CAWA'TA TUNITA 21

Vu'da vi Isaak

1Ma-Vatɗina humam hot gum kay va ma nam dum tam Sara, va ma nam dum ta'na nam hobom vunamu. 2Sara vi haya, na' vuɗ goor mi Abraham kep hay maarta va'a. Vuɗum hay liyn ma Lawn ŋaɓa'tisna. 3Goor namna ma Sara vuɗumna Abraham tunum selem ala Isaak. 4Hay li ma buurta vi Isaak co glafandi, Abraham kaam gosaya, ki Lawn dum nala. 5Hay li ma Isaak vuɗ kayni, busata vi Abraham coy kis. 6Sara di'e: Lawn muɗanawa va ma cene. La gigekaw humawa nam ɗawn ma cen kuɗanu. 7Na' hot di'e: Sa ma di mi Abraham fat tara kep ala Sara ma vuɗaŋ gooro mi gige? Dolay kayn nan vuɗum goorawa hay maarta valamu.

Hagar digiɗiy goy hay fulda

8Isaak wuliya, nisi kaam vunam goyo, hay buur ma nisi kaam vunam goyna Abraham li yuldeta ŋolda. 9Goora vi Hagar ta Egipteta ma na' vuɗum mi Abrahamna, Sara wum kayni nam ka pan goora va' zaw; 10na' di tam Abraham: Cata gorvot kilani naŋ ma digiɗa' goyo hiɗi goora va'a, kay goora vi cata gorvot zawni as yaw vocot daar hiɗi goora van Isaakɗi. 11Lawt kayni ɓulak dik Abraham ŋolo, kay Ismayel kaw mi goora valamu. 12May Lawn di tam Abraham: Naŋ ma ɓulak dikaŋ kuɗ lawta vi goora vi cat ta gorvotɗi, la Sara jobaŋ kay mige kaw naŋ ma huma'a, kay jafna vaŋ ma gasin ma may ɗawn goy hay Isaak pa. 13Goora vi gorvota vaŋ kaw nan ma lum jafam ŋolo, kay nam kaw mi jafna vaŋu.

14Abraham fok kulo graw culum; nam sli funa, hob huurta hiɗi niyna, nam vulum mi Hagar, na' tunum pela'a, nam vula' goor kaw, ga' ira'a may. Na' kaliya, na' viy goyo hay fulda vi Ber-Seba. 15Hay li ma niy ma hay huurta vatawa, na' bur goor gaa kuɗ popo mara waŋ may. 16Na' kal mus goy vokomu jarsi ŋray ca ki sa ɓe ɓarawt goy nala, kay na' di'e: Iran ma wi mitta vi goora vanɗi, na' mus goy vokomu, tiy hiɗi dela' kulo ŋolo. 17Lawn hum della vi goora; Sunda-wuralawna vi Ma-Vatɗina yi Hagar ay kulo hay wuralawn pa di ta'a: Hagar, mayɗin mige? tuwag li narɗi, kay hay liy ma goor buri waŋŋi Lawn humum delemawa. 18Fokag kulo'o, slag goora, vum ɓalamu, kay nan min biyam jafam ŋolo. 19Lawn mala' ira' goyo, na' wi kaata ta hiɗi niyna, na' kaliya hob huurta va'a, vul mi goora nam ci'e. 20Lawn ŋom goora, nam wul kulo'o, nam li ziyna valam hay fulda, nam muɗi mi sa ma li gawna.#21:20 Sa ma li gawna. min di'e sa ma ci muura. 21Nam li ziyna valam hay fulda vi Paran, sulum slum cata ay goy hay Egipte.

Abraham hiɗi Abimelek jun bonot jar-tuwsiya

22Hay liyn namna, Abimelek co'o hiɗi Pikol ma ŋolla vi sojena valamu, nam di mi Abraham ala: Lawn ka hiɗi naŋu hay slen ma naŋ ka lum kafna. 23Wulin kayn naŋ ma yi va kaŋ vokan tani hiɗi sem Lawna ala naŋ ma ɗutanɗi lay, ɗut gurona hiɗi guro-ŋolona vanɗi lay, nan hiɗi nagat ta nan ka musi haya'ta naŋ as luma ŋaa'a ki nan li ŋaat taŋ naŋ kayn nala lay. 24Abraham di'e: Awa nan yi va kanu. 25May Abraham law Abimelek kay kaata niyna ta sa sunda valam sla' hiɗi donota. 26Abimelek hot dumu: Hay! Li law namna kayn gige kaw may kiranɗi; naŋ may dan goy jewɗin ke, nan hum law namna damn vaydi. 27Abraham yaw fok-dimina hiɗi luwayna, nam vulum mi Abimelek, nisi jun bonot jar-tuwsiya. 28Abraham yaw fok-dimi ma joriyon siɗiya, nam lakam goy valamu. 29Abimelek di Abraham: Fok-dimi ma joriyon siɗiya lakŋi naŋ lakam goy valamu kay mige? 30Abraham hot dumu: Fok-dimi namna ma siɗiyan lakŋi naŋ ma yawamu, kay nam lakŋi ma ɗek goy ala kaata na'ta jugoɗa' mi nanu. 31Kuɗ kayni liy namna nisi tunum selem ala Ber-Seba, kay kayni mi liyn ma nisi yi va kisi jar-tuwsiya. 32Nisi jun bonot hay Ber-Seba. Bugol kayni Abimelek hiɗi Pikol ma ŋolla vi sojena valamu fok kulo'o, hotay hay nagata vi Filistina. 33Abraham pi gu-tumuura hay Ber-Seba; hay liy namna nam yi sem Ma-Vatɗina Lawn Ma-Vatɗin hay vunamu. 34Abraham li ziy hay nagata vi sa Filistin noŋ ta-ta'.

Currently Selected:

CAWA'TA TUNITA 21: Massana

Highlight

Copy