GATTA-SEM-MA'TA 24
24
Gita-goyta vi cata
1Hay li ma san sli catawa, bugolda na' muɗ kiram bisi kay nam wi va ma tuɗ ŋaaɗi ta'a ni, nam ma ɗo ta'a ɗerwelda vi gi-goyta kepe, bugolda hay li ma nam vula' ɗerweldawa hay ɓa'a, nam ma dika' goy hay ziyna valamu. 2Na' ma kal goy hay ziyna valamu, na' as tuɗa, muɗ cata vi sa mara'a. 3La sa ma bugoldana mina'ɗi lo, la nam ɗo ɗerwelda ta ga' goytawa, la nam vula'tawa hay ɓa'a, la nam ga' ira'awa goy hay ziyna valamu, lebo la sa namna mit mitiya, 4jufa' ma jewna as sla' loɗi, kay na' muɗi kiram liwis vatiya, kayni mi law ma liwisi vok ir Ma-Vatɗina, nagata ta Ma-Vatɗina Lawna vigi vulgita nigi as hoba hiɗi jootɗi.
Gatta kay ŋomda vi sa wurana, suw pet sa ma hawna
5Hay li ma san sli catawa wuliya, nam as tuɗ goy sojeɗi, sa as tunum lop kalamɗi; nam as li lopɗi kuɗ cata valam ta nam sla' wulita ta-ta ir busat kep, kay nam as li firiya hiɗi cata valam ta nam sla'ta.
6Hiɗiyna hiɗi goor-hiɗiyna ma' pet nigi as deŋem goyɗi, kay la nigi li nala nigi tuna' goy kayni ti irita vi san kay tuwa' noŋo.
7La san kul ɓasulum ma Israyella jar sa Israyella, la nam muɗum gorvo'o lebo la nam gusum goyo, sa namna nigi ma cum goyo. Nigi ma pat joota goy jar sa Israyella pa.
8Ligi ŋali hiɗi moy-kuturuna, nigi ma ŋom sle ma muliyan-sa-ɗifinna sa Levitna di tigiya, nigi ma li kuɗumu kaw; slen ma nan disitna nigi ma ŋomomu, li kuɗumu kaw. 9Humgi ma gigi kay va ma Ma-Vatɗina Lawna vigiya lum tam Miriyam hay hagata, hay li ma nigi cukay goyo hay nagat Egipte pana.
10La nigi vul va mige kaw bal mi ɓasukina, nigi ma kal vo hay ziyna valamu kay sli va namna hiɗi donoɗi; 11nigi ma col goy hay vun-gala'a, sa ma ni balla ma margi va namna goy vun gala'a. 12La nigi yaw (sligara) hay ɓam sa ma hawna kay balla, nigi as cap bur bay hotomtaɗi. 13Hay li ma fatta tun caw ɗiga, nigi ma vulum sligara valamu kay nam ma bur hay sligara valamu, nala nam ma gigi bolo, kay nala nigi lum kayni mi lop ma ɗigera vok Ma-Vatɗina Lawna vigiya.
14Sa ma hawna ma li lop kay gurjuta nigi ma curoɗomɗi, la nam mi sugolgiya lebo mi sa ma pulu ma ka musi jargiya hay nagata vigiya. 15Nigi ma vulum wurakŋa vi lop ma nam ligit hay buur na'ta jew ɗikka vi fatta, kay nam hawi, nam as vi yalamu kay vi gurju na'taɗi. La naɗi, nam ɗawn ma siwel tam Ma-Vatɗina, kayni ma tun suluk kigiya.
16Nigi as ci bumna goyo kuɗ sulukŋa vi goora valamɗi, as ci goora goyo kuɗ sulukŋa vi bulumɗi kaw; gigekaw cum kayni kuɗ joona valam ma nan lumna.#24:16 Ɗuw hay Yer 31:30; Ezek 18:20.
17Nigi ma ɓulak lawta vok sa ma pulla hiɗi sa ma hawnɗi, nigi ma deