MATEWUS 20

Law ma nir-niramna tam sa yaway hay lopna

1Mulda-wuralawna na' ŋray ca hiɗi bum-ziyna ma kal goy grawt culum culum kay gar sa lopna hay sine gulda-guldana valamu. 2Hay li ma vunam ŋra hiɗi sumuna kay gurju kep kepe kay busa hay lopna, nam cuksi hay sine gulda-guldana valamu. 3Nam kal goy lo hay leer ma ɦidina bugolda, nam wi sum segen hay liyn lak', lop ma nisi lum mayɗi, 4nam ka disi ala: Tuɗgi hay sine gulda-guldana vanu, nan ma vulgi va ma hay liyamna. 5Nisi kalay may. Nam kalay goyo hay leer ma karkiya bugoldan lo, hay leer ma zleeŋen lo, nam li ŋray ca ki jew nala. 6Nam kalay goy hay leer ma doogo yam kepna lo, nam fi segen lakay ɦawa lak', nam ka disi ala: Nigi busa tan ɦawa he' kayn kay mige? 7Nisi dumu: Kay sa may yuma kay lopɗi. Nam disiya: Nigi kaw tuɗgi hay sine gulda-guldana vanu.

8May hay li ma vulatita laawa, bum sine gulda-guldana di tam sa ma ŋom lopna ala: Yaŋ sa lopnay goyo, vulsi wurakŋa visiya, naŋ ma tun wurakŋa tam sa co bugolla, ta-ta vatam goy tam sa co jewna. 9Wulini sa yawsi hay lopna hay leer ma doogo yam kepna coowa, nisi fi gurju kep kepe. 10Hay li ma sa jewna co'o, nisi var ala nisi ɗawn ma fi suwa, may nisi kaw fi gurju kep kep. 11Hay li ma nisi ka yaw gurjuta, nisi ka ŋurnay tam bum-ziyna, 12nisi di ala: Sum sa co bugolla lakŋi nisi li leer hay lopn kep ɦawa, nam ŋrasi hiɗi numa sa busa hay lopn he' hay hiɓiyna hiɗi makka kayni kay mige? 13Nam hot dita tam san kep jarsi ala: Bananna, nan may laŋ va ma jooɗi, nay ŋra vunay jar-tuway kayn kay gurju kepɗi su? 14Vaŋ gurjuta vaŋu tuɗaŋu, may sa ma co bugolla zawni nan min vulum ŋray ca ki nan vul maŋ nala kaw. 15Va ma nan min lum hiɗi farayna vanu hagat may kan kay lum ɗisu? Naŋ li hunay kay ŋaata ta nan la'ta kay mige? 16Nala kaw sa cawna ma muɗ si sa jewna, sa jewna ma muɗ si sa cawna may.

Yesu di goy kay mitta hiɗi dayta-kulota valamu

Mark 10:32-34; Luk 18:31-34

17Hay li ma Yesu ka tuɗ kulo hay Yerusalem, hay hagata nam yaw sa doogo yam ma'n goy ŋayaya, ka disi ala: 18Humgiya, nay ma tuɗay kulo hay Yerusalem, goora vi sana ma vulis goy hay ɓam muliyan ŋulo sa-ɗifinna hiɗi sa wi-ɗota. Nisi ma ka kitat kalamu kay cum goyo, 19nisi ma vulum goy hay ɓam sa waana kay nisi ma ŋulumu, watamu, ɓalam kat gu-ma-grakŋa kaw, may hay buurta ɦidita nam ma day kulo'o.

Jobta vi gurona vi Sebedew

Mark 10:35-45; Luk 22:24-47

20Hay na'ta sum gurona vi Sebedew tuɗ tam Yesu hiɗi gurona va'a, na'a girif gaa vokomu, kay siɗawam kay va'a. 21Nam joba' ala: Nak min mige? Na' hotom dita: Naŋ ma vul hagat kay gurona van lakŋi ma lak galaŋ hay mulda vaŋu; kep hay galaŋ ma jufna, kep hay galaŋ ma gulla may. 22Yesu hot dita: Nigi wi va ma nigi siɗaw kalamnaɗi, kaway-ma-cina ma nan min cumna nigi asay kay cum su? Nisi dumu: Numa as cumu. 23Nam disiya: kaway-ma-cina vanu nigi as kay cum gasi, may kay mus galan ma jufna lebo galan ma gulla kayni, vulum mi san mi nanɗi, may bunu as vul kayni mi sa mulda koti kisina.

24Hay li ma sa doogona hum kayni, diksi ɓulak tam ɓosiyom-tuwsi sa ma'na. 25Yesu yisi talamu, nam disiya: Nigi wi ala muliyana vi nagata curoɗ sumuna, sum sa ŋulona li sumun dono'o kuɗ ŋolda visiya kaw. 26May nigi ma li ki kayn nala jar-tuwgiɗi, may sa ma ŋolla jargiya ma muɗ tuwam goy ma sunda vigiya, 27sa ma min muɗ goy ma jewna jargiya, nam ma muɗ mi ma sungina kaw. 28Ki kayn nala kaw, goora vi sana ma kayni kay sa sunumɗi, may kay nam kay tuwamu sun sumuna, vul irita valam goyo kaw kay muɗ sumun ŋolo.

Sa dukina hay Yeriko

Mark 10:42-45; Luk 18:35-43

29Hay li ma nisi kalay goy hay Yeriko pa, sumun ŋolo tuɗ kuɗumu. 30Sum sa dukin ma' ka lakay hay gal hagat lak, nisi hum ala Yesu ka capa, nisi ka siwel ala: Laŋ slugot kuma'a, Bum-Sumuna, goora vi David. 31Sumun tun caw lawsiya kay nisi ma ziŋa. May nisi siwel ŋol suwa di'e: Bum-Sumuna, laŋ slugot kuma'a lige, naŋ goora vi David. 32Yesu cola, nam ka yisiya, nam jobsi ala: Nigi min ala nan ma lum tigin mi mige? 33Nisi dumu: Bum-Sumuna, numa min kay irma'a ma mal goyo. 34Wulini nisi muɗ kir Yesu haw ŋolo, nam tun ɓalam kirsiya, wulini wulini, irsi mal goyo, nisi tap kuɗumu may.

Currently Selected:

MATEWUS 20: Massana

Highlight

Copy