MATEWUS 12

Yam-wana hiɗi sabatna, sa ma ɓalam keŋkeleŋŋa

Mark 2:23-28; 3:1-6; Luk 6:1-11

1Hay li namna Yesu jik hay sinena vi alkamarena hay buura vi sabatna. Sa hatayna valamu mayt tun caw cisiya, nisi kus yam wana kay mutumu. 2Hay li ma sa Farisen wi kayni, nisi dumu: Saraŋ sa hatayna vaŋ tige, va ma telay kay lum hay buura vi sabatnɗina nisi lumu. 3May nam disiya: Nigi bay ɗuw hay ɗota kay va ma David lumna su? Hay li ma mayt tun caw cumu, nam hiɗi sa kuɗumna kaw, 4nisi cuk kalaf hay ziyda vi Lawna, nisi ti fun ma zlaray kay tuwamna, ma vun-ma-gatna telem ala sa mara tumɗi, may tum si muliyan-sa-ɗifinna tuta! 5Lebo nigi bay jaŋ hay gatta tuwa su? 6Ala hay buura vi sabatna, muliyan-sa-ɗifinna li lop hay Tempella, may law may tun kisiɗi. May nan digi ala ma ŋol ma suw Tempella ka tani. 7Dita ta ala: Slugota kiran ŋaa'a suw ɗifinna, dita na'ta zawni nigi huma' cawa'a, sa ma may li va ma jooɗina nigi ka kitat kalamɗi. 8Kay goora vi sana mi mul sabatna.

9Nam fokis ɗawn pa kal hay sinagogayna visiya, 10Sa ma ɓalam keŋkeleŋŋa ay musi hay liy namna dam'. Nisi jobomu: Hagat ka kay yer san goyo hay buura vi sabatna su? Kayni kay nisi min a pi lawt kalamu. 11May nam disiya: Jargi tani, la san ka hiɗi ɦu-dimit kep tuta, may la na' nigawa gaa hay zulla hay buura vi sabatna ni, nam as sla' kulo hay na'ta ɗisu? 12Sana nam ŋol suw ɦu-dimita ɗisu? La nala vun-ma-gatna hin sana li ŋaata hay buura vi sabatna. 13Hay na'ta nam di tam sana: Meɗaŋ ɓaŋ goyo, nam meɗa' goyo, na' muɗi goy ŋaa'a ki heta nala. 14May sa Farisena cuk goy jiya, nisi ŋra vun-tuwsi kalamu kay nisi fi bam iram goyo.

15Hay li ma Yesu wi kayni, nam kalay goy hay liy mara'a. Sumuna ŋolo tuɗ kuɗumu, nam muɗsi goy ŋaa'a kafe. 16Nam gatsiya kay nisi ma di goy kalamu tam sumunɗi. 17Kay va ma diy hiɗi vun Esaya sa ma jobta-Lawna vunam ma hob goyo, ma di ala:

18Sa ma sunda vanu ma nan vilekemna zawni,

Dukanna ma ciwta vanu daramu,

nan ma cuk Ŋusta van kalamu,

nam ma ɗek goy kay gasita tam jaf-sumuna,

19Nam ma ci wayɗi, ma siwel kuloɗi kaw,

a as humum delem goy hay haganɗi.

20Cerew ma hormosi gaana nam ma kusum goyɗi,

fitil ma ŋal kiɗayna nam ma tewem goy helmesɗi,

ta-ta nam ma vul kolda mi gasita.

21Jaf-sumuna ma vi hay semda valamu.#12:21 fi kayni hay Es 42:1-4.

Sa ma ful kalamna ma dukiya, gidiŋi kaw

Mark 3:20-27; Luk 11:14-23

22Bugol kayni nisi mar tam Yesu sa ma ful kalamna, dukiya, gidiŋi kaw, Yesu muɗum goy ŋaa'a ta-ta san muɗ lawa, muɗ wi'e kaw. 23Sumun kaf muɗ ɦuyum', nisi di'e: Zawni may mi goora vi David ɗisu? 24May hay li ma sa Farisena hum kayni, nisi di'e: San zawni digiɗ fuliyan goy kayni may hiɗi va maraɗi, may hiɗi Beelzebul mulla vi fuliyan joona. 25May hay li ma Yesu wi varta visiya, nam disiya: La mulda tarige kaw dur jar-tuwa'a, na' ɓulaka; la ziyn lebo hoyok-ziyn marige kaw dur jar-tuwamu, nam fi musɗi. 26La Satan digiɗ Satan goyo, kayn di ala nam ka dur jar-tuwamu, nala mulda valam fi mus nanige? 27La nan digiɗ fuliyan joon kayn hiɗi Beelzebul, gurona vigi digiɗsi goy kayn hiɗi mige? Kay na'ta nisi ma ka kitat kigiya. 28May la nan digiɗ fuliyan ma joon goy kayni hiɗi Ŋusta, hay na'ta mulda-Lawna maawa tigiya.

