Luka 11

Lok ma Yecu opwonyo i kom lega

(Mat 6.9-15; 7.7-11)

1Yecu onoŋo yam tye ka lega i kabedo mo; ka doŋ otyeko, ci ŋat acel i kin lupwonnyene owacce ni, “Rwot, pwonywa ki lega, kit macalo yam Jon opwonyo lupwonnyene.”

2Yecu odok iye botgi ni, “Ka wulego, wuwac kit man ni,

‘Wonwa, giwor nyiŋi maleŋ. Ker meri obin.

3Miwa nino ki nino camwa me nino ducu.

4Iwek balwa, pien wan kikomwa waweko bal pa dano ducu ma gibalo botwa.

Pe iterwa i abita.’”

5Dok owaco bitgi ni, “Aŋa i kinwu ma tye ki lareme ci bicito bote cwiny dyewor ka penye ni, ‘Larema, konya ki mugati adek; 6pien larema mo oa i wot, ocora, ci pe atye ki cam mo ma myero aket i nyime.’ 7En bidokke iye ki i ot ni, ‘Wek yela; doŋ acego doggola woko, wan ki litinona doŋ wabuto; pe atwero a malo ka mini gin mo.’ 8Atito botwu ni, kadi bed en pe bia malo ka miye gin mo pi bedo lareme, ento pi dide ci bia, bimiye gin ducu ma en mito. 9Dok acikowu ni, Wulegi, ci gibimiyo botwu; wuyeny, ci wubinoŋo, wudwoŋ doggola, gibiyabo botwu. 10Pien dano ma lego gimiye, ki ŋat ma yenyo bene, noŋo; ŋat ma dwoŋo doggola bene, gibiyabo doggola bote. 11Aŋa i kinwu ma won latin, ka latinne olege ni omiye rec, ci bimiye twol ma ka rec? 12Nyo ka olege ni omiye toŋŋweno, ci bimiye oton? 13Ka wun jo maraco wuŋeyo miyo mot mabeco bot litinowu, ci Wonwu ma tye i polo pe bikatowu, bimiyo Cwiny Maleŋ makato bot jo ma lege?”

Yecu ki Beeljebul

(Mat 12.22-30; Mar 3.20-27)

14Yam onoŋo Yecu tye ka ryemo cen ma pe loko; ka cen doŋ oa ki i kom dano ma onoŋo tye ki cen, ma te lebe oto, oloko, ci lwak guuro. 15#Mat 9.34; 10.25 Ento jo mogo i kingi guwaco ni, “En ryemo cen pi twero pa Beeljebul ladit pa cen.” 16#Mat 12.38; 16.1; Mar 8.11 Jo mukene onoŋo giyenyo lanyut ki bote ma a ki i polo, pi teme. 17Ento Yecu oŋeyo tamgi, ci owaco botgi ni, “Ka ker iye opokke aryo, ci ker meno lobone balle woko; ot poto i wi wadi. 18Catan bene ka opokke kene i dul aryo, ci kerre bicuŋ niŋniŋ? Pien wun wuwaco ni aryemo cen pi twero pa Beeljebul. 19Ka an aryemo cen pi twero pa Beeljebul, ci litinowu kono giryemo cen pi twero pa aŋa? Pi meno gin aye gibibedo luŋolkopwu. 20Ento ka ce an aryemo cen pi ciŋ Lubaŋa, ci doŋ wuŋe ni ker pa Lubaŋa doŋ obino botwu. 21Ka oteka ma oruko jami lwennye ducu tye ka gwoko gaŋ kalle, jamine ducu bedo ki kuc, 22ento ka dano ma kate ki tek olwenyo i kome ce oloye, bicoko jami lwennye ma ya en geno, bipoko jami ma yam en oyako ki bote. 23#Mar 9.40 Ŋat ma pe tuŋ bota, meno noŋo en lakworra, dok ŋat ma pe nywako coko kweda, keto mere aketa.

Kit ma cen marac dwogo kwede i kom dano

(Mat 12.43-45)

24“Ka cen marac doŋ oa ki i kom dano mo, ci cito wirre i kabedo ma pii pe iye kun yenyo ka ma ebiywe iye; ento ka noŋone oloye woko, ci wacci, ‘Abidok gira i oda ka ma yam aa ki iye-ni.’ 25Ka obino, ci noŋo giyweyo i ot woko maleŋ, giyubo maber. 26En dok, cito kelo cen mukene abiro ma giraco gikate woko, ci gidonyo gibedo i ode-ni; lacen dano-nu bibedo marac makato kit ma onoŋo yam obedo kwede con.”

Gum me ada

27Ka oloko lok man, ci dako mo ki i kin lwak owoto dwane, owacce ni, “Tye ki gum ic ma onywali, ki tuno ma idoto!” 28Ento Yecu ogamo ni, “Makato gitye ki gum, jo ma giwinyo lok pa Lubaŋa, dok gigwoko!”

