MARKUS 6

Yesu hay Nasaret

Mat 13:54-58; Luk 4:16-30

1Yesu fokis ɗawn pa kal hay nagata valamu. Sa hatayna valamu tap kuɗumu. 2Hay li ma sabatna maawa, nam tun caw hat hay sinagogayna. Sum sa dakay hum hatta valamna muɗ huyum ŋolo, Nisi di'e: san kayni fi slen kayn ay arige pa? Yal namna nam fumi kayn arige pa? Ɗekka ta ki kayn nala nam la' kayn ir nanige? 3Nam kayni mi sa ma ceɗ gunɗi su? Namu mi goora vi Mariya ɗi su? Namu mi ɓasum Yakub hiɗi Yoses, hiɗi Yudas hiɗi Simonɗi su? Ɓosiyom sa boyna ka jaray tanɗi su? Nam muɗ mi va ma dabsi sesiya. 4Yesu disiya: Sa ma jobta-Lawna sa ɗuwum birek-ceke hay li maraɗi, may jar sumiyamu hay nagata valamu. 5Ɗawni nam may li ɗekka kep noŋɗi, may nam bar ɓalam kay sum sa moy sara'a yersi goyo tuta. 6Nam muɗ ɦuyum' kay bay-vida visiya.

Sa doogo yam ma'na cuki sunu

Mat 10:5-14; Luk 9:1-6; 10:1-20

Nam ŋuy hay hoyok-ziy ma goboyn kaf kay hatsiya.

7Nam yi sa doogo yam ma'na talamu, tun caw cuksi kuɗ tuwsi sun ma' ma', vulsi donota kay digiɗ fuliyan ma liwisna goyo. 8Nam gatsi kay nisi ma sli va kisi hay hagatɗi, yaw fuɗi, yaw birimɗi, yaw gurju hay pos-sligara visiɗi kaw, may mi zugul ɦawa. 9Nam disi lo: yawgi tuguru segiya, yawgi sligar-tuwna ma' ma'ɗi.

10Nam disiya: ziy marige kaw la nigi cukawa hayamu, nigi ma lak hayamu ta-ta hay li ma nigi raw vokgiya. 11Liyn ma nigi co hayamna arigekaw la nisi min vigiɗi, min hum kuɗgiɗi kaw, pogi butuw ma wur-segin goyo hay li ma nigi min kal vokgiya, kay kayni ma li di-goyt kisiya. 12Nisi cuki goyo kus yoboyna kay sumuna ma hama, 13nisi digiɗ fuliyan goy ŋolo, nisi ɦok mul kay sa moyna ŋolo muɗsi goy ŋaa'a kaw.

Mitta vi Yohana ma Baptisma

Mat 14:1-12; Luk 3:19-20

14Mulla Herod hum kayni, kay sem Yesu tiy ŋolo, nam di'e: Yohana ma baptisma dayawa kulo'o hay mitta pa, kuɗ na'ta kayni nam ka hiɗi donota kay li ɗekka. 15May segena di'e: kayni mi Eliyas, segena lo di'e: kayni mi san kep jar sa jobta-Lawna. 16May hay li ma Herod hum kayni, nam di'e: Day kulo kayn mi Yohana ma nan kaam yalam goyna.

17Kay Herod kay tuwamu cuk sumuna kay vi Yohana, junumu, gum hay daŋgayna kaw, kayni kuɗ Herodiya, cata vi ɓasulumna Filip, ta nam va'ta, 18kay Yohana di Herod ala: vun-ma-gatna hinaŋ vi cata vi ɓasuŋɗi. 19Herodiya ka gaw hay dika' tam Yohana, na' gar a cum goyo, may na' as kay li kaynɗi, 20kay Herod ka li nar kuɗ Yohana, kay nam wi ala nam sa ma ɗigera ma peldetna. Nam ka ŋom Yohana, hay li ma nam humumawa, dikam muɗ tum ŋolo, may nam mus humum malam hiɗi firit nala. 21May na' fi hagat kayni, hay li ma yuldeta vi buurta vu'da vi Herod co'o, nam li yuldeta kay sa ŋulona valamu: sa ŋulona vi duura hiɗi sa ŋulona vi Galileya, 22hay li ma goota vi Herodiya ma kalafi kay pir dalaŋgana, Herod hiɗi sa lakay ti hiɗi namu irsi va' ŋaa ŋolo, nala mulla di tam goot-cata: Goota, la nak siɗawan kay mige kaw nan ma vulakga. 23Nam yi va kalam ala: la nak joban kay mige mige kaw, nan ma vulakga, la ti gal mulda van kaw. 24Na' kalay goyo job tam su' ala: Nan ma jobom talam mi mige? Su' hota' dita: Nak ma jobom yam Yohana ma Baptisma. 25Wulini wulini na' ma kalaf gosoy tam mulla, ka siɗawam ala: Nan min ala naŋ ma vulan yam Yohana ma Baptisma hay tasat kayni wulini. 26Mulla dikam muɗ yor ŋolo, may kay va ma nam yum kalamna, kuɗ nisi sa dakayna kaw, nam min tela'ɗi. 27Wulini wulini mulla gi soje ma gardena valam kepe, dum kay nam mar yam Yohana ma Baptisma. 28Gardena kalay hay liy ma daŋgayna, nam ka yam Yohana, maram yalam hay tasata. Vulum mi goot-cata, na' vulum mi su'a. 29Hay li ma sa hatayna valamu hum kayni, nisi ma'a, slum tuwamu pum gaa hay zulla.

