1 S 23
23
Tkol Dab'i nintnam Kyeyla
1Jun q'ij e'q'ojin pilistey ti'ju' nintnam Kyeyla ex b'ajx kyelq'a'nju' triy akxtoq tb'aje'l toj er. Tetzunj txi' q'ma'nju' lu te Dab'i, 2xi' qanilte te Qman Dyos, ikjalu:
—¿Ma b'a'n toj twitza tu'n nxi'ye' q'ojil kyi'ju' pilistey?, chij.
Atzunte Qman Dyos tzaj ttzaq'we'n:
B'a'nte', q'ojina kyi'j ex klomju'ya nintnam Kyeyla, chij.
3Aye'tzu'n t-xjal Dab'i xi'kyma'n te:
—¡Xob'ajilxpena' ato'qo' tza'lu toj Juda, mitzunloyate' qo'x q'ojil kyi'ju' pilistey toj Kyeyla!, chechij.
4Xi'tzun tqani'n jumajtl Dab'i te Qman Dyos, atzunte Qman Dyos tzaj ttzaq'we'n:
—Kutxi'ya toj Kyeyla, qu'n che kb'el nq'o'nwe' pilistey toj tq'ob'a, chij.
5Exi'tzun Dab'itz kyuk'i'lju' t-xjal toj Kyeyla, eq'ojintzuntz kyi'ju' pilistey atzu', majx e'mankun kyu'n ex eb'je'l kyiq'i'n jumajtlu' wakx kye. Iktzu'n ekleta'ju' xjal aj Kyeyla tu'n Dab'i.
6Atzunte Ab'yatar, ju' tk'wal Aymelek, kub' oq tu'n tmujb'antetib' tuk'i'l Dab'i toj Kyeyla, ex majx xitiq'i'nju' Ẍa'y. 7Matxi'toqtzun txiq'man te Sawul qa atoqtzu' ta' Dab'i toj Kyeyla, ex kub' t-xima'n: Matxi' kub' q'o'n toj nq'ob'e' tu'n Dyos, tu'nju' matxi' tz'okx toj nintnam, matxi' kyej tjpu'ntib' kyoju' tjpel tnam, chij.
8Tchaq'tzun Sawultz tu'n kyb'ajtzaj kykyaqilju' t-xjal te q'oj tu'n kyb'ajx Kyeyla tu'n tok kytxoli'n kyib' kyi'j Dab'i kyuk'i'lu' t-jal. 9Tetzunj tb'inte Dab'i qa intoq ximan Sawul tu'n tq'ojin ti'j, xitma'n teju' pale Ab'yatar tu'n ttzaj tiq'i'nju' ẍa'y tu'n txi' tqani'n te Qman Dyos. 10Ex xitma'n Dab'i:
Nman Dyos, ayine' tmajena manb'iye' qa tzul Sawul xitulte tnam Kyeyla naq tu'npaje'. 11¿Ma tzultzu'n Sawul jyolweye' kse'nxju' matxi' nb'iye'? ¿Ma oklo chin xel q'o'ne' toj tq'ob' kyu'n xjal najlqe' toju' tnam Kyeyla? ¡Taye, Kydyos aj Israel, inkub'sa'ne' teya tu'n ttzaj tma'na! chij.
Atzunte Qman Dyos tzaj ttzaq'we'n:
—Tzulte' Sawul, chij.
12Xi'tzun tqani'ntl Dab'i:
—¿Ma ktzulo chin xel q'o'ne' kyuk'i'lju' nxjale' toj tq'ob' Sawul kyu'n xjal najlqe' toj Kyeyla?, chij.
Atzunte Qman Dyos tzaj ttzaq'we'n:
—Che xe'lq'o'ne' toj tq'ob', chij.
13E'etztzun Dab'itz kyuk'i'lju' t-xjal toj Kyeyla, qapelo junk'al lajnaq (600) kyb'aj, e'xi'tzuntz ex mixti'xte b'i'n jatu'n kypona'. Tetzunj tb'inte Sawul qa matxitoq tz'ex oq Dab'i toj Kyeyla, min ok iltl tu'n txi' jyolte.
