YOSUWA 20

Hoyok-ziyn karkiya ma ŋay hayna

1Ma-Vatɗina di tam Yosuwa ala: 2Naŋ ma di tam sum sa Israyella ala: Hoyok-ziy ma ŋayna, ma nan digi kalamu hay vun Mususna, nigi ma lakam goyo. 3la sa ci matawa bay minda valamu, bay var jewe, nam as pir goy hay hoyok-ziy namna. Sa ma ci-matna as pir goy hay hoyok-ziy namna kay ŋay kay sa job yam busuwna. 4Sa ma ci-matna ma pir hay hoyok-ziy mara kepe, nam ma col goy hay vun-galana vi hoyok-ziyna, nam ma vi sem lawta valam goyo tam sa maariyana vi hoyok-ziyna, nisi ma vumis kalaf katsiya hay hoyok-ziyna, ma vulum liyn ma musta jarsiya, 5la sa ma job yam busuwn jaŋ kuɗumu, nisi ma vul sa ma ci-matna goy hay ɓalamɗi, kay nam ci sugolomna kayni ɓalam vum viya, kay nam may hiɗi nam gaw jewɗi. 6Nam ma mus hay hoyok-ziyn namna ta-ta nam cub kitata valamu ta nisi ma' ka'ta, ta-ta hay mitta vi mul-ma-ɗifinna ma ka li lop hay na'ta. Hay li namna, sa ma ci-matna ma hota, kal hay hoyok-ziyna valamu, hay ziyna valamu, hay hoyok-ziyna ma nam piris goy hayam pana.

7Nisi vilek Kedes hay Galileya, hay hiɗiyta vi Neftali; Sikem, hay hiɗiyta vi Efrayim; hiɗi Kiryat-Arba, ta ya' ala Hebron, hay hiɗiyta vi Yuda. 8Hay gal hena vi Yordan, hay gal kuɗuwu vi Yeriko, nisi vilek Betser, hay fulda, gaa hay beɗna, hay jafna vi Ruben; Ramot hay Galaad, hay jafna vi Gad; hiɗi Golan hay Basan, hay jafna vi Manase. 9Kayni mi hoyok-ziyna ma nisi vulum mi sa Israyella kaf hiɗi sum sa pulla sa ka li ziy jarsiya, kay la sa ci matawa bay minda valamu, nam ma pir hay hoyok-ziy namna lakŋi, kay sa ma job yam balla ma cum goy jew a nam co vun kitatɗi.

Currently Selected:

YOSUWA 20: Massana

Highlight

Copy