MATEWUS 25

Law ma nir niramna kay guro-boy sa doogona

1Kay na'ta mulda-wuralawna ma ŋra ca hiɗi guro-boy sa doogona sa yaw fitilla visiya kay tuɗ ŋar ir juf-cata. 2May sa vaslna jarsi ɦay-ɦaya, sa vaslna yali may. 3Sa ɦay-ɦayna yaw fitilla visiya, may gar mul kisiɗi. 4May sa yalla yaw mul kisi hay bidoŋŋa, tapam hiɗi fitilla. 5May hay li ma juf-cata may co gosoyɗi, nisi kaf senda visiya, nisi cuki sene. 6May hay henje daŋalta, siwelda ka siwel ala: Humgiya: juf-cata ka ma'a, tuɗgi kay ŋafam iramu. 7Kay na'ta guro-boyn kaf zliy kulo'o, kot fitilla visiya. 8May sa ɦay-ɦayna di tam sa yalla: Nigi vulma mul vulge, kay fitilla vuma teway goyo. 9May sa yalla di tam sa ɦay-ɦayna: Naɗi, kay nam as kuma'a hiɗi kigiya kafɗi, tuɗgi tam sa gusna kay gus kay tuwgiya. 10May hay li ma nisi kalay goy gus mulla, juf-cata co'o, nisi sa tuwsi kotina cuk kalaf hiɗi namu hay yuldeta vi dabayna, nisi duk vun-ziyn kulo kisiya may. 11Bugolda guro-boy segen co'o, nisi di'e: Bum-Sumuna! Bum-Sumuna! Malaŋ goy kuma'a malge. 12May nam hot dita disiya: Nan digi gasita, nan wigiɗi. 13Kay na'ta lakgi jigere, kay nigi wi fattaɗi, wi leeraɗi kaw.

Law ma nir-niramna vi talentena

Luk 19:12-27

14Kayni ki sa ma min kal hay rogoyo, nam yi sa sunda valamu, vulsi slena valam hay ɓisiya nala. 15Nam vul talente vasl mi ma kepna, talente ma' mi hena, talente kep mi ma ɦidina, nam vul mi gigekaw kuɗ donota valamu valamu. Bugol kayni nam kalay hay rogoyta valamu. 16Wulini wulini, sa ma fi talente vaslna kaliya, nam dokom yalamu, nam fi talente mara talam vasl lo. 17Nam ma fi talente ma'na li nala kaw, nam dokom yalamu, nam fi mara talam ma' lo. 18May nam ma fi talente kepna kalay goyo, vurok zulla, nam ŋay gurjuta vi bum-ziyna gaa'a hay nagata.

19Mus bugolda ŋol neeɗa kayni bum-ziyna maawa, nam yisiya kay nisi dum kay sle ma nisi lumna. 20Sa ma fi talente vaslna ma'a, nam fi talente mara talam vasl. Nam di'e: bum-ziyna, ɗuwaŋ tige, naŋ vulan talente vasl, nan dokom yalamu, fi mara talam vasl. 21Bum-ziyna valam dumu: Ŋaa'a, naŋ sa ma sunda ma ŋaana, ma gasina, naŋ li ŋaa'a tam sle ma kiɗayna, may nan min musaŋ kay sle ma ŋolla, tuɗan kalafi hay firita vi bum-ziyna vaŋu. 22Nam ma fi talente ma'na kaw maawa di'e: Bum-ziyna, ɗuwaŋ tige, naŋ vulan talente ma'ɗi su? Nan dokom yalamu, fi mara talam ma' lo. 23Bum-ziyna valam dumu: Ŋaa'a, naŋ sa ma sunda ma ŋaana, ma gasina, naŋ li ŋaa'a tam sle ma kiɗayna, may nan min musaŋ kay sle ma ŋolla. Tuɗaŋ kalafi hay firita vi bum-ziyna vaŋu. 24Nam ma fi talente kepn kaw maawa di'e: Bum-ziyna, nan wi ala naŋ mi sa ma hirliŋi, naŋ feɗ hay liy ma naŋ cuk jaf hayamɗina, naŋ tok slena hay liy ma naŋ was hayamɗina, 25Kay na'ta nan li nari, nan kalay goyo, ŋay talentena vaŋ gaa'a jar nagata, wulini nam yawni. 26May bum-ziyna hot ditiya dumu: Naŋ sa ma sunda ma joona ma zulomda, naŋ wi ala nan feɗ hay liyn ma nan cuk jaf hayamɗina, naŋ tok slena hay liyn ma naŋ was hayamɗina kaw; 27kay na'ta la litigekaw naŋ vul gurjuta van goy mi sa ni gurjuta, kay hay li ma nan hotay ɗawni, nan ma fi gurjuta van hiɗi niya' kuɗa'a. 28Nala yawgi talente ma kalamna goyo, vulum mi nam ma fi talente doogona. 29Kay na'ta gigekaw ma falam kaana, ma vulum mara talam lo, nam ma as ŋolo hiɗi namu. May sa ma falam mayɗina, va ma ka kalamna ma slumis goyo may. 30Sa ma sunda ma as li va ma ŋaaɗina nigi ma gum goy jiy hay jufunda, hay liyna ma tiyna hiɗi mut-siyna ka hayna.

