CAWA'TA TUNITA 27

Isaak gi bol kay goora valam Yakub

1Isaak tun caw muɗ maari, iram muɗ wi ŋaaɗi, ta-ta nam muɗ wi noŋɗi. Nala nam yi Esaw goora valam ma ŋolla: Nam dumu: goora vanu! Esaw ala nan zawni. 2Isaak di'e: Wulin kayni nan muɗi maari, buur ma mitta co kanna may kiranɗi. 3Wulin kayni naŋ ma gan tuwaŋu, yawaŋ ŋuloŋŋa vaŋu hiɗi ɓarawta, tuɗaŋ goy sine'e, can muuray ci'. 4Naŋ ma kotan tina ki nan ka minim nala, naŋ maranta, nan tum ti', kay ciwta vanu ma gaŋ bolo jew a nan mita. 5Rebekka hum va ma Isaak di mi goora valam Esaw. Esaw kalay fulu, kay gar muura, kay maramu.

6Bugolda na' di tam Yakub goora va'a: Humaŋu, nan hum del buŋ ka di tam ɓasuŋŋa Esaw ala: 7Tuɗaŋ garan muuru, naŋ kotanta nan ti'e; nan min gaŋ bolo vok Ma-Vatɗina jew mitta vanu. 8Wulin kayni goora vanu, humaŋ lawta ta nan daŋgit ɗawni. 9Naŋays jar fokŋa, yawan guro fok-meen ay ma', nan min kotaŋ ti namna mi buŋu ki nam ka minim nala. 10Naŋ ma tuɗ tin namna mi buŋu, kay nam gaŋ bolo jew mitta valamu. 11Yakub hot dit mi sulum ala: Humagu, Esaw tuwan ŋusu, may nan ŋus may tanɗinge. 12Kla, la nam taman tuwanawana, nan muɗ kiram ɗawn mi sa ma sini, nan mara' kan ɗawn ti be'da, may ti boldaɗi klasige. 13Sulum dumu: Goora vanu, hin beɗ na'ta nig kan nanu, naŋ humaŋgi mi vunanu, naŋays yawaŋ fok namna aya. 14Yakub kaliya yawam aya, nam maram mi sulumu, hiɗi fok namna, na' kot tin ma ŋaana ki Isaak ka minim nala: 15Bugol kayni Rebekka yaw sligara vi goora va' ma ŋolla Esaw, sligar ma ŋaana ma ka lakay kulo vo ta'a, na' cukum tam Yakub goora va' ma goora, 16na' ɗutum bak-fokŋ ɓalamu, ɗutum hen kulo delemu may. 17Sliwna hiɗi funa ma na' kotomna na' vulum hay ɓam goora va' Yakub.

18Nam ma tam bulumu ka dumu: Bunu! Bulum ala: Nan waŋŋi, goora vanu, naŋ mi gige? 19Yakub hot di bulumu: Nan mi Esaw goora vaŋ ŋolla, nan lumi kayn mi va ma naŋ dan kalamna, nan siɗawaŋu kay naŋ ma mus kulo'o, naŋ ma ti sliw muur ma nan kotomina, kay ciwta vaŋ ma gan bolo. 20Isaak di tam goora valamu: Ele! Naŋ fumi gosoy nala su? Nam hot dita: Maram vok iran gosoy mi Ma-Vatɗin Lawna vaŋu. 21Isaak di tam Yakub: Naŋay goboy tanu goora vanu, nan tamaŋ tige, kay nan min wi'e la naŋ mi goora van Esaw lebo namɗi su? 22Yakub ma goboy tam bulum Isaak, Isaak tamam tuwamu di'e: Kayni mi della vi Yakub may kayni mi ɓam Esaw. 23Nam may wumɗi, kay ɓalam ay ŋusu ki ɓasulumna Esaw nala, nam gum bolo may. 24Nam di'e: Naŋ zawn mi goora van Esaw gasi su? Nam hot dita: Mi nanu. 25Isaak di'e: Naŋ vulan va ma tinay yo, hinan ti kuɗ sliw muura vi goora vanu, kay ciwta van ma gaŋ bolo. Yakub vulum va ma tina, nam ti'e, nam maram vinna kaw, nam ci'e. 26Wulin kayni Isaak dumu: Goora vanu, naŋay yo, bowan kaŋu. 27Yakub ma goboyo, nam bowomu. Hista vi sligara valamu cuk hay cin Isaak; nam gum bolo di'e: Goora vanu his ki sine ma Lawn gum bol nala. 28Lawn ma vulaŋ maɗay ma dukalawn ta, vulaŋ mul-sliw ma gaa kay nagat ta, vulaŋ alkamarena hiɗi vinna ŋolo! 29Sumun ŋolo ma hot yisi gaa kuɗaŋu jaf-sumun ŋolo ma girif gaa vokaŋu! Naŋ ma mus mul kay ɓosiyoŋŋa, gurona vi suŋ ma girif gaa vokaŋu, sa ma laŋ joon nam beɗay goyo, sa ma laŋ ŋaan nam fi boldawa.

