CAWA'TA TUNITA 24

Isaak sli Rebekka

1Abraham muɗi maari, busata valam kalay ŋolo; Lawn gum bol hay slen kafe. 2Nam di tam sa ma sunda valamu ma muɗi busay suw segen kaf hay ziyna valamna, sa ma ŋom slena valam noŋ kafna ala: Nan siɗawaŋu, tunaŋ ɓaŋ kay ɓalamu; 3nan min ala naŋ ma yi va kaŋu hiɗi sem Ma-Vatɗina, Lawn ma li wuralawna hiɗi nagata, kay goora vanu naŋ ma slum ca jar sum sa Kanaaniya sa nay li ziy jarsin lakŋɗi. 4May goora van Isaak naŋ ma tuɗ slum cat hay nagata vanu, jar sumiyanu. 5Sa ma sunda hot dumu: La cat na'ta ma min a co kuɗan hay nagat tanɗi kla, ŋaat kayni nan ma vi goora vaŋis kuɗan su? 6Abraham dumu: Laŋ ŋali, naran goora van goy ɗawnɗi! 7Ma-Vatɗina Lawn ma hay wuralawna, ma vani goy hay ziyna vi bunu hiɗi nagata vi sumiyan kafna, nam ma kus yoboy hiɗi nanu, yi va kalam kaw ala: Nan min vul nagat kayni mi jafna vaŋuna, nam kay tuwam ma gi sunda-wuralawna valam vokaŋu; goy ɗawni naŋ ma slan ca'ay mi goora vanu. 8La cat min tapay kuɗaŋɗi, naŋ buti goyo kay sle ma naŋ yum kaŋŋa. May goora van hayɗin naŋ naranti goy ɗawnɗi. 9Sa ma sunda tun ɓalam kay ɓal Abraham ma Mulamna, nam yi va kalamu kay nam min li kuɗ va namna.

10Sa ma sunda yaw lamgan doogo jar lamgana vi mulamna, nam fokay kulo'o yaw sle ma ŋaana vi mulamna hay ɓalam kafe. Nam kalay hay Mesopotamiya, hay hoyok-ziyna vi Nakor. 11Goy jiy hoyok-ziyna, nam girif lamgan gaa hiɗi ŋulofomu, goboy hiɗi kaat tara kepe, kayni hay ŋarfatta, hay li ma guro-boyn kalay goyo kay go niyna.

12Nam di'e: Ma-Vatɗina, Lawna vi mulanna Abraham, nan siɗawaŋu kay vaydi naŋ ma hinan ŋaf hiɗi va ma nan minimna, laŋ ŋaat kay mulanna Abraham. 13Wulin kayn nan min col goboy vun niyn ma riŋ-goyna, guro-boyna vi sum sa hoyok-ziyn tani ma cukay goyo kay go niyna. 14Goot-cata ta nan min da' ala: Nan siɗawagu, nak ma her genda vag ay gaa'a, nan min ci'e, la na' hotan ditawa ala, caŋu, nan min vul a ci'e mi lamgana vaŋ lay, kayni ti goota ta naŋ ŋaɓa'ay mi sa ma sunda vaŋ Isaak, hiɗi kayni nan ma wi ala naŋ ka li ŋaat mi sa ma sunda vaŋu.

15Hay li ma vunam bay vat tuwan kayni: Rebekka ka tuɗay hiɗi genda niyna hay pela'a, na'a ti goota vi Betuwel goora vi Milka cata vi Nakor ɓasum Abrahamna. 16Goor na'ta ira' kulo tuni jifiy ŋolo, na' ka vo waya'a, sa juf bay tama' tuwa noŋo, na' jik gaa hay niyn-ma-riŋŋa, hob genda va'a, jikay kulo'o. 17Sa ma sunda jaŋay kira'a ka da'a: Nan siɗawagu, nak hinan ci kuɗ niy ma hay genda vag kayn neɗe. 18Na' hotom dita: Caŋu Mulanna. Na' li tuwa' koloy wit', her vun genda va'ay gaa'a, vulum niyo nam ci'e. 19Hay li ma nam ci niy cina, goota di'e: nan min vul niy mi lamgana vaŋ kaw ta-ta nam asa. 20Na' hok niy ma ka'na hay palkatamna, hot hay kaar gosoyo kay gar niyna, na' go niyn mi lamgan kafe. 21San kayni ka ɗuwa'a, nam muɗi huyum', may di vaɗi, nam ka var ala Ma-Vatɗin min gutum a rogoyt ma vumu lebo nanige.

