1 R 22
22
Tma Mikayiy tqanil qa kb'elti'j Akab'
(2 Cr 18.1-34)
1B'aj oxe' ab'q'i mixti' q'oj kyxol aj Sirya kyuk'i'l aj Israel. 2Atzu'n toj toxi'n ab'q'i, xi' Josapat, nimaqkawil toj Juda, xb'etzalteju' nimaqkawil toj Israel. 3Atzunte' nimaqkawil toj Israel xitma'n kyeju' nche kawin tuk'i'l:
—B'i'n kye'kyu'n qa qeju' Ramot te Kalaad, ¿tiqu'ntzun min xqb'incha tu'n tel tjaq' tkawb'ilu' nimaqkawil toj Sirya? chij.
4Xitxjelu'ntzuntz te Josapat:
¿Ma jaku' txi'ya wuk'i'le' q'ojil ti'j Ramot toj Kalaad? chij.
Atzunte Josapat xittzaq'we'n te:
—Tuk'i'la exqe'ju' t-xjala te q'oj ta'qinwe' kyuk'i'lju' nxjale' te q'oj exqe' chejil. 5Naq aju' qaninxa nejtl qa b'a'n toj twitz Qman Dyos, chij.
6Eb'ajtzun tb'u'yi'n nimaqkawil t-sanjelal Dyos toj Israel, qapelo junk'al (400) kyb'aj, ex xit-xjelu'n kye:
—¿Ma b'a'n tu'n nq'ojine' ti'j Ramot toj Kalaad mujqa lay? chij.
—Q'ojina ti'j, qu'n kb'el tq'o'nte Qman Dyos toj tq'ob'a, chechij xikytzaq'we'n te.
7Atzunte Josapat xitqani'n:
¿Mixtzunti' juntl t-sanjelal Qman Dyos tzalu tu'n txi' qqani'n te? chij.
8Atzunte nimaqkawil toj Israel xittzaq'we'n te Josapat:
—Atix juntlte', jaku' b'a'n tu'n txi' qqani'n te titi' ntma'n Qman Dyos. Aju' Mikayiy, tk'wal Imla. Naq aju' majx inel wik'u'nwe', qu'n mixti'x ntma'n jun b'a'n tqanil, naq o'qe'kxju' ti'xti' myab'a'n intma'n, chij.
Atzunte Josapat xitma'n te:
—Lalun tmaya ikju'na'j, chij.
9Tzajtzun ttxko'n nimaqkawil toj Israel jun nejenel kyeju' t-xjal te q'oj ex xitma'n te:
—¡Ati tu'n tulju' Mikayiy, tk'wal Imla, ja'loxi'x! chij.
10Oksa'nktoq kyq'ojb'ilu' nimaqkawil aj Israel ex Josapat, nimaqkawil aj Juda, q'uqliqe'toq toju' kyq'uqb'il ttziju' tnam Samarya, ex kykyaqilju' t-sanjelal Dyos intoq kyma'n tpakb'alil kywitzu' nimaqkawil. 11Atzunte' Sedekyiyas tk'wal Kyenaana ojetoq che kub' tb'incha'n junjun tuk'a rit k'uxb'ilqe' ex intoq ẍch'in: ¡A matxi' tma Qman Dyos ja'lu: Kyu'nju' tuk'a rit lu k'okyela' tzaqpaja'ya kyi'ju' aj Sirya tzmax ajkymankun tu'na! chij.
12Kykyaqilxju' t-sanjelal Dyos ikxtoq inkyma'nju' te nimaqkawil: Q'ojina ti'j Ramot toj Kalaad, kb'elte'ti'j tu'na, qu'n kb'el tq'o'nte Qman Dyosu' nintnam toj tq'ob'a, chechij.
13Atzu'n sanjelal xi' txkolte Mikayiy, xitma'n te:
—Kykyaqilu' txqantl t-sanjelal Dyos matxi' tzaj kyq'o'n jun b'a'n tzaq'web'l teju' nimaqkawil. Qu'mtzun, kxe'l nkub'sa'ne' teya tu'n tyolina kse'nkye ex tu'n tmanteya jun b'a'n tqanil, chij.
14Atzunte Mikayiy xittzaq'we'n te:
¡Lu Qman Dyos in ka'yin, o'kxwe' knma' aju' ktzajel tma'n Dyos weye'! chij.
15Pontzun Mikayiy twitzju' nimaqkawil, ex xitqani'n nimaqkawil te:
Mikayiy ¿Ma b'a'n tu'n qq'ojine' ti'j Ramot toj Kalaad mujqa lay? chij.
