MARKUS 7

Sa Farisena hiɗi data vi sumaysiya

Mat 15:1-9; Luk 11:37-41

1Sa Farisena hiɗi segena jar sa wi ɗota sa may Yerusalem pana tok tuwsi tam Yesu. 2Hay li ma nisi wi segen jar sa hatayna valamu ti hiɗi ɓisi gese, kayn di ala ɓisi bay muz goyo, 3kay sa Farisena hiɗi sa Yudiyan noŋ kaf la ɓisi bay muz goy ŋaa'a, nisi tiɗi, kay nisi li kuɗ data vi sumaysiya. 4Hay li ma nisi mayawa goy lumu pana, la tuwsi bay muz goyo, nisi tiɗi. Sle hegen ŋolo ma nisi vum kisin ka kaw: ki muzta vi kaway-ma-cina nala, muzta vi dowayna hiɗi doway ma wayna kaw.

5Sa Farisena hiɗi sa wi-ɗota jobom ala: sa hatayna vaŋu may poy kuɗ data vi sumaysiɗi kayn kay mige? Nisi ti fun hiɗi ɓisi bay muz kayn kay mige?

6Yesu disiya: Nigi sa milena, Esaya di vun-jobta kigi kayn hay liyamu, hay li ma nam di vokom ala:

Sumun kayn slan yan kulo hiɗi vunsi ɦawa,

May diksi ka goy gine hiɗi nanu;

7kay nisi girifan kayni goy ɦawa'a,

hay li ma nisi hat hatta ta may goy

hay data vi sumuna.#7:7 Fum hay Es 29:13.

8Nigi hin vun-ma-gatna vi Lawna goyo, may nigi vi dono'o kuɗ data vi sumuna. 9nam hot disi lo: Gasi, nigi ra gatta vi Lawnawa goyo kay vi kuɗ data vi sumuna. 10Kay Musus di'e: slaŋ yam buŋu hiɗi suŋu kulo'o, lo, sa ma ŋul bulum kla sulum kla, nam ma fi cita-goyta. 11May nigi hat sumun ala: La san di tam bulumu lebo sulumu ala: va ma nan min gutaŋ hiɗi namna nan min muɗum goy korban, kayn ala va ma vulum tam Lawna. 12Nala nigi hinim a gut kuɗ bulum hiɗi sulumɗi. 13Nala nigi muɗ yoboyna vi Lawna wa goy waa'a kuɗ data vigi ta nigi hat sumun hiɗi na'ta, slen ŋolo ki kayn nala nigi ka lumu.

14Nam yi sumun talam mara lo ka disi ala: Humgi slen kayni, humgit cawam kaw: 15Va ma mays goy jiy pa kal kalaf hay sana muɗum liwisɗi, may va ma muɗ san liwis kayni mi va ma may goy hayam pana. 16Sa ma humam ka'a kay huma, nam ma huma.

17Hay li ma nam kal kalafi hay ziyda, goy gine hiɗi sumuna, sa hatayna valamu jobom kay caw law ma nir-niramna kayni. 18Nam disiya: Nigi kaw bay yal nala lay su? Va ma may goy jiy pa kal kalaf hay san kayn muɗum liwisɗi, nigi may wi kaynɗi su? 19Kay nam kal hay dikamɗi, may hay ruwatam ɦawa, capis goy hay liy ma gal tuɗoŋo. Nam di ala sle ma tin kaf nam bay-liwisi. 20Nam disiya: Va ma kalay goy hay san pa kayni mi va ma muɗum liwisna. 21Kayni mi slen ma joona ma may goy kalaf hay dik san pa, muɗum liwisi: Varta joota, viyuwta, kulda, ci-matta, 22zlata-bulota, haramda, dikga joota, ɗutta, hum gatɗi, ci porlayta, ŋulda, jigal-tuwta, ɦoyta. 23Kayni kaf mi sle ma joona ma may goy hay san pa, ma as muɗum liwisna.

Cata Kanaaniyata

Mat 15:21-28

24Bugol kayni Yesu fokis ɗawn pa, nam kal goy hay nagata vi Tirus. Nam kal kalaf hay ziy tara kep, nam may min ala sa wumɗi, may nam fi a ŋay tuwam kay sumunɗi. 25Kay cat tara ka kepe, goota va'a ful ma liwisna ka ka'a, hay li ma na' hum labara kay Yesu, na' ma'a, gi tuwa' gaa vok gayamu, na' girifimu. 26May cat na'ta kayni ti cata Grekga, ta jafa' may hay Sirofenisiya pa, na' siɗawamu kay nam ma digiɗ ful ma liwisna goy kay goota va'a. 27May nam di ta'a: hin gurosgurayna hob jewe, a yaw funa vi gurosgurayna cukum goy mi guro durnayna kayni may hay liyamɗi. 28Na' hot dita: Gasiya, Bum-Sumuna, guro durnayna kaw mut helek ma cuk gaa kuɗ tablena vi gurosgurayna. 29Nam di ta'a: kuɗ yoboyn kayni, fuliyan cukawa goy hay goota vagu, tuɗag magu. 30hay li ma na' co vo'o, na' fi goot meɗi goy gaa kay va ma buur sileŋdeŋ', ful ma ka'na kalay goy may.

Yesu yer sa ma gidiŋŋa goyo

Mat 15:29-31

31Bugol kayni Yesu hin Tirus, nam jik hay Sidon. Nam hotay kel niy-lumna Galileya, hay nagata vi Dekapolis. 32Sa ma gidiŋ ma vunam di ŋaaɗina kepe, nisi maram tam Yesu. Nisi siɗaw Yesu kay nam ma tun ɓalam kalamu. 33Nam kalam goy ŋayaya, gine hiɗi sumuna, kal ɓalam humamu, jom sinemu hiɗi nenena; 34bugolda nam muɗ iram kulo wuralawna, gi suku di'e: Effata, kayn di ala: malaŋ goyo. 35Wulini wulini humam mali goy wiŋ', sinam ta zlaɓayta but goyo kaw, nam tun caw law goy haraŋi. 36Nam gatsi kay nisi ma di kayni goy mi saɗi, may hay li ma nam gatsi ŋol gatna, nisi di labar goy voksi suwa. 37Nisi muɗ ɦuyum' ŋolo, slen kaf ma nam lum kayn ŋaa'a ŋolo, sa gidiŋŋa nam muɗsi huma, sa sinsi zlubakaya nam muɗsi di kaw.

Currently Selected:

MARKUS 7: Massana

Highlight

Copy