22Hay li ma lamgan kaf ci niy cina, nam ga' dooro cina'a, nekka valam ir gal sikel kep, ga' way digili ɓa'a, nekka valam as ir sikel doogo nala. 23Nam di ta'a. Nan siɗawagu, nak danay tige, nak ti goota vi gige? Liyn ma buura ka hay ziyna vi bug su? 24Na' hotom dita: Nan ti goota vi Betuwel goora vi Milka hiɗi Nakor. 25Na' hot dum lo: Hatna hiɗi usn ka hay ziyna vuma ŋolo, liyn ma buur kaw ka lay. 26Nala san her gaa'a, girif gaa vok Ma-Vatɗina. 27Nam di'e: Bolda ka kay Ma-Vatɗina, Lawna vi mulanna Abraham, slugota hiɗi vunam ma nam dum mi mulanna yalam may jokom noŋɗi, nan kaw Ma-Vatɗin naran ɗawn hay ziyna vi ɓasum mulanna. 28Goot-cat kayni kalay jaŋi, na' vi labar namna mi sum sa vo hay ziyna vi su'a. 29Ɓasum Rebekka ka kep yum Laban, nam kalay jaŋi kat sana, goy hay liyn ma niyn riŋŋa. 30Kay nam wi basulumta hiɗi dooron cina'a, way-digilin ɓa'a kaw. Nan hum basulumta ka law ala san kayni di tan nala nala. Nam co tam sa namna, nam fum goy kat lamgan del kaat zaw. 31Nam di'e: Naŋaya, sa ma bolda vi Lawn kaŋŋa, naŋ as bur goy jiy ɗawn burtige? Ziyn kan kotiya, liyn koti kay lamgan lay. 32Sa namna co vo'o, Laban yaw sle ma kay lamgan gaa'a, nam vul usna hiɗi hatna mi lamgana, vulum niyo kay muz selemu hiɗi sum sa kuɗumna kafe. 33Bugolda nam vulum va ma tina. May san kayn di'e: Law ka vunanu, la nan bay da' goyo, nan as tiɗi. Laban ala daŋu.

34Wulini nam di'e: nan mi sa ma sunda vi Abraham. 35Mulanna kayni Lawn hobom hiɗi bolda, wulin kayn nam muɗi dono'o, Lawn vulum fok-dimina hiɗi luwayna, gurjuta hiɗi ora, sa sunda sa jufayna hiɗi sa boyna, lamgana hiɗi kurona kaw. 36Sara cata vi mulanna vuɗum gooro hay maarta va'a; farayna valam kaf nam vulum mi goor namna. 37Nam halafan ala nan ma slum ca mi goora valamu jar guro-boy sa Kanaaniyan sa nam li ziy jarsi damnɗi; 38may nan ma tuɗ hay ziyna vi bulumu hiɗi jafna valamu, slum cata vi goora valami goy ɗawni. 39Nan di tam mulanna ala: cat ɗawn ma min a tapay kuɗanɗi klasige. 40Mulanna hotan dit ala: Lawna ma nam poyay vok iramna ma gi sunda-wuralawna valamis kuɗanu, rogoyt ma vanu, goora valamu nan ma slum cat ay hay jafna vi bulumu. 41Nam ala la nan coyawa vi sumiyamu may la nisi vulan gootɗina, va ma nan yum kan vokomna as tun kan loɗi. 42Vaydi nan co'o hay liyn ma niyn riŋŋa. Nan ka di'e: Ma-Vatɗina, Lawna vi mulanna Abraham, la naŋ min ala rogoyta ta nan tuɗ haya'ta ɗawn ma vanu na, 43nan col tam liyn ma niyn riŋ goyn ɗawni, goot-cat ta kalay goy go niyna, ta nan da'awa ala, nan siɗawagu, nak hinan ci niy hay genda vag neɗe, la na' hotan ditawa ala, 44naŋ kay tuwaŋ caŋ niy lay, nan min go niy mi lamgana vaŋ lay ni, goot-cat na'ta ma li ɗawni ti cata ta Ma-Vatɗin ŋaɓa'ay mi goora vi Mulanna. 45Hay li ma nan ka var ki kayn nala zaw kayni, Rebekka kal ay goy de', genda va' pela' ta may; na' jik gaa hay liyn ma niyn riŋŋa, na' go niyna. Nan ka da' ala, nan siɗawagu nak vulan niy ma ci doge. 46Na' li tuwa' koloy wit, vi vun genda va'ay gaa'a, na' dan ala caŋu, nan min vul niy mi lamgana vaŋ lay. Nan ci'e, na' vul mi lamgana kaw. 47Nan ka joba' ala nak ti goota vi gige? Na' hotan dit ala na' ti goota vi Betuwel, goora vi Nakor hiɗi Milka. Nala nan ga' dooro cina'a, ga' way ɓa'a may. 48Bugol kayni nan girif gaa'a, nan subur Ma-Vatɗina Lawna vi Mulanna Abraham, kay nam tuɗanay tan ɗiger, kay nan ma sli goota vi ɓasum-mulanna mi goora valamu. 49Wulin kayni la nigi min li ŋaata hiɗi lawta ta ɗigerta mi mulanna, nigi danu, la asɗi, nigi dan lay, kay nan na goy gar manu.