Yesu muɗ fun dak-dak sem ma jewna

Mat 14:13-21; Luk 9:10-17; Yoh 6:1-14

30Sa apostolayna dak tuwsi tam Yesu, nisi vum labara kay sle ma nisi lumayna hiɗi sle ma nisi hatamayna. 31Nam disiya: Nigiyay goy kuɗan hay liy ma fulla tani kay tun sukgi neeɗa. Kay sumun ŋolo ka kal talamu, segena ka cukay goyo kaw, nisi may fi liyn kay ti fu noŋɗi. 32Nisi ɓe hay lumda, kay tuɗ goy hay liyn ma fulla goy ŋayaya. 33Sumun ŋolo wi liy ma nisi ka kal hayamna, sumun ŋolo hay hoyok-ziyn kaf tun tuwsi goy voksi hiɗi sesiya, kay tuɗ hay liy ma nisi min na hayamna.

34Hay li ma Yesu jikay goy hay lumna jikŋa, nam wi sumun ŋolo, nisi muɗ kiram hawi. Kay nisi muɗi ki fok-dimi ma bay ŋomda nala. Nam tun caw hatsi ŋolo. 35Hay li ma fatta kalay ŋolo, sa hatayna valamu tuɗ talamu dumu: liyn kayni goy fulu, fatta kalay ŋolo kaw, 36gisi irsiya, kay nisi ma kal hay hoyok-ziyna hiɗi naga ma galamna kaw kay gus va ma ti vunsiya. 37Yesu disiya: Nigi kay tuwgiya vulsi va ma tina. May nisi dumu: Numa tuɗ gus tina ir gurjut kis-ma', kay vulsi va ma ti'e su? 38May nam disiya: Ɗuwgi fu ma kigin haw tige, nam gaage? Hay li ma nisi ɗuwumu, nisi di ala numa ka hiɗi fun vasl, kuluf ma' may. 39Nam di'e: sumun ma mol gaa kuɗ farana farana kay us ma ŋulomna. 40Nisi mol gaa hitit' hitit', segen kis kis, segen dok-vasl dok-vasl may. 41Nam yaw fu ma vasl hiɗi kuluf ma ma'na, ɗuw kulo hay wuralawna, gi bol kay funa, ɓurawamu, vulum mi sa hatayna kay nisi ma ɓurawam tam sumuna. Kuluf ma ma'na nam ɓurawam tam sumun kafe kaw. 42Nisi kaf ti'e hob kaw. 43Dir funa hiɗi kuluf ma hinna nisi yawam kulo'o, nam oy tikisi doogo yam ma'. 44Nisi sa ti funa sum sa jufayn birim vasl.

Yesu poy kay niyna

Mat 14:22-36; Yoh 6:15-22

45Wulini wulini nam li sa hatayna valam hiɗi dono'o a nisi ma jik hay lumna kay tuɗis vokom kulo deŋel gal hena, hay gal Betsayda, kay nam kay tuwam hinis gi ir sumuna. 46Hay li ma nam gi ir sumunawa, nam kay tuwam jik kulo kay hiɗiyta kay siɗawa. 47Hay li ma vulatita coowa, lumda ka goy way niyna, Yesu hinis kulo deŋel valam kepe. 48Nam wi ala lop ŋolo kisiya kay gi lumda, kay simeɗna ay kirsiya. Hay ŋomda-fiɗita#6:48 Ŋomda-fiɗita Jar sa yudiyana ŋomda hay henjeta ira' kaay fiɗi hay henjeta. nam co tisiya, poy kay niyna, ki nam min cap galsiya nala. 49Hay li ma nisi wum tuɗ kay niyna, nisi var ala kayni mi fulla, nisi tun caw ciriya. 50Kay nisi kaf irsi wumu, nisi muɗ nar ŋolo. May gosoy wit' Yesu ka disi ala: vigi dikgiya, kayni mi nanu, ligi narɗi. 51Bugol kayni nam jik kulo tisi hay lumna, simeɗn tun gaa kiliŋ, nisi muɗ huyum ŋolo. 52Kay nisi bay hum caw gul-yalda ta nam la' hiɗi fun tuwa, kay diksi so'otay ŋolo.

Yesu muɗ sa moyn goy ŋaa'a hay gal nagata vi Genesaret

53Hay li ma nisi jik kulo jikŋa, nisi co hay nagata vi Genesaretna, nisi tun lumda kulo deŋele. 54Hay li ma nisi jikay goy hay lumda pa jikŋa, sumuna wi Yesu vuntuni vuntuni. 55Sum sa hay nagat na'ta kaf jaŋ tam Yesu, nisi tun caw maram sa moyna, buri kay raŋgawna visi waŋ waŋ, hay li ma nisi hum ala Yesu ka tani. 56Hay liyn kaf ma Yesu poy hayna, hay hoyok-ziy ŋulona hiɗi hoyok-ziy gurayna, hay liy ma kawiyana kaw, nisi bur sa moyna visi goy hay liy ma lumuna, nisi siɗawamu kay nisi min jom mi vun-sligara valamu tuta. Nisi kaf sa jo vun-sligara valamu, nisi muɗi goy ŋaa'a.

Currently Selected:

MARKUS 6: Massana

Highlight

Copy