ZAKARIYA 11
11
1Mal vun-ziyna vag goyo Libaŋ,
hin kut ŋal gu-gamna ma hay nagata vagu.
2Tiyaŋu, naŋ gu-siprena,
kay gu-gamna kaw nigawa gaa'a.
Nisi sa tiy sesi ŋolla vatawa goyo.
Tiyaŋu, naŋ gu-ma'asna ma hay Basan,
kay juru ta sa jik kuɗa' jewɗita vatawa goyo.
3Sum sa ŋomda ka tiy tiy ma hawna,
kay ŋolda visi vatawa goyo,
gurona vi zlon ka tiya,
kay subur-tuwta vi Yordan vatawa goyo.
Sa ŋomda hiɗi farayna
4Ki kayn nala Ma-Vatɗin Lawna van di'e:
Ŋomaŋ fokŋa ma tuɗum ŋat goyna.
5Nisi sa gusumna ŋatam ki nisi min nala;
sa ma gus fok namna goyna di'e:
Bolda ka kay Ma-Vatɗina,
kay nan ka li tuwan faraya;
kay sa ŋomda farayn may kirsi haw noŋ ne'ɗi.
6Kay sum sa hay nagatna nan min hin sa goy kuɗsi noŋɗi,
Din mi Ma-Vatɗina.
Humgiya nan min vul sumun goy mi nuroysina,
vulsi goy hay ɓam muliyan lay;
nisi ma ja ir nagat goy ne' ne',
nan ma but sumun goy hay ɓisi noŋɗi.
7Bugol kayni nan tun caw ŋom fok-dimina ma tuɗum kay ŋat goyna, namu mi ma haw ŋolo jar hena. Nan yaw zugulayn hay ɓan ma': Ta kepta nan ya' ala luma'da, ta heta nan ya' ala tapta; nan gi kuɗ farayn kay ŋomomu. 8Ir til kep nan vat sa ŋomda sa ɦidin goyo; kay dikan may tun-suk kisi noŋɗi, kay nan kaw kirsi bis lay. 9Nala nan ka di tam fok-dimina: Nan as ŋomgi loɗi, na' ta min mita mit ma'a, na' ta min ba goyta ba ma' lay, nam ma hinna mut tuwam jar tuwam malam lay. 10Nan sli zugulda vanu ta ya' ala luma'da, nan kusa' goy purat', kay ja bonota van ta nan va' hiɗi sumunta goyo. 11Hay na'ta de' bonot ja goyo, fok-dimi namna ma muɗi las ŋolla tun caw li nar kanu, nam wi ala kayni mi dita vi Ma-vatɗina. 12Nan di tisiya: La nigi mina, nigi vulan wurakŋa vanu, la min migiɗi, vulanti migiɗi lay. Nisi ŋaɓ gurjut goy ir sikel dok-ɦidi, vulanta kay wurakŋa vanu. 13Ma-Vatɗin di tanu: Vula' goy mi sum sa li dowayna, kay hiɗi gurju na'ta kayni nisi ŋaɓanawa. Nala nan yaw sikel ma dok-ɦidina, nan cukum hay ziyna vi Ma-Vatɗina, ir vi sa ma in dowayna. 14Bugol kayni nan kus zugulda van ta ma'ta ta ya' ala «tapta» goyo, kay ɓuraw jar ɓosiyom-tuwsin Yuda hiɗi Israyel goyo.
15Bugolda Ma-Vatɗin di tanu, yawaŋ slena vi sa ma ŋomda ma ɦay-ɦayn hay ɓaŋu, 16kay ɗuwaŋu, nan min mar hay nagata sa ma ŋomda ma dikam may tum kay fok-dimin ma ba goynɗi; nam ma tuɗ gar fok-dimi ma guraynɗi, ma tuwam milla nam ma kotom vun milla valamɗi, ma tuwam bay moyna nam ma vulum hatɗi, may nam ma lig sliw fok-dimi ma ɗorayna, nam ma jetem goyo ta-ta gaa tirekem goŋ'.
17Joot kay sa ŋomda sa waa ɗaara,
sa noy fok-dimin goyo,
kew-gaferaŋa calsi glaŋatsi goy calge,
cosi irsi ta jufta goy coge.
Gilaŋatsi soys goy soge,
irsi ta jufta muɗ wiɗi muɗge.
Currently Selected:
ZAKARIYA 11: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
