ZAKARIYA 10
10
Mulda vi Ma-Vatɗina
1Jobgi tam Ma-Vatɗina,
kay nam vulgiyay niyna hay guvulta.
Ma-Vatɗin ma li ɗugulla,
nam ma vulgi niyn ŋolo,
nam ma goɗ us ma hay sinena vigi kafe.
2Kay terafim ma nigi jobomna dum mi yoboy ma waana,
sa gireyt dum mi law ma sinna,
duwayt ta digita na' ka' ti sinda,
na' teŋgi irgi kayn waa'a.
Kuɗ kayni nisi ka meray goyo ki farayn nala,
nisi muɗi haw ŋolo kay sa ma ŋomda mayɗi.
3Dikan muɗi ɦiy ŋolo kat sa ŋomda,
nan ma ka kitat kay fok-ŋekŋa,
kay Ma-Vatɗina vi vok-ma-duura kay tuwamu,
min ŋom fok-dimina valamu,
kayni ziyna vi Yuda,
nam ma muɗsi ki kulumna valam ma dono vun duura nala.
4Hay namu hiɗiy ma gef-ziyna ma kalay goyo,
hay namu oslna ma kalay goyo,
hay namu ɓaraw ta duura ma kalay goyo,
hay namu muliyan ma kalay goy kuɗ tuwsiya.
5Nisi ma li ki sum sa donona
tay nagan gaa sesi hay hagan vun duura nala.
Nisi ma dura,
kay Ma-Vatɗin ma li hiɗi nisiya;
sum sa ɓe kay kulumayn hay buur namna ɗawni
ma muɗ zulo'o.
6Nan ma muɗ ziyna vi Yuda dono'o,
nan ma but ziyna vi Yosef goyo,
nan ma hotsiyaya,
kay nan min lisi slugota.
Nisi ma muɗ ɗawni ki nan may hinsi goy jewɗi nala,
kay nanu mi Ma-Vatɗina, Lawna visiya,
nan ma vulsi gida.
7Sumuna vi Efrayim muɗ ɗawn si sum sa dono'o,
haysi ma li firi ki sa ma ci vinna nala,
hay li ma gurona visi wisiyawana,
diksi ma li firiya,
haysi ma li firi ŋolo kuɗ Ma-Vatɗina.
8Nan ma feɗ kuy-kuy' kay toksi yisiya,
kay nisi gusi kanu,
nisi ma biya'a ki nisi ka biya jew nala.
9Nan ma mersi goy jar jaf-sumuna,
goy gine kaw humsi ma gisi kanu.
Nisi ma lak hiɗi gurona visiya,
nisi ma hotiya.
10Nan ma yawsiyay goy hay Egipte pa,
nan ma toksi yisi ay goy hay Asiriya pa,
nan ma marsi hay nagata vi Galaad hiɗi Libaŋ
hiɗi kayn kaf liyn ma assiɗi.
11Nisi ma ɦaw niy-lumna ma zumalda kulo'o,
nisi ma bas birina vi niy-lum ma ŋolla gaa'a,
liyn ma zulla vi niy-lumna kaf ma so goyo.
Subur-tuwta vi sum sa Asiriyan ma vat goyo,
zugulda-mulda vi Egipte ma vat goyo.
12Nan ma muɗsi dono ɗawn hiɗi sem Ma-Vatɗina,
nisi ma poy hiɗi semda valamu,
Din mi Ma-Vatɗina.
Currently Selected:
ZAKARIYA 10: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
