CAWA'TA TUNITA 26

Isaak hay nagata vi Filistina

1Mayta li hay nagata. May ti mayta ta li hay liyna vi Abrahamtaɗi; Isaak kalay tam Abimelek mulla vi Filistina hay Gerar. 2Ma-Vatɗin vul tuwam kiramu dumu: naŋ ma kal hay Egipteɗi, naŋ ma mus hay nagat ta nan min ɗekaŋ ka'ta. 3Naŋ ma mus hay nagat na'ta tani, nan ka hiɗi naŋu, nan ma gaŋ bol lay, kay liyn kayni nan min vulum maŋu hiɗi jafna vaŋ kaf. Nan ma hob vun va ma nan yum kan tam buŋ Abrahamna. 4Nan ma biyaŋ jafna vaŋu ki mislek ma dukalawn nala; liyn kayn kaf nan ma vulum maŋ naŋu hiɗi jafna vaŋ kaf. Jaf-sumun hay nagat noŋ kaf fi bolda ɗawn kuɗ jafna vaŋu. 5Kay Abraham human vunanu: Dita vanu, vun-ma-gatna vanu, sle ma nan colomna hiɗi gatta van kaf nam li kuɗa'a. 6Nala Isaak mus hay Gerar.

7Hay li ma sum sa hay hoyok-ziyn ka job kay cata valamu, nam ka hotsi dit ala ti ɓasulumta. Kay nam ka li nari, kay la nam daawa ala na' ti cata valamu, sum sa hay hoyok-ziyn ɗawn ma cum goyo kla, kay Rebekka na' ira' kulo tuni jifiy ŋolo. 8Kay musta valamu hay liyn kayni ka ɦur voka' dok-dok, fat tara kep Abimelek ɗuw hay ir-ziyda, nam wi kayni Isaak ka liw hiɗi cata valam Rebekka waŋ'. 9Abimelek yi Isaak aya, nam dumu: Na' ti cata vaŋ gasi, may naŋ di ala na' ti ɓasuŋga kay mige? Isaak di'e: Nan di nala kayni hiɗi varta ta ala nan ma fi mitta kuɗa' klasige. 10Abimelek di'e: Hini ne' ɦawa a sa jarma'a bur hiɗi cata vaŋu, goboy a naŋ marma joot kuma'a ɗisu? 11Abimelek vul dit kayni goy tam sumun kaf ala: La sa tun ɓalamawa tam san kayni lebo tam cata valamu, nam ma fi cita-goyta.

Bonota jar Isaak juni hiɗi Abimelek

12Isaak cuk jafna hay nagat na'ta, wan ma nam feɗem hay busat na'tana nam yaw sem kis suwa, kay Ma-Vatɗina gi bol kalamu. 13Nam muɗ faraya, farayna valam wul vokomu vokomu, ta-ta nam muɗ faray dono ŋolo. 14Farana vi faray gurayn ka lay, farana vi faray ŋulon ka lay, sum sa sunumna ŋol lay. Nala sum sa Filistina tun caw lum suluku.

15Kaara ma sa sunda vi bulum Abraham comisna nisi tosomu, hobom hiɗi nagan kafe. 16Abimelek di tam Isaak, vaŋ tuwaŋ goy hay nagata vuma'a, kay naŋ muɗi dono suwma'a. 17Isaak kaliya, nam musi hay boŋoloŋŋa vi Gerar. 18Kaara ma nisi jugoɗomis hay liyna vi bulum Abraham, ma sum sa Filistin tosom goy bugol mitta vi bulumna, nam hot yawam kulo'o, nam hot yi kaar namna hiɗi semda ma bulum tunumisna. 19Sa sunda vi Isaak jugoɗ kaata tara'a hay boŋoloŋŋa lo, kaata niya' riŋ goyo. 20Sum sa ŋom fokŋa hay Gerar tun caw nef sa fi Isaakŋa. Nisi di'e: Niyn vuma'a. Kaat na'ta nisi tuna' se' ala Esek, kay nisi nef tuwsi hiɗi namu. 21Sa sunda valamu co kaat tara'a lo, nisi nefsi kuɗa' lo, nam tuna' se' ala Sitna. 22Nam vi tuwam goy hay liy namna, co kaat tara'a lo, kaat na'ta nisi nefem kuɗa' loɗi, nam tuna' se' ala Rehobot, kay nam di'e: Wulin kayn Ma-Vatɗin hinay liynawa hiriŋ-hiriŋ' yo, nay ma li faray ŋolo hay nagat tani.

23Nam fokis ɗawni kalay Ber-Seba. 24Ma-Vatɗin vul tuwam kiram hay henjeta dumu: Nanu mi Lawna vi buŋu Abraham, tuwaŋ li narɗi, kay nan ka hiɗi naŋu; nan ma gaŋ bolo, nan ma biyaŋ jafaŋ ŋolo, kuɗ sa ma sunda van Abraham. 25Nam in giwin-ma-ɗifinna, yi semda vi Ma-Vatɗina, pi guɗukŋ kulo'o, sa sunda vi Isaak jugo' kaar hay liy namna.

26Abimelek coy talamu hay Gerar pa, banamna Ahuzat ka kuɗumu, Pikol ma ŋolla vi sojena valam ka kuɗum kaw. 27Isaak di tisiya: Nigi co kuɗan kay mige? Nigi lakŋi si sum sa kaan gawi, sa digiɗanay goy hay nagata vigi panɗi su? 28Nisi hot dita: Numa waawa ala Lawn ka hiɗi naŋu. Kuɗ kayni numa di ala nay ma yi va kaya jar-tuwaya, numa min ala nay ma junay bonota. 29Naŋ ma yi va kaŋ ala naŋ as luma va ma jooɗi, numa kaw may laŋ va ma jooɗi, numa hinaŋ kalay goy kayn hiɗi sle'ta. Wulin kayn naŋ ma sa ma bolda vi Ma-Vatɗin ka kaŋu. 30Nam kotsi tina, nisi ti'e ci'e kaw. 31Nisi yaw kulo graw culum culum, nisi yi slen kisiya, jun bonot jar-tuwsiya. Isaak hinsi kala, nisi kalay kayn jarsi toyaya.

32Hay buurta na'ta sa sunda vi Isaak maram labara kay kaata ta nisi jugoɗa'ta. Nisi dum ala na' coy niyo. 33Nam tun sem kaata na'ta ala Siba, kuɗ kayni hoyok-ziy namna ka yum ala Ber-Seba ta-ta vaydi.

34Esaw busata valam coy dok-fiɗi, nam sli Yudit goota vi Beeri ma Hetiyena, hiɗi Basmat goota vi Elon ma Hetiyena kaw. 35Guro nisina muɗi mi va ma ges dik Isaak hiɗi Rebekka.

Currently Selected:

CAWA'TA TUNITA 26: Massana

Highlight

Copy