MATEWUS 2

Sa wi yalla co hay Betlehem. Herod

1Hay li ma Yesu vuɗi hay Betlehem hay Yudiya hay buura vi mulla Herod kayni, sa wi yalla sa hay nagat ta gal kuɗuwta ma hay Yerusalem, 2Nisi di'e: Mulla vi Yudiyana ma vuɗi wulina ka arige? Kay numa'a wi mislekka valam ay hay gal kuɗuw pa, numa co kayni kay girifimu. 3Hay li ma Herod hum kayni, dikam ɓirim jitit', sum sa hay Yerusalem kaf li nala kaw. 4Nam tok muliyan ŋulo sa-ɗifinna kaf, hiɗi sa wi-ɗota jar sumuna, nam jobsi ala liyn ma Yesu ma vuɗ hayna ka arige? 5Nisi dumu: Hay Betlehem hay Yuda; kay sa jobta-Lawna ɗoy ala:

6Naku, Betlehem hay nagata vi Yuda,

Nak may ti ta goota jar nagana vi Yuda noŋɗi,

Kay goy hay nak pa mul kep ma kalay goyo,

Nam ma muɗ mi ma ŋomda vi sumuna vanu sa Israyella.#2:6 Fi kayni hay Mik 5:1.

7Bugol kayni Herod yi sa wi yalla goy talam ŋayaya, nam jobsi goy haraŋ ala nisi wi mislekŋa kayni lancitige? 8Nam gisi irsi hay Betlehem, disi ala tuɗgiya, jobgi labar ŋaa'a kay goora, hay li ma nigi fumawa, nigi ma danu kay nan kaw min tuɗis girifimu.

9Hay li ma nisi hum dita vi mulla humna, nisi cuk goyo. Ɗuw na kayni, mislekka ta nisi wa' hay gal kuɗuw pata tun voksiya, ta-ta na' co'o, col kulo hay liyn ma goor buri hayna. 10Hay li ma nisi wi mislekka, haysi li firi ŋolo. 11Nisi cuk kalafi hay ziyda, irsi cuk kay goora hiɗi sulumu Mariya, nisi guɗof gaa'a girifimu, nisi but slena visi ma ŋaana goyo, nisi vulum ora, urdi ma his fayna hiɗi urdi ma yum miir.

12Bugolda Bum-Sumuna ɗeksi hay duwayta ala nisi ma hot tam Herod loɗi, nisi sli hagata tara'a, hot hay nagata visiya may.

13May hay li ma sa wi yalla kalawa kayni, sunda-wuralawna vi Bum-Sumuna vul tuwam kir Yosef hay duwayta, ka ɗekem ala: Fokaŋ kulo'o, yaw goora hiɗi sulum kuɗaŋu, pirgi hay Egipte, kay Herod min ci goor goyo. Naŋ ma mus ɗawni ta-ta nan ma daŋu. 14Nam fokay kulo'o, yaw goora hiɗi sulum kuɗumu, kalay hay Egipte. 15Nam musi ɗawni ta-ta hay mitta vi Herod, kay hob vun va ma Bum-Sumuna dum hay vun sa ma jobta ala:

Goy hay Egipte pa nan yi goora van goyo.#2:15 Ɗuw hay Hos 11:1.

16Hay li ma Herod wi ala sa wi yalla ɗutum ɗutiya, nam muɗ ɦiy ŋolo, nam cuk sojena kay ci guro sa jufayna kaf hay Betlehem goyo, hiɗi naga ma ŋuyi ta'na kaf kaw, nisi sa liy busat ma' hiɗi sa bay li busat ma' kaw, ŋray dig liyn ma sa wi yalla di talamna. 17Kayni kay hob vun dita vi Yeremiyas ma jobta ta di ala:

18Sumun ka hum winekŋa goy hay Rama pa,

tiyna hiɗi yorta ka ŋolo,

Rakel ka tiy kay gurona va'a,

Na' min kay teŋ ira'ɗi, kay nisi say loɗi.#2:18 Fi kayni hay Yer 31:15.

19May hay li ma Herod mitawa kayni, sunda-wuralawna vi Bum-Sumuna vul tuwam kir Yosef hay duwayta hay Egipte pa, 20ka dum ala: Fokaŋ kulo'o, yawaŋ goora hiɗi sulum kuɗaŋu, hotaŋ hay nagata vi Israyel, kay nisi sa gar a ci goor goyna mitawa. 21Nam fokay kulo'o, yaw goora hiɗi sulum kuɗumu, hotay hay nagata vi Israyel. 22Hay li ma nam hum ala Arkelawus musi mul hay Yudiya hay baŋal bulum Herod, nam li nari kay tuɗ hay nagat Yudiya, may hay li ma Ŋusta dum hay duwayt din kayni, nam kalay hay nagat Galileya. 23Nam co'o, mus ziy hay hoyok-ziyn Nasaret, kay slen ma sa jobta dumna vunam ma hoba, ala:

Nisi ma yum ala sa ma Nasaretna.

Currently Selected:

MATEWUS 2: Massana

Highlight

Copy