dab'i te:
—Ma japun tyol Qman Dyos toju' q'ij ja'lo, ju' tzaj ttziya'n teya qa kb'eltq'o'n tajq'oja toj tq'ob'a. B'inchamtzuna ja'lo aju' tajb'ila, chechij. Jawtzun we' Dab'i ex chab'a' eltjon jun piẍ tpinpa't Sawul; 5telenxi'tzun tjon tzaj tb'is, 6xitma'ntzuntz kyeju' t-xjal:
—¡Awt Qman Dyos tzyunweye' tu'n lalun tzaq'pon nq'ob'e' ti'ju' wajawe' nimaqkawil! ¡Ate nimaqkawil, qu'n a Qman Dyos jaw sk'onte!, chij.
7Iktzu'n e'tmaqa' Dab'i t-xjal tu'n miche oka' tzaqpaj ti'j Sawul, atzunte Sawul etz toju' jyom ex xitljo'n tb'e. 8Textzunju' kmuj lu etz lpe Dab'i ti'j, ex xiẍch'in te:
—¡Nimaqkawil, nimaqkawil!, chij.
Anjtztzun ka'yin Sawul ti'jxi', atzunte Dab'i kub' meje majx kub'joqe twitz tx'otx', 9ex xitma'n te:
—¿Tiqu'n nxa' tb'ina kyol xjal?, mixna' ti'we' nxim taq'wix ti'ja. 10Tz'elku' tnik'a ti'j nimaqkawil, makub' q'o'na toj nq'ob'e' tu'n Qman Dyos toju' jyom, mixti' xkub' nb'yo'na, makyej nq'o'na tu'n tanq'ina, qu'n qa nimaqkawilta, a Qman Dyos jaw sk'onteya.
11Ka'yintzpe'ya nimaqkawil ti'ti' iq'i'n wu'ne': jun piẍju' tpinpa'ta, ex tu'nte' lu ma'wtlo kub' nb'yo'na. Tu'ntzun teltnik'a qa myawe' nxim tu'n nb'inchante taq'wix ti'ja mo tu'n njaw miltz'uje' ti'ja, ex b'ajx chin nel txalpuja'we' twitza. Atzunta nimaqkawil toka ljoltonq'ije' tu'n nkub' tb'yo'na'. 12¡Alo Qman Dyos ka'yilte alkye atitpaj qxol, ex kjel nq'o'ne' toj tq'ob'. Ayintzunwe' milo najchi'j tu'n taq'pon nq'ob'e' ti'ja nimaqkawil. 13Ati jun yol nq'umli: Kyu'nju' b'inchal myab'a'n ntzaja'ju' il; qu'mtzun milo najchi'j tu'n taq'ponwe' nq'ob' ti'ja nimaqkawil. 14Expe', ¿alqi'j matxi' tz'etza'ya nimaqkawil aj Israel q'ojil? ¿Alkye ljo'n toj tq'ij tu'na? ¡Ayine', naku'j jun kyimni tx'yanqine', mo naku'j ky'aq qine'! 15Qu'mtzun awt Qman Dyos b'inchante tten qxol qkab'il; ¡awt mlonweye' qa ati wile' ex klonweye' toj tq'ob'a nimaqkawil!, chij te.
16Tetzunj tb'aj yolin Dab'i, jawẍch'in Sawul:
¡Ape'loya Dab'i, nky'ajul, nyolitza!, chij.
O'kx tjaw oq', 17xitma'n te:
—Mixti'ta til, b'a'nju'ta matxi' tb'incha weye' te t-xelju' myab'a'n matxi' nb'inchaye' teya. 18Matyek'uya ja'lo qa tajb'ila tu'n tb'inchanteya b'a'n weye', qu'n mana' chin kub'q'o'ne' toj tq'ob'a tu'n Qman Dyos ex min ẍinkub' tb'yo'na. 19Ja' axxi'x, mixna' a'lo'te jun ajwit tel yalju' tajq'oj tu'n, laywit kub' tb'yo'n. Qu'mtzun awt Qman Dyos q'onte tu'me'l t-xel teya tu'nju' b'a'n xtb'inchaya weye' ja'lo! 20Matxi' tz'el nnik'e' ja'lo qa aya k'okyel te nimaqkawil, exqa k'elelb'a'n kawb'il toj Israel toj tq'ob'a. 21Q'mantztzun jun tyola twitz Qman Dyos qa lay che kub' tnajsa'na nyajajile' exqa lay kub' tnajsa'na nb'iye' kyxolju' toj njaye', chij. 22Xi'tzun ttziya'n Dab'i te Sawul qa ktb'incha' ikju', anjtzun ti'j Sawultz toju' tja te kawb'il, atzunte Dab'i kyuk'i'lju' t-xjal exi' toju' kolb'il kuwsa'n.
Currently Selected:
1 S 24: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
