MATEWUS 4

Matna nem Yesu Kristu

Mark 1:12-13; Luk 4:1-13

1Kay na'ta Ŋusta kal Yesu goy hay fulda kay Matna ma nememu. 2Nam li laata ir buur dok-fiɗi': falayta hiɗi henjeta kaw, bugol kayni mayta tun caw cumu. 3Bum-nemda co talamu dum ala: La naŋ mi goora vi Lawna ni, vulaŋ hagat tam hiɗiyn lakŋi kay nam ma muɗ goy fuwa. 4Yesu hot dita: ɗot ɗo'ay ala: Sana mus iriya kay fu ɦawaɗi, may kay yoboyn kaf ma may goy hay vun Lawna pa.#4:4 Fi kayni hay Gsm 8:3.

5Bugol kayni Matna kalam kulo hay hoyok-ziy ma peldetna, nam musum kulo kay yam Tempella, 6ka dum ala: La naŋu mi goora vi Lawna, gaŋ tuwaŋis gaa'a, kay ɗot ɗo'ay ala:

Nam ma vul hagata tam sa sunda-wuralawna valamu,

Nisi ma ziyaŋ kulo'o hay ɓisiya,

Kay seŋ ma dab tam hiɗiyn noŋɗi.#4:6 Fi kayni hay Nul 91:11-12.

7Yesu dumu: ɗot ɗo'ay ala: Naŋ ma nem Bum-Sumuna Lawna vaŋɗi.

8Lo Matna slumu, kalam kulo kay hiɗiyta ta fiyok ŋolta, ɗekem kay mulda ta kay nagat kafe, hiɗi gajijita va'a kaw, 9ka dum ala: Slen kayni kaf nan ma vulaŋga, la naŋ guɗof gaa vokanu kay girifanu. 10Yesu dumu: Tuɗaŋis goyo Satan, kay ɗot ɗo'ay ala: Naŋ ma girifim mi Bum-Sumuna Lawna vaŋu, naŋ ma sunumtin mi nam kepe. 11Hay na'ta Matna hinimu, sunda-wuralawna ma talamu kay sunumu may.

Yesu hay Kapernawum, yita vi sa hatayna sa fiɗina

Mark 1:16-20; Luk 4:14-15; Yoh 1:35-43

12Hay li ma Yesu hum ala nisi gi Yohanawa daŋgaya, nam kal goy hay Galileya. 13Nam hin Nasaret, co mus hay Kapernawum, ta ka goboy hiɗi niy-lum ma ŋolla, jar nagata vi Zabulon hiɗi Neftali. 14Kay hob vun dita vi Esaya ma jobta ta di ala:

15Nagata vi Zabulon hiɗi nagat vi Neftali,

Gal niy-lumna goy bugol Yordan,

Galileya vi sum sa waana,

16Sumuna sa lakay hay jufunda

wi haraŋ ma ŋolla,

Nisi sa lakay hay nagata

hiɗi ŋus-mitta kaw,

Haraŋa foowa goy kisiya.#4:16 fi kayni hay Es 8:21.

17Hay na'ta pa Yesu tun caw kus yoboyn ala: Hamgiya, kay mulda-wuralawna maawa goboyo.

18Hay li ma nam ka poy kel niy-lumna Galileya, nam wi ɓosiyom-tuwsin ma': Simon ma yum Peter, hiɗi ɓasulumna Andre, nisi ka cuk luwanna visi goloŋo, kay nisi si sum sa ciwna. 19Nam disiya: Tapgiyay kuɗanu, kay nan min muɗgi goy si sa ciw sumuna. 20Wulini wulini nisi hin luwanna visiya, tapay kuɗumu. 21Hay li ma nam raw vokomu, nam wi ɓosiyom-tuwsi segen ma' lo, Yakub goora vi Sebedew hiɗi ɓasulumna Yohana ka lakay hay lumda hiɗi busi Sebedew lak' kay taɓ ir luwanna visiya. 22Nam yisiya, wulini wulini nisi hin lumda hiɗi busiya, tapay kuɗumu.

23Yesu poy hay Galileya pet, nam hat hay sinagogayna visiya, kus labara ma firina vi mulda, sa moyna hiɗi sa maŋayna jar sumun kaf nam muɗsi goy ŋaa'a. 24Labara valam mer goy hay Siriya noŋ kaf, nisi mar talamu sumun kaf sa las kuɗ moyna hiɗi tuw-tita tara'a tara'a, sa fuliyan kisina, sa ul cisina#4:24 Sa ul cisina moy-ulla hay liy hena sumun yum ala kiŋ-kiŋŋa. hiɗi sa dirlayna kaw. Nisi kaf nam muɗsi goy ŋaa'a. 25Sumun ŋolo tuɗ kuɗumu, sa hay Galileya hiɗi Dekapolis, hiɗi Yerusalem, hiɗi Yudiya, hiɗi nagat goy bugol Yordan kaw.

Currently Selected:

MATEWUS 4: Massana

Highlight

Copy