30Isaak vunam ma gi bolla vat lay, Yakub kal goy lay kayni, ɓasulumna Esaw ay goy ci muur pa co may. 31Nam kaw kot tina, nam maram tam bulumu, nam di tam bulumu: Bunu fokaŋ kulo'o fokge, taŋ sliw muura ma nan cumina, kay ciwta vaŋu ma gan bolo. 32Bulum Isaak dumu: Naŋ mi gige? Nam hot dita ala nanu mi Esaw goora vaŋ ma ŋolla. 33Isaak tuwam muɗ jiriyim bat-bat' ŋol suwa. Nam di'e: Sa namna ma ci muura, maranta, kaw kayn mi gige? jew a naŋ co kayni, nan tiya, asaya. Nan gum bolo, bol na'ta ma mus kalam lay. 34Hay li ma Esaw hum dita vi bulum ki kayn nala, nam tun caw tiy ŋolo, dikam ɓulakay ŋolo. Nam di tam bulumu: Bunu, gan bol man nan lay! 35Isaak di'e, ɓasuŋŋa coya hiɗi ɗutta, bolda ta nan min gaŋgita nam yawa'awa goyo. 36Esaw di'e: Wulin kayni nam tayanawa gaa sem ma' kayni kuɗ semda valam ta tuni ala Yabubta su? Nam sli ŋolda vanawa goy kanu, wulin kayni lo nam sli bolda vanawa! Nam di'e: Naŋ may hin bolda tara'a man nanɗi su? 37Isaak hot dita di tam Esaw: wulin kayni nan tunumawa mul kaŋu, ɓosiyomna kaf nan muɗsi sa sunda valamu, nan hobomawa hiɗi alkamarena hiɗi vinna, wulin nan ma laŋgi maŋ naŋ ɗawn meloge goora vanu? 38Esaw di'e: Bunu: Kayn ti bolda vaŋ noŋ ta tuta su? Naŋ gan bol lay bunu. Esaw tiy hiɗi delem kulo ŋolo. 39Bulum Isaak ka dumu: Humaŋu, liyn ma musta vaŋu mul-sliwna ma gaa kay nagatna ma li hayamɗi, maɗay ma may kulo dukalawn pan li hayamɗi kaw. 40Naŋ ma ti vunaŋ ɗawn kuɗ kew-gaferaŋa vaŋu, naŋ ma sun ɓasuŋŋa. May hay li ma naŋ poy goy buti ɗaw tani tani, jak ma nekŋa ma nam tunum peleŋŋa naŋ ma gum ɗaw tani goyo.

Kal-goyta vi Yakub

41Esaw gi Yakub kalaf hayam kam' kuɗ bolda ta bulum gumtita; Esaw var hay dikam ala: Buur ma tiyna vi bun co ɗawni nan ma ci ɓasunna Yakub goyo ɗisu? 42Law ma Esaw dumna nisi co'o dum mi Rebekka, na' yi Yakub aya dumu: Humaŋu, ɓasuŋŋa Esaw min job yalam taŋu, nam min caŋ goyo. 43Wulin kayni, goora vanu, naŋ ma human vunanu: Fokaŋ kulo'o, piraŋ goy vi ɓasunna Laban hay Karan; 44naŋ ma mus talamu ir liyn neeɗa, ta-ta ɦiyda vi ɓasuŋŋa hot gaa tuwa, 45ta-ta dikam ma ɦiyna vat goy taŋ tuwa, ta-ta yalam jok va ma naŋ lum talamna, nala nan ma gi sunis kay hotaŋiya. A nan ma hin goy bay gurona van sa ma'na hay fatta kepta kayn ŋaa su?#27:45 Kay sa ma ci-matna cum goy lay. Ŋɓ 35:19.

46Rebekka di tam Isaak: Wulin kayni mus ma irin muɗi kiran bisi kuɗ gurona vi Het, la naŋ sli ca jar guro-boyna vi Het ki nisin lakŋ nala, nan mus iri hay nagat tan kayn kay meloge?

Currently Selected:

CAWA'TA TUNITA 27: Massana

Highlight

Copy