Yalwak pa jo maraco gimito neno lanyut

(Mat 12.38-42; Mar 8.11-12)

29 # Mat 16.4; Mar 8.12 Ka lwak gumedde mapol, ci Yecu ocako waco ni, “Yalwak pa jo maraco giyenyo lanyut, ento pe gibimiyo botgi lanyut mo, kono lanyut pa lanebi Yona keken. 30#Yon 3.4 Pien kit macalo Yona yam odoko lanyut bot jo Nineve, kit meno Wod pa dano bene bidoko lanyut bot yalwak me kare man. 31#1 Luker 10.1-10; 2 Tek 9.1-12 Kabaka ma dako ma tye yo tuŋ acuc bicuŋ kacel ki yalwak me kare man i kare me ŋolo kop, ci miyo kop loyogi; pien en oa ki i agikki lobo obino ka winyo ryeko pa Solomon, ento nen, gin madit makato Solomon tye kany. 32#Yon 3.5 Jo Nineve bicuŋ kacel ki yalwak man i kare me ŋolo kop, ci miyo kop loyogi, pien gin yam guŋut pi lok ma Yona onoŋo otito, ento nen, gin madit makato Yona tye kany.

Tara me kom

(Mat 5.15; 6.22-23)

33 # Mat 5.15; Mar 4.21; Luka 8.16 “Pe tye ŋatti mo ma cwinyo tara ci kano i gul, nyo umo auma ki aduku; ento cibo i wi okar, wek dano ducu ma gibino i ot gunen derone. 34Tara me komi aye waŋi; ka ce waŋi bal mo pe iye, ci komi kulu bibedo leŋ. Ento ka ce waŋi tye ki bal mo i kome, ci komi kulu bibedo i colpiny. 35Gwokke wek leŋo ma tye i ii-ni pe odok col. 36Doŋ ka komi kulu bedo i leŋo, kun colpiny pe iye, ci komi kulu bibedo leŋ, macalo tara ma menyi ki derone ka tye ka lyel.”

Yecu otuco pi can ma bipoto i kom Luparicayo ki lupwony-cik

(Mat 23.1-36; Mar 12.38-40; Luka 20.45-47)

37Ka yam onoŋo tye ka lok, Laparicayo mo olwoŋe ka cam bote; Yecu odonyo i ot, obedo i dog cam. 38Laparicayo ouro ka oneno ni ocako cam ma pe koŋ ologo ciŋe. 39Rwot owacce ni, “Wun Luparicayo wulwoko ŋe kikopo ki ŋe atabo, kun iwu opoŋ yak ki tim maraco. 40Wun lumiŋmiŋ! Ŋat ma tiyo gin ma woko pe en aye bene otiyo gin ma i iye? 41Wumi gin ma i atabowu bot lucan wek okonygi; ci nen, jami ducu bibedo maleŋ botwu.

42 # Levi 27.30 “Ento wubineno can, wun Luparicayo, pien wumiyo dul me apar me oyado ki ocobo ki kit pot dekwu ducu, kun wuweko ŋolo kop atir ki maro Lubaŋa; meno ducu myero wutim kun pe wuweko magi bene. 43Wubineno can, wun Luparicayo, pien wumaro kabedo me dito i kacokke, dok wumito ni dano gumotwu i cuk. 44Wubineno can! Pien wurom ki lyel ma pe ginen ma dano woto i wigi kun pe giŋeyo.”

45Ŋat acel i kin lupwony-cik ogamo doge ni, “Lapwony, ka iwaco kit man nyuto ni iyeto wa wan bene.” 46Yecu odokke iye ni, “Wubineno can, wun lupwony-cik bene! Pien wumiyo dano yeyo yec mapek, ma yeyone tek, kun wun kikomwu pe wugudo kadi ki lwet ciŋwu acel. 47Wubineno can, pien wucano got i wi lyel pa lunebi ma yam kwariwu guneko. 48Kit meno wun wucaden, wupwoyo tic pa kwariwu, pien gin guneko, wun wucano got i wi lyelgi. 49Pi man Ryeko pa Lubaŋa owaco ni, ‘Abioro botgi lunebi ki lukwena, jo mogo i kingi gibinekogi gibilibogi,’ 50wek remo pa lunebi ducu ma gionyo nia i acakki piny gicul kworre i kom yalwak me kare man, 51#Acak 4.8; 2 Tek 24.20, 21 cakke i kom remo pa Abel nio kwede i kom remo pa Jekaria ma oto i kin keno tyer pa Lubaŋa ki kabedo maleŋ. Iyo atito botwu ni, gibiculo kworre i kom yalwak me kare man. 52Wubineno can, wun lupwony-cik, pien wumayo layab me ŋeyo piny woko, kun wun kikomwu pe wudonyo iye, dok wugeŋo dano ma mito donyo iye bene.”

53Ka doŋ oa ki kunnu, ci lupwonycik ki Luparicayo gucako dine matek ma girobo doge ki peny mapol, 54kun gikiye wek gimak lok ma a ki i doge.

Currently Selected:

Luka 11: Aco85

Highlight

Copy