Kitata vi jaf-sumuna

31May hay li ma goora vi sana ma ma'a hay gajijita valamu hiɗi sa sunda-wuralawna valamu kuɗum ɗawni, nam ma mus kay zlamda-kitata vi gajijita valamu, 32jaf-sumun kaf ma dak vokomu, nam ma kaasi irsiya ki sa ma ŋomda ka ir fok-dimina hiɗi fok-meena nala. 33Nam ma lak fok-dimin hay galam ma jufna, fok-meen hay galam ma gulla may. 34Hay na'ta mulla ma di tam sa galam ma jufna: Nigiyay tani, nigi sa bolda vi bun ka kigina, vigi mulda ta koti kigi voco'o, hay li ma caw nagata bay tuni pa. 35Kay mayt canu, nigi vulan va ma ti'e, laat lanu, nigi vulan va ma ci'e, nan ay sa ma pulu, may nigi tapan jargiya; 36nan ay goy nala'a, may nigi cukan sligar tanu; nan ay moyo, may nigi co ɗuwanu; nan ay daŋgaya, may nigi co tanu. 37Hay na'ta sa ɗigera ma hot dit talam ala: Bum-Sumuna, numa waŋ hay mayta vulaŋ va ma ti'e lancitige? Lebo hay laata vulaŋ va ma ci'e lancitige? 38Numa waŋ goy pulu tapaŋ naŋ jarma'a lancitige? Lebo goy nala'a, vulaŋ sligara lancitige? 39Numa waŋ moyo lebo daŋgaya kaw, tuɗis ɗuwaŋu lancitige? 40Mulla ma hotsi dita ala: Nan digi gasita, hay li ma nigi li va tam kep jar sa ɓosiyon sa gurayn lakŋi, va namna nigi lum kayn tan nanu.

41Bugolda nam ma di tam nisi sa hay galam ma gulla: Tuɗgis goyo hinanu, nigi sa beɗay-goyna, tuɗgis hay kuta tewɗita ta koti kay Matna hiɗi sa sunda valamu. 42Kay mayt canu, nigi vulan va ma tiɗi, kay laat lanu, nigi vulan va ma ciɗi; 43Nan ay sa ma pulu, may nigi min tapan jargiɗi; nan ay goy nala'a, may nigi min vulan sligarɗi; nan ay moyo, hay daŋgayn kaw, may nigi co ɗuwanɗi. 44Hay na'ta nisi kaw ma hot dit talam ala: Bum-sumuna, numa waŋ naŋ hay mayta lebo, laata lebo, pulta lebo, nalata lebo moyna lebo, daŋgayna lebo, numa sunaŋɗi kayn lancitige? 45Hay na'ta nam ma hot dit tisi ala: Nan digi gasita, hay li ma nigi li va tam ɓosiyon sa gurayn lakŋɗi, nigi lumɗi kayn tan nan kaw. 46Nisiya ma tuɗ hay kuta ta vatɗita, may sa ɗigera ma tuɗ hay irita vatɗita.

Currently Selected:

MATEWUS 25: Massana

Highlight

Copy