Najan Dab'i toj chq'ajlaj
14Iktzu'n kyajtena' Dab'i najal toj pik te kolb'il twi' jun witz toju' chq'ajlaj Sip, b'a'ntzunqa ntoq neltjoyli tkyaqil q'ij tu'n Sawul, min taj Qman Dyos tu'n tkub' tz'aq toj tq'ob'. 15Tuk'i'lxi'petzunju', intoq xob' Dab'i te Sawul, qu'n matxi'toq tz'etz Sawul jyolte tu'n tkub' tb'yo'n. Qu'mtzun kyejten Ores, toju' chq'ajlaj Sip.
16Jun q'ij xi' Jonatan tk'wal Sawul toj Ores, kuwsalte tk'u'j Dab'i ex tu'n tqe tk'u'j ti'j Dyos. 17Ex xitma'n te:
—Lalun xob'a, qu'n lay knetta tu'n Sawul ju' nmane'. Ana'ta k'okyel te nimaqkawil toj Israel, ayintzunwe' chin okyel te tkab' kawil. B'i'ntlpenate' lu tu'n nmane', chij te.
18Kyajtzun b'entti'j jun yoltz kyxol kykab'il, ex a Qman Dyos kub' kyq'o'n tztiyalte. Anjtzun Jonatan tja, atzunte Dab'i kyejten toj Ores. 19Aye'tzu'n xjal aj Sip exi' toj Wib'ea yolil tuk'i'l Sawul, ex xikyma'n te:
—Lute' Dab'i nnewin toj qtx'otx'e' kyoj junjun kolb'il kuwsa'n twi' witz Akyila, toj Ores toj tnayajkya'j te chq'ajlaj. 20Qu'mtzun qama kub' t-xima'na nimaqkawil tu'n ttzaja jyolte, b'a'n tu'n tb'inchanteya, kxe'l qq'o'nqe' toj tq'ob'a, chechij.
21Xi'tzun ttzaq'we'n Sawul kye:
—¡Awt Qman Dyos ky'iwlankyeye' tu'n matzaj laqj kyk'u'je' wi'je'! 22kxe'l nkub'sa'ne' kyeye' ja'lo tu'n kyxi'ye' ka'yilte jatu'me'lxi'x ta', ex alkye oje ka'yinte atzu', qu'n oje tzaj q'ma'n weye' qa majx tx'yan tuk'i'l. 23Kyka'yinxe' b'a'nxi'x jachaqja ta'ju' tewb'il, kukytzajtzuntze' q'malte weye' ja tu'me'l ta'xi'x, chin xe'ltzuntze' kyk'etze'. Qatzun axxi'x atzu' ta' toju' kytx'otx'e', knjya'ye' chab'a' kyxolju' tyajajil Juda, chi Sawul.
24Kyej q'olb'e'ntzun Sawultz kyu'n xjal aj Sip ex anjkyi'j toju' ninkytanam. Aye'tzunkye Dab'i kyuk'i'lju' t-xjal atoqtzu' ta'qe' Maon, toju' plan tx'otx' toj tnayajkya'j teju' chq'ajlaj, 25exi'tzun Sawul kyuk'i'lju' t-xjal jyolte Dab'i. Atzunte Dab'i tej txiq'ma'n te, ku'x ewil twitzju' xaq ati toj chq'ajlaj Maon. Ex tej tb'inte Sawul, xi' toju' chq'ajlaj Maon knolte Dab'i. 26Ljo'ntoq kyxi' Sawul kyuk'i'lju' t-xjal toj jun plaj teju' witz, atzu'n toj jun plajtl ljo'ntoq kyoq Dab'i kyuk'i'lju' t-xjal. Tetzunj matxi'toq b'aj ktxolb'a'n kyib' Sawul kyuk'i'lu' t-xjal kyi'jile Dab'i, ex ch'inxtltoq kytzyet kyu'n, 27o'kx tpon jun sanjelal q'malte te Sawul:
—¡Kutanjtz ti'ja ja'loxi'x nimaqkawil, qu'n matxi' che b'ajponju' pilistey toju' qtanam!, chij te.
28Mixtzunti' ok iltl Sawul knolteti'j Dab'i, xi'tzuntz q'ojil kyi'ju' pilistey. Qu'mtzun okq'o'n tb'iju' najb'il lu pik te aq'pub'l.
Exch'yon tchwinqlal Sawul te Dab'i
29Exi'tzun Dab'itz najal kyoju' kolb'il kuwsa'nqe' toj En-kadi.
Currently Selected:
1 S 23: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
