CAWA'TA TUNITA 23

Mitta vi Sara, Abraham pa' hay Makpela

1Sara li busat hay nagat kis hiɗi diram dok-ma' yam siɗiya. 2Bugol kayni na' mit hay Kiryat-Arba ta ya' Hebron, hay nagata vi Kanaan. Abraham co'o kay ta' do'ola'a, kay tiya'a. 3Abraham hin tuwna va' gaa waŋ, kalay tam gurona vi Het nam disi ala: 4Nan mi rogoyo, lum jargi damn mi ziya, nigi vulan liy ma pi sumuna van hay nagata vigiya, kay nan min pi cata vanu, kay ŋaya' goy vok iranu. 5Gurona vi Het hot dit mi Abraham ala: 6Sam-ŋolla, humma tige, naŋ jarma kayni mi Yerimana vi Lawna, zul ma pi sumuna vuma lakŋi, naŋ as vilek kep ki naŋ min nala kay pi cata vaŋu. Sa jarma ma as telaŋ ala naŋ pi cata vaŋ hay zulla valamɗi mayɗi. 7Abraham fok kulo'o, nam girif gaa vok gurona vi Het sa sumay nagata. 8Nam di tisiya, humgiya, la nigi vulan hagatawa kay nan pi cata vanu ni, nigi ma siɗawan Efron goora vi Cowar, 9kay nam ma hinan zul-hiɗiyna valamu ma hay Makpela, ma ka goy vun sinena valamna, nan gusum hiɗi gurju'u, kay a nam ma muɗ mi liyna van ma nan pi sumuna van hayam jargi tanna.

10Efron ma Hetiyena kaw ka musi jar gurona vi Het segen dam. Nam hot dit mi Abraham hay hum gurona vi Het hiɗi nisi kaf sa dakay hay vun-galana vi hoyok-ziyna ala: 11Awa sam-ŋolla, human tige, nan vulaŋ sinen lay, zul hiɗiy ma goy vunamna nan vulaŋga lay. Nan vulaŋgi kayn sumuna van tan humsi ka hum kaf, paŋ cata vaŋ hayamu. 12Abraham girif gaa vok sum sa hay nagatna. 13Nam di tam Efron kir sum sa hay nagata sa tokay kafn ala: Nan siɗawaŋu, naŋ human humu, nan wurakaŋ gurju kay sine namna, gurjut naŋ naŋ va' vige; bugol kayni nan tuɗ pi cata van man may. 14Efron hot dit mi Abraham ka dum ala: 15Sam-ŋolla, human tige, Jaraŋ naŋ hiɗi nan kayni, sine ma gusum sikel Kis-fiɗin as lum mige? Paŋ cata vaŋu ba'. 16Abraham hum Efron; gurjuta ta Efron di ka'ta nam ŋamti goy vok gurona vi Het kafe, gurjut sikel kis fiɗi ma sumun li filiw hiɗi nam hay liy namna.

17Sinena vi Efron hay Makpela, ma ka ɗiger vok Mamre, sinena hiɗi zul-hiɗiyn ma hayamna, gu ma ka hay sinen kaf, hiɗi jar-liyn ma ŋuyi talamna, 18kaf fariyam muɗ goy vi Abraham, kayn kir gurona vi Het hiɗi nisi kaf sa dakay hay vun-galana vi hoyok-ziyna. 19Bugol kayni, Abraham pi Sara, hay zul-hiɗiyna vi Makpela, ɗiger vok Mamre ta ya' Hebron, hay nagata vi Kanaan. 20Sinena hiɗi zul-hiɗiyna ma Abraham gusum hay ɓam gurona vi Het muɗi mi liyn ma nam pi sumuna valam hayamna.

Currently Selected:

CAWA'TA TUNITA 23: Massana

Highlight

Copy