CAWA'TA TUNITA 22

Ma-Vatɗina wak Abraham

1Bugol slen kayni, Lawna wak Abraham, nam dumu: Abraham! Nam hot dita: nanis zawni. 2Lawn di'e: Vaŋ goora vaŋ Isaak ma vuɗi kepna ma hayaŋ kalamna, tuɗaŋ hay nagata vi Moriya, ɗawni naŋ ma ŋalam goy ɗifin, kulo kay hiɗiyta ta nan min daŋ ka'ta.

3Abraham fok kulo graw culum culum; gan kurona valamu, yaw sa sunda sara kuɗum ma', vi goora valam Isaak may. Nam mun gu ma ŋal ɗifinna kalamu, kalay hay liyn ma Lawn dum kalamna. 4Hay buurta ɦidita, Abraham poŋ iram kulo na kayni nam wi liy namna ay goy gine ta'. 5Abraham di tam sa sunda valamu: Lakgi tani hiɗi kurona, nan hiɗi goor ma joriyon zawni numa tuɗ goy ɗawni kay li girifta, numa ma hotay katgiya. 6Abraham yaw guna ma ŋal ɗifinna, tunum kay goora valam Isaak, kuta hiɗi kewna nam yawam hay ɓalamu may, nisi ma' pet kalay kuɗ tuwsiya. 7Isaak ka job Abraham ala: Bunu, kuta hiɗi kewn ka'a, may goor ɦu-dimi ma nay lum ɗifinna ka ara mayge? 8Abraham hotom dit ala: Awa goora vanu, Lawn kay tuwam ma vulay goor ɦu-dimi ma li ɗifin hiɗi namna. Nisi ma' pet ka tuɗ kuɗ tuwsiya.

9Hay li ma nisi co hay liyn ma Lawn dum kalamna cona, Abraham in giwin-ma-ɗifinna kulo'o, jak gun gaa kuɗumu, nam jun goora valam Isaak, burum kulo kay giwin-ma-ɗifinna, kulo kay guna. 10Abraham meɗ balam goyo, nam sli kewt aya kay ŋat goora valamu. 11Sunda-Wuralawna yumi goy hay wuralawn pa dumu: Abraham, Abraham! Nam hot dit ala: nanis zawni. 12Sunda-wuralawna dumu: tun ɓaŋ kat goorɗi, li va talamɗi noŋo, wulin kayn nan waawa ala naŋ li nar kuɗaŋu, kay goora vaŋ ma kaŋ kepna kaw naŋ min telem goy kanɗi. 13Abraham poŋ iram kulo'o, ɗuw bugolom na kayni, ɦu-gamalan ka jar gu-biremna zaw, kay miyokom ka slewi tam guna, nam kal but ɦu namna, ŋalam ɗifin baŋal goora valamu. 14Liy namna Abraham tunum selem ala Jehova-Jire.#22:14 Jehova-Jire Min di'e: Ma-Vatɗin wi va ma nam min vula. Kay ta-ta vaydi nisi ka di ala: Lawn kay tuwam ma vul va kulo kay hiɗiyta valamu.

15Sem ma ma'na lo sunda-wuralawna yi Abraham ay kulo hay wuralawn pa, 16dum ala: Nan yi va kanu kay tuwanu: Din mi nan Ma-Vatɗina! Kay naŋ li van kayni, goora vaŋ ma kaŋ kepna naŋ may telem goy kanɗi, 17Nala nan ma gaŋ bolo, nan min biyaŋ jafaŋu ŋolo ki mislek ma dukalawna hiɗi ŋesl ma kel niy-lum ma ŋolla nala, jafna vaŋu ma kol kay sa gawt kisina. 18Kuɗ jafna vaŋu, sum sa gaa hay nagat noŋ kaf ma fi bolda, kay mige naŋ human vunanu.

19Abraham hot tam sa sunda valamu, nisi yaway kulo'o kalay kuɗ tuwsi hay Ber-Seba, kay Abraham ay musi ziy haya.

20Bugol slen kayni, nisi mar labara tam Abraham ala: Humaŋu, Milka kaw vuɗ guro'o mi ɓasuŋŋa Nakor: 21Guro nisin kayni: Ut ma vuɗi jewna, Buz ɓasulumna, Kemuwel bum Aram, 22Kesed, Hazo, Pildas, Yidlaf hiɗi Betuwel. 23Betuwel vuɗ Rebekka: Nisi kayni si guro sa glafandi sa Milka vuɗsi mi Nakor ma ɓasum Abrahamna. 24Cata gorvota valamu ya' Rewma: Na' kaw vuɗ Tebak, Gaham, Tahas hiɗi Maaka.

Currently Selected:

CAWA'TA TUNITA 22: Massana

Highlight

Copy