MARKUS 8

Yesu muɗ fun dak-daki sem ma ma'na

Mat 15:32-39; Mark 6:35-44

1Hay buur namna kayni, hay li ma sumuna dak ŋolo lo, va ma nisi tum mayɗi, Yesu yi sa hatayna valamiya disiya: 2Sumun kayni kiran haw ŋolo, kay nisi ka tokay tan tani ir buur ɦidi, va ma nisi tum mayɗi. 3La nan hinsi kal vo hiɗi mayt nala, na' ma cosi zuroɓsi hay hagata, kay segen jarsi may goy gine pa. 4Sa hatayna valamu hot dita dumu: Nay as hob sumun tani hiɗi fun goy hay fulda tan ɗawn hiɗi yal mige? 5Nam jobsi ala: Fun ka kigi gaage? Nisi di'e: Fun ka kuma siɗiya. 6Nam vul hagata tam sumuna kay mol gaa'a kay nagata; nam yaw fu ma siɗiyana, gi deɓe, ɓurawamu, vulum mi sa hatayna valamu kay nisi ma ɓurawam goyo, nisi ɓurawam goy mi sumuna. 7Kuluf guray ka kisi ne' ne' kaw, nam gi bol kalamu, vul hagat kay nisi ɓurawam goyo kaw. 8Sumun ti'e, hob kaw, diram ma hinna nisi yawam kulo'o, nam oy tikisi siɗiya. 9Sumun ay ir birim fiɗi nala, nam hinsi kala may. 10Wulini wulini nam jik hay lumda, kal hiɗi sa hatayna valamu hay nagata Dalmanuta.

Ɗekka ta may kulo wuralawn pa, kufna vi sa Farisena

Mat 16:1-12; 12:38-39; Luk 11:16, 29

11Sum sa Farisen co'o, nisi tun caw ci way hiɗi Yesu, kay nememu, nisi jobom ala nam ma vulsi ɗekka ay kulo wuralawn pa. 12Yesu gi sukam goy hay Ŋusta valam gif' di'e: Jaf-sum nisina gar ɗekka kayn kay mige? Nan digi gasita: Jaf-sum nisina ɗekka ma vulis tisi noŋɗi. 13Nam hinsiya, jik kulo hay lumda lo, hot kulo gal hena.

14Sa hatayna yisi jok kay yaw funay kisiya, fun kep ɦawa ka kuɗsi hay lumda. 15Nam disiya: Nigi ma li ŋali, nigi ma ŋom tuwgi ŋaa'a kay kufna vi sa Farisena, vi sa Herodiyana. 16sa hatayna di jar-tuwsiya: Kayni kuɗ ta ala nay yaw funay kayɗit klasige. 17Yesu wi vaara visiya, nam di tisiya: nigi var hay dikgi ala nan di kayni kuɗ ta nigi yaw funay kigiɗita kayn kay mige? Nigi bay wi tuwa, bay hum tuwa kaw su? Dikgi so'otay nala su? 18Irgi ka'a may nigi wiɗi, humgi ka'a, may nigi humɗi kaw nala su? Humgi may gigi noŋɗi su? 19Hay li ma nan ɓuraw fu ma vaslna kay sum sa birim vasln kayni, diram ma hin goyna oy tikisi gaage? Nisi di'e: Doogo yam ma'. 20Lo, hay li ma nan ɓuraw fu ma siɗiyan jar sum sa birim fiɗin kayni, diram ma hin goyna oy tikisi gaage? Nisi di'e siɗiya. 21Nala nam disiya: Nigi bay hum va tuwa noŋ su?

Yer-goyta vi sa ma dukina

Mark 10:46-52; Yoh 9:1-11

22Hay li ma nisi co hay Betsayda cona, sumun mar sa ma dukin kep talamu. Nisi siɗaw Yesu kay nam ma jomu. 23nam vi ɓam sa ma dukina, tuɗum goy jam hiɗi ziyna, nam tufum nenen kiramu, ka jobom ala: Naŋ ka wi va su? 24Nam mal iram goyo di'e: Nan ka wi sumun ki gun ɦawa nala, may nisi ka poy ziwit-ziwit'. 25Yesu hot tun ɓalam kiram lo, nam muɗ wi'e, muɗ goy ŋaa'a, muɗ wi slen goy haraŋ cetet' kaw. 26Yesu gum iram vo hay ziyna valamu dum ala: Naŋ ma kal hay hoyok-ziynɗi.

Hamda vi Peter, Yesu di kay mitta valamu

Mat 16:13-28; Luk 9:18-27

27Yesu hiɗi sa hatayna valamu kal hay nagata vi Sesariya vi Filipi. Hay li ma nisi ka hay hagata, nam ka jobsi ala: sumun ka di kan ala nan mi gige? 28Nisi dumu: Segena ala naŋ mi Yohana ma Baptisma, segena ala naŋ mi Eliyas, segena lo ala naŋ mi sa kep jar sa jobta-Lawna. 29Nam jobsiya: May nigiya di kan a nan mi gige? Peter hot dita dumu: Naŋu mi Kristu. 30Nam disi kay nisi ma di goy kalam mi saɗi.

31Nam tun caw hatsi ala: goora vi sana ma li las ŋolo, sa maariyana hiɗi muliyan ŋulo sa-ɗifinna hiɗi sa wi-ɗota kaw ma noyom goyo, cum goyo kaw, may buur ɦidi bugolda nam ma day kulo'o. 32Nam disi goy haraŋi kay slen kayni. May Peter vum goy ŋayaya, tun caw gatamu. 33May nam muɗ iramu ɗuw sa hatayna valamu, law Peter ala: Tuɗaŋis goy bugolanu Satan, kay vaara vaŋu may mi vaara vi Lawnɗi, may vaara vi sumun ɦawa.

34Nam yi sumuna hiɗi sa hatayna valam kaf talamu disiya: la san min tap kuɗanu, nam ma noy tuwam goyo, sli gu-ma-grakŋa valam kulo'o kay tap kuɗanu. 35Kay gigekaw ma min suɗ irita valamu nam ma ba'a, may gigekaw ma min ba irita valam kanu kuɗ labara ma firina, nam ma suɗa'a. 36Kay la san fi sle ma hay nagat pete, may ba ciwta valamu ni, ŋaata kalam arige? 37Va mara ma san as vulum a muɗ ciwta valam hiɗi nam ɗawn mi mige? 38Kay gigekaw ma li zulo kanu, kay yoboyna van kaw jar jaf-sum sa hay zaman ma vaydina sa li zlata-bulo'o, sa li sulukŋ kaf kayni, goora vi san kaw ma li zulo kalamu hay li ma nam ma'a hay gajijita vi bulumu, hiɗi sa sunda-wuralawna sa peldetna kuɗumu.

Currently Selected:

MARKUS 8: Massana

Highlight

Copy