29Lebo san as kal vo hay ziyna vi sa ma donona kay vurum slena valamu, bay junum goy jew kayn nam as su? Nam junum jew jun tuwa bugolda nam as vurum slena valamu. 30Sa ma may tap hiɗi nanɗi, nam gaw kanu, sa ma tok slena valam kulo'o hiɗi nanɗi, nam merem meri goyo.

Sulukŋa ma tam Ŋusta-Peldetta

Mark 3:28-30; Luk 12:10

31Kay na'ta nan digiya: Sumuna ma fi gida kay sulukŋa visiya hiɗi ŋulda visi kaf, may ŋulda tam Ŋusta nisi ma fi gid ka'ɗi.#12:31 1 Yoh 5:16. 32La san law joo'o tam goora vi sana, nam ma fi gida kay kayni. May la san law joo'o kay Ŋusta-Peldetta, nam ma fi gida hay liyn ma nay ka hayam wulinnaɗi, nam ma fi gida hay liyn ma vokŋaɗi kaw.

33Kay la gun ŋaa'a, vuɗna valamu ŋaa'a kaw; may la gun joo'o, vuɗna valamu joo'o kaw. Kay san wi gun kayni kuɗ vuɗna valamu. 34Nigi jafna vi guy-makayna, nigi joo'o, may nigi as di sle ma ŋaan ɗawn ir nanige? Kay vunna dum goy mi sle ma dikga hobay hiɗi namna. 35Sa ma ŋaana yaw sle ma ŋaana ay goy hay birimna valam ma ŋaana pa, sa ma joona yaw sle ma joona ay goy hay birimna valam ma joona pa kaw. 36May nan digiya: Yoboyn ma waana pet ma sumun dumna kayni ma jobis kisiya hay buura vi kitata. 37Kay butaŋ goy hay vun kitat ɗawni mi yoboyna vi vunaŋu, tun kitat kaŋ ɗawni mi yoboyna vi vunaŋu kaw.

Nisi job ɗekka, may Yesu minɗi

Luk 11:24-32

38Hay na'ta sara'a jar sa wi-ɗota hiɗi sa Farisena ka di talam ala: Bum-yalla, numa'a min ala naŋ ma li ɗekka kirma'a. 39Nam hotsi dita: Jaf sa joona sa zlata-bulona gar ɗekka, may ɗek tara'a ta vulis tisi suw Yonas ma jobta-Lawna tayɗi. 40Kay ki Yonas li buur ɦidi goloŋ hay kuluf ŋolla, nala kaw goora vi sana ma li buur ɦidi gaa kuɗ nagata. 41Sum sa hay Ninive ma yaw kulo'o hay buura vi kitata kat sum sa hay zamanna visiya, nisi ma ka kitat kisiya, hay nisi ham kuɗ yoboyna ma Yonas kusumna. Ɗuwgiya, ma ŋol ma suw Yonas ka tani. 42Ca-mulda ta kayamta ma fok kulo'o hay fatta kitata kat sum sa hay zamanna va'a, ka kitat kisiya kaw kay na'a may hay vun dabaŋ-gu'ta vi nagata pa kay hum yalla vi Salomon; ɗuwgiya, ma ŋol ma suw Salomon ka tani.

43May ful ma liwisna, hay li ma nam kalawa goy hay sana, nam raw hay liyn ma karaŋŋa, gar tun-sukka, may nam fa'ɗi. 44Hay na'ta nam di'e: Nan min hot hay ziyna vanu ma nan kalay goy hayam pana; hay li ma nam hotawa haya, nam fum goy hini ɦawa'a, fum goy toriya, kotiya kaw. 45Hay na'ta nam tuɗ goyo, yaw fuliyan ma joo suwum namna siɗiya lo kuɗumu, nam cuk kulo hay ziyda, lak haya'a kaw, san kayni makka ta nam fa'ta ɗawni suw ta jewta. Jaf-sum nisi sa joon kayni, van ma li tisi ɗawn nala kaw.

Sum Yesu hiɗi ɓosiyomna

Mark 3:31-35; Luk 8:19-21

46Hay li ma nam ka kus yoboyna tam sumun tuwa, ɗuw na kayni, sulumu hiɗi ɓosiyomna ka goy jiy lak', nisi ka gar kay law hiɗi namu. 47Sa kep dumu: Humaŋu, suŋu hiɗi ɓosiyoŋŋa ka goy jiy lak', nisi gar a law hiɗi naŋu. 48May nam hot dit tam sa ma dumna ala: Sunu ti gige? Ɓosiyonna si gige? 49Bugolda nam meɗ ɓalam goyo kay sa hatayna valamu di'e: Ɗuwgiya, lakŋi si sunu hiɗi ɓosiyonna. 50Kay gigekaw ma li minda vi bunu ma hay wuralawna, namu mi ɓasun nanna hiɗi ɓasun nanda hiɗi sun nanu.

Currently Selected:

MATEWUS 12: Massana

Highlight

Copy