Atzunte Mikayiy xitma'n:
Q'ojina ti'j, kb'elte'ti'j tu'na, qu'n kb'el tq'o'nte Qman Dyos toj tq'ob'a, chij. 16Atzunte nimaqkawil xittzaq'we'n te:
—¿Jte'maj kxe'l nma'ne' teya tu'n tmanteya o'kxju' ax toj tb'i Qman Dyos? chij. 17Xi'tzun tma'n Mikayiytz te:
Matxi' che wile' kykyaqilju' aj Israel
sla'mu'nqe' tojk'ul,
naku'j kse'nqe' rit mixti' k'iklel kyi'j.
Atzunte Qman Dyos saj tma'n:
Mixti' kye'lu kyajaw
teyile junjun tu'n tanjkyi'j kyja toj b'anil, chi Dyos, chij.
18Xi'tzun tma'n nimaqkawil aj Israel te Josapat:
—Mana' txinma'ne' teya, mixti'x ntzaj tma'nte' ichan lu jun b'a'n tqanil weye', naq o'kxu' tqanil taq'wix ntma'n, chij.
19Ex tmatl Mikayiy:
—Tu'ju' xtmaya lu, b'intza tyol Qman Dyos: Wile' Qman Dyos q'uqli toj tq'uqb'il, ex kykyaqilju' ajb'el te toj kya'j wa'lqe' tk'etz, toj tb'a'nq'ob' ex toj tnayaj. 20Xi'tzun tqani'n Qman Dyos alkye jaku' txi' q'malte te Akab' tu'n txi' q'ojil ti'j Ramot toj Kalaad ex tu'n tb'aj atzu'. Junjun intma'n jun ti'xti' ex junjuntl juntl ti'xti'. 21Juntzun xewb'aj pon twitz Qman Dyos ex tma qa ktb'incha'. Xi'tzun tqani'n Qman Dyos te se'ntaq'wi tu'n tb'inchante. 22Ex xitma'n xewb'aj qa oktoq t-xewsa' chajyolil kyoj kykyaqilju' t-sanjelal ate'qe' tuk'i'la nimaqkawil. Xi'tzun tma'n Qman Dyos te tu'n tb'inchante, qu'n oktoq sb'etela tu'n. 23Matxitzun tb'iya ja'lo, matxi' kub' tq'o'n Qman Dyos jun xewb'aj chalyol toj kytzi kykyaqilju' t-sanjela ex matxi' b'antti'j tu'n tkyima, chi Mikayiy.
24Xi'tzun lq'e Sedekyiyas tk'wal Kyenaana tk'etz, oktjumi'n ttzi Mikayiy, ex xitma'n te:
—¿Ma ma'tzun tz'el tpa'ntib'ju' t-xew Qman Dyos wi'je' tu'n tyolin teya? chij.
25Xi'tzun ttzaq'we'n Mikayiy te:
K'elel tnik'a ti'j aj txi'ya ewal jayi'nchaq, chij.
26Tchaq'tzu'n nimaqkawil aj Israel:
—¡Kytzyume' Mikayiy ex kyiq'inxe' twitz Amon, kawil te nintnam, ex twitz nk'wale' Joas, tu'n tokx jpet! 27Q'manxa kye qa manchaq'e' tu'n tokx kyjpu'n ex naqch'i'n twa ex tk'wa' kyq'onxe', tzmaxi'j ajtanjtz wi'je' b'a'nqine' ex itz'qine', chij.
28Xi'xi'xtzun tma'ntl Mikayiy te:
Qama tz'anjtzti'ja b'a'na ex itz'a,
mitzunya Qman Dyostz xyolin toj ntziye', chij.
29Iktzu'n, exaya' nimaqkawil aj Israel, tuk'i'l Josapat, nimaqkawil aj Juda, q'ojil ti'j Ramot toj Kalaad. 30Xitzun tma'n nimaqkawil aj Israel te' Josapat:
—Chin okyexe' ch'ixpu'n wi'je' toju' q'oj, atzunta q'onka nxb'alune', chij.
Eltzun tch'ixpu'n nimaqkawil aj Israel ti'j ex okx toj q'oj. 31Atzunte' nimaqkawil aj Sirya ojetoq txitma'n kyeju' junaq kab'lajoj (32) nejenel kyi'ju' tkarwaj te q'oj tu'n lalun che q'ojin ti'j jun xjal qa myaju' nimaqkawil aj Israel. 32Tetzunj kyka'yinte nejenelju' Josapat, toj kynab'l qa aju' nimaqkawil aj Israel ex ok kyb'u'yi'nkyib' tu'n kyq'ojin ti'j. Atzunte Josapat jawẍch'in ex qanin onb'il, 33tetzunj telkynik' qa myate nimaqkawil aj Israel, kyej kytzaqpi'n. 34Atzun jun xjal te q'oj, naq xit-xonxi' t-smaj, aku'xi'xju' nimaqkawil aj Israel k'ixb'i tu'n ex oje tak' b'a'nxi'x kyxolju' aq'unb'il te q'ojb'il. Xitma'ntzuntz teju' iq'ilte' tkarwaj:
—Kutanj ti'ja ex chin tiq'imixa toju' q'oj, qu'n matxi' chin k'ixb'iye' b'a'nxi'x, chij.
