MATEWUS 3

Kusta vi Yohana ma Baptisma

Mark 1:1-8; Luk 3:1-20

1Hay li namna Yohana ma Baptisma co'o, nam tun caw kus yoboyna hay fulda vi Yuda. 2Nam di'e: Hamgiya, kay mulda-wuralawna maawa goboyo. 3Nam kayni mi ma Esaya ma jobta-Lawna di goy kalam ala:

Del sana ma siwel hay fulda,

pargi hagata vi Bum-sumuna goyo,

Moɗgi hagata valam ta gurayta goyo kaw.#3:3 Fi kayni hay Es 40:3.

4May Yohana sligara valamu mi ɗuŋus lamgana, kanti ma juni furamna mi ɗigiyna may, tina valamu mi baara hiɗi yumda hay fulda. 5Sum sa hay Yerusalem, sum sa hay Yuda hiɗi nagata vi Yordan kaf co talamu, 6nam lisi baptisma hay niy-lumna Yordan, hay li ma nisi ham sulukŋa visi goy hamna.

7May hay li ma nam wi sa Farisena hiɗi sa Sadusena ŋolo ma talamu kay fi baptisma, nam di tisiya: Nigi jafna vi guyna, sa ma hatgi kay pir kay ɦiyda ta min maat ɗawni mi gige? 8Kay na'ta, ligi lopna ma ŋray hiɗi hamda, 9vargi hay dikgi ala bugiya mi Abraham, vargi naɗi, kay nan fi digi ala, Lawna as yaw kuɗ goorhoyon lakŋi kay muɗum goy guro'o mi Abraham. 10Wulini ceɗna buri gaa zok guna, kay na'ta gu ma vuɗ vuɗ ma ŋaanɗina ma kaamis goyo, gumis hay kuta kaw. 11Nanu, nan ligi baptisma hiɗi niyna kay hamda, may nam ma co bugolan nan ɗawni, nam dono suwan nanu, tuguruna valam kaw nan may nagay kay ziyim noŋɗi. Nam ma ligi baptisma hiɗi Ŋusta-Peldetta, hiɗi kuta kaw. 12Dutta-siira valamu ka hay ɓalamu, nam ma tor muɗakŋa valam goyo, alkamarena nam ma kom hay feera, may burana nam ma ŋalam goyo hiɗi kuta tewɗita.

Baptisma vi Yesu

Mark 1:9-11; Luk 3:21-22; Yoh 1:32-34

13Hay na'ta Yesu may hay Galileya pa, nam co tam Yohana kel niy-lumna Yordan, kay Yohana ma lum baptisma. 14May Yohana ci way hiɗi nam ŋolo ala: ŋaata naŋ lan nan baptisma, may naŋ co tanu kay nan ma laŋ baptisma kayn litige? 15Yesu hotom dita: Hinaŋ slen li nala wulini, kay nay ma li slen pet hay liyam ɗigere. Kay na'ta Yohana li Yesu baptisma. 16May hay li ma Yesu fi baptisma fina, hay li ma nam jikay goy hay niyn pa jikŋa, wulini wulini wuralawna mal goy kalamu, nam wi Ŋusta vi Lawna siray gaa kalamu ki gukka nala. 17Ɗuw na kayni, del may goy wuralawn pa ka di ala: Zawni mi goora vanu ma hayan kamna, ma kiran ŋaa'a ŋolo.

Currently Selected:

MATEWUS 3: Massana

Highlight

Copy