MARKUS 11

MITTA HIƊI DAYTA-KULOTA VI YESU HAY YERUSALEM

Yesu kal kulo hay Yerusalem

Mat 21:1-11, 14-17; Luk 19:20-44; Yoh 12:12-19

1Hay li ma nisi co hay Betfage hiɗi Betaniya gal hiɗiyta Olive, goboy a co kulo Yerusalem, Yesu cuk sa hatayn ma' sunu ka disi ala: 2Tuɗgis tam hoyok-ziy ma vokgi ɗiger; hay li ma nigi cukawa kulo hayamu nigi ma fi goor kuron juni zaw, goor-kuro namna sa bay ɓe kalam tuwa. Nigi ma butumu, maramay tani. 3La sa digiyawa ala nigi lum hiɗi nam mi mige ni, nigi ma hotom dit ala: Bum-Sumun min li va hiɗi namu. Nam ma hingit wulini wulini.

4Nisi kaliya, nisi fi kuron juni goy hay haga ta vun-galan zaw, nisi butumu. 5Segena jar sa ay lakay hay liy namna jobsi ala: Nigi lum kayn mi mige? Nigi but goor-kuron kay mige? 6Nisi hot dit ki Yesu disi ay nala. Nisi hinsi kal hiɗi namu. 7Nisi mar kuro ma joriyo namna tam Yesu, bar sligara visi kalamu, Yesu musi kalamu may. 8Sumuna ŋolo bar sligara visi hay hagata, segena bar popona ma nisi kusumay goy hay sinena. 9Nisi sa tuni vokomna hiɗi sa bugolomna kaw ka siwel ala: Hosanna! Bolda ka kay nam ma min ma ma'a hay semda vi Bum-Sumuna, 10Bolda ka kay mulda vi buya David, ta ka ma'a, hosanna! Hay liyn ma Kulo-Jamna.

Yesu beɗ gu-gumna, sum sa gus slen goyna digiɗiy goy hay Tempella

Mat 21:12-13, 18-19; Luk 19:45-48; Yoh 2:13-17; Luk 13:6-9

11Yesu kal hay Yerusalem hay Tempella, hay li ma nam ɗuw slen hay liyn pet ɗuwna, fatta kalawa kaw, nam kalay hay Betaniya hiɗi sa doogo yam ma'na.

12Grawta, hay buurta ka'ta, hay li ma nisi may goy Betaniya pa, mayta tun caw cumu. 13Hay li ma nam wi gu-gumna goy gine'e goɗay zaw, nam tuɗ kuɗumu kay fi vuɗ humam kla. Hay li ma nam co talamu, nam fi vaɗi, may mi humam ɦawa, kay kayni may mi liyn ma vuɗna vi gumnaɗi. 14Nam sli ditiya di tam guna: Ta-ta hay vatɗita sa ti vuɗna vaŋ loɗi. Sa hatayna valamu hum kayni kaw.

15Bugol kayni nisi hotay hay Yerusalem. Nam kal hay Tempella, sum sa gus slena hiɗi sum sa gus goy hay Tempella nam tun caw digiɗsi goyo, tablena vi sa muɗ gurjuta hiɗi zlamna vi sa gus gukayn goyna kaw nam zutum gaa'a. 16Nam min hin sa ziy jakŋa ay goy hay Tempella pa noŋɗi. 17Nam ka hatsi ala: Ɗot di ala ziyna vanu ma yum ala ziy ma siɗawta kay jaf-sumun kafe naɗi su? May nigi muɗumawa goy mi zulla vi sa coŋcoloŋŋa! 18Muliyan ŋulo sa-ɗifinna hiɗi sa wi-ɗota hum labara valamu, nisi gar hagata kay bam iram goyo, may nisi li nar kalamu, kay sumun kaf muɗi ɦuyum' kay hatta valamu. 19Hay li ma vulatita coowa, Yesu hiɗi sa hatayna valamu cukay goy hay hoyok-ziyna pa.

20Graw culumta hay li ma nisi jik hay hagat na'ta, nisi wi gu-gum namna soy goy hamiyaŋ, gaa' sutiyamay pa. 21Peter human gumu, nam di Yesu: Rabbi, ɗuwaŋ gu-gumna ma naŋ beɗemna natige, nam soy goy hamiyaŋ'. 22Yesu hot ditiya disiya: Tungi vida vigi hay Lawna. 23Nan digi gasita, gigekaw ma di tam hiɗiyt zawni ala: Poŋag kulo'o, gag tuwagis hay niy-ŋolla, la nam di kayni hiɗi dikam giriŋɗi, may hiɗi vid ala van kayni ma li'e ni, van kayni ma li gasi. 24Kay na'ta nan digiya: Hay li ma nigi siɗaw Lawn kay va'a, vigi hay dikgi ala nigi fumawa. Nala nigi ma fum gasi. 25Hay li ma nigi lak siɗawa, la haygi var joo'o kay sa'a, nigi ma vulum gida, kay bugi ma hay wuralawna ma vulgi gid migi nigi lay. 26May la nigi vulsi gidɗi, bugi ma hay wuralawna ma vulgi gid kay sulukŋa vigiɗi lay.

Gaŋeraŋa vi Yesu may kayn arige pa?

Mat 21:23-27; Luk 20:1-8

27Nisi hot hay Yerusalem lo, hay li ma Yesu ka poy hay Tempella, muliyan-sa-ɗifinna hiɗi sa wi-ɗota hiɗi sa maariyana ma talamu, 28nisi jobom ala: Sle namna naŋ lum kayni hiɗi donota vi gige? Sa ma vulaŋ donot kay sle namna kayni mi gige? 29Yesu disiya: Nan min jobgi kay va kepe: La nigi hotan ditawa, nan kaw ma digi goy kay donota ta nan ka li slen hiɗi na'ta. 30Baptisma vi Yohana may vi wuralawn pa lebo vi sumun pa su? Nigi hotan dita. 31May nisi var jar-tuwsi ala: La nay hot dit ala nam may vi wuralawn pa, nam ɗawni ma di ala nigi vi hayamɗi kay mige? 32May la nay di ala may vi sumun pa, nisi li nar kay sumuna, kay sumun kaf ka ɗuw Yohana ki sa ma jobta-Lawna ma gasin nala. 33Ki kayn nala nisi hot dit tam Yesu ala: Numa may wiɗi. Nala Yesu disiya: Nan kaw donot ta nan li lop hiɗi na'ta nan as kay digitɗi lay.

Currently Selected:

MARKUS 11: Massana

Highlight

Copy