35Kuwxi'xju' q'oj ok teju' q'ij lu, atzunju' nimaqkawil kub' wab'a'n toju' tkarwaj kywitzju' aj Sirya. O'kx tkyim te qale, qu'n majxkub' qojli tchk'el tu'n tk'ixb'len toju' karwaj. 36Tej kxi'toq tex q'ij, pon tqanil kyxolju' xjal te q'oj: ¡Teyile junjun kuxtxi' toj ttanam ex toj ttx'otx', 37qu'n matxi' kyimte' nimaqkawil!, chij.
Xi'tzun q'i'n nimaqkawiltz toj Samarya, atzuntzu' ku'xa' mqu'n. 38B'ajtzun txjo'nju' karwaj toju' a' tkub' maqb'ilte toj Samarya, janche b'aja' ichinju' qya ajpajil, ex b'jaw kyleq'u'n tx'yan tchk'el Akab', kse'nxu' ojetoq tma Qman Dyos.
39Atzu'n jni'tl tqanil ti'j Akab' ex tkyaqilju' tb'incha, ti'ju' ja te kawb'il b'aqile exqe'ju' nintnam b'aj tb'incha'n, tz'ib'a'nqe' toju' tu'jil tqanil kyb'inchb'aju' nimaqkawil toj Israel. 40Kyim Akab', ex atl Okosiy ju' tk'wal kawin te t-xel.
Kawb'il Josapat toj Juda
(2 Cr 20.31-37)
41Tzyet tkawin Josapat tk'wal Asa toj Juda, toj tkyaji'n ab'q'i intoq kawin Akab' toj Israel. 42Tetoqtzun junaq o'lajoj (35) tab'q'i, ex junaqjo' (25) ab'q'i kawin toj Jerusalen. Asub'a tb'iju' ttxu, ex tmyal Sili.
43B'a'n b'eta' Josapat toj tkyaqil, kse'nte Asa ju' tman. Toj ttzinunal qe'ju' tb'inchb'aj twitz Qman Dyos. Naq o'kx mixti' b'je'l tiq'i'nju' najb'il xjan te witzileb'i'n, qu'n inxtoq che kub' kyq'o'n tnam chojb'il ex nche kub'kytz'e'ysa'n sturak kywitzju' witzleb'.
44Toj nak'b'il tena' Josapat tuk'i'lju' nimaqkawil toj Israel. 45Atzu'n jni'tl tqanil ti'j Josapat exu' tb'inchb'aj, ex tej tq'ojin, tz'ib'a'nqe' toju' tu'jil tqanil kyb'inchb'aju' nimaqkawil toj Juda. 46Ex ikx eb'je'x t-xla'ja'nju' inxtoq kyb'incha'n k'u'lb'il toj ajpaji'n toju' tx'otx', ju' eb'aj kyejten atxi'x toj tq'ijlalil Asa, ju' tman. 47(Mixtoqtzunti' nimaqkawil toj Edom, naq o'kx jun kawil ati.)
48Ojetoq che kub' tb'incha'n Josapat b'ark te Tarsis, tu'n txi' iq'b'aj q'anpwaq toj Opir; Mixtzunti' b'ent kyxi' qu'n eb'aj xitj toj a' Esyon-keb'er. 49Xi'tzun tma'n Okosiy tk'wal Akab' te Josapat, tu'n tq'onte anb'il kyeju' taq'unal kyoj b'ark tu'n kyxi' kyuk'ilju' taq'unal Josapat, atzunte Josapat mixti' taj.
50Kyim Josapat ex ku'x mqu'n toj Ninttanam Dab'i, ju' ojtxi' tyajilb'en. Atl Joram ju' tk'wal kawin te t-xel.
Tkawb'il Okosiy toj Israel
51Tzyet tkawin Okosiy tk'wal Akab' toj wuqlajoj ab'q'i nkawin Josapat toj Juda, tzyet tkawin Okosiy tk'wal Akab' tib'aj Israel toj Samarya, ex kab'e' ab'q'i kawin. 52Aye'tzu'n tb'inchb'aj myab'a'n ela' twitz Qman Dyos, qu'n ax tb'inchaju' myab'a'n kyb'inchaju' tman ex ttxu, ex ax tb'incha Jerob'oam tk'wal Nab'at, qu'n tu'n tpaj eb'ajxa' aj Israel toj il. 53Ex ikx k'ulun twitz B'aal ex jawtnima'n, kse'nx ojetoq tb'inchaju' tman, iktzu'n oka'tq'o'n ttx'u'jil Qman Dyos.
Currently Selected:
1 R 22: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