50Laban hiɗi Betuwel ka hotom dit ala: Van kayni may goy vi Ma-Vatɗin pa, numa as dum hen ɗawn meloge? 51Rebekka zaw-kaŋŋi, vaŋga tuɗaŋu, na' ma muɗ ti cata vi goora vi mulaŋŋa, ki Ma-Vatɗin di nala.

52Hay li ma sa ma sunda vi Abraham hum dita visi humna, nam girif gaa kay nagat vok Ma-Vatɗina. 53Nala sa ma sunda yaw sleni goy ŋolo: gurjuta hiɗi ora, sligara kaw, nam vulum mi Rebekka; ɓasu'na hiɗi su'a kaw nam vulsi slen ma gusta valam ti ŋolo. 54Bugol kayni namu hiɗi sum sa kuɗumna nisi ti'e ci'e, nisi bura. Hay buurta ka'ta, hay li ma nisi fok kulo'o, sa ma sunda di'e: Nigi hinan hot tam mulanna yo. 55Ɓasum goota hiɗi su'a di'e: Hin goot mus hiɗi numa ir neeɗa, ir buur doogo nala, bugolda naŋ ma tuɗa. 56Nam disiya: Nigi van yanɗi, kay Ma-Vatɗin gutanawa, rogoyt vanawa, nala nigi hinan tuɗa, kay nan min tuɗ kat mulanna. 57Nisi hot di'e: Yay goot-cat aya, joba' tige. 58Nisi ya'aya joba' ala: Nak min tuɗ hiɗi san zawn su? Na' hot dit ala: Awa nan tuɗa.

59Nisi hin Rebekka tuɗa, goor ta suna'ta kaw, nisi kalay hiɗi sa ma sunda vi Abraham hiɗi sa kuɗumna. 60Nisi gi bol kay Rebekka, nisi di'e: Nak ɓasuma'ta, nak ma muɗ ti sum sumun miliyoŋ gaage gaage, jafna vagu ma kol kay sum sa gawt kisina.

61Rebekka fok kulo'o, hiɗi sa sunda va'a, nisi ɓe kulo kay lamgana, tap kuɗ sa namna, sa namna kalay hiɗi nisiya.

62Hay na'ta kayni Isaak ay goy hay kaata vi Lahay-Roy pa, nam ka musi hay nagat ta gal kayamta. 63Vulatita tara kep Isaak kalay goy sine'e kay poya. Nam poŋ iram kulo na kayni, lamgan ka tuɗay zaw. 64Rebekka kaw poŋ ira' kulo'o, na' wi Isaak, na' jik gaa kay lamgana. 65Na' di tam sa ma sunda: san ma ay hay sinen pa tuɗay kiray kilan mi sa marige? Nam ala mi mulanna. Nala na' yaw sligara bar tuwa'a. 66Sa ma sunda vi labara vi slen ma nam lumin kaf mi Isaak. 67Isaak kal Rebekka kalaf hay ziyda vi sulum Sara, Rebekka muɗ ti cata valamu. Nam mina'a. Isaak iram hot teŋa bugol mitta vi sulumu.

Currently Selected:

CAWA'TA TUNITA 24: Massana

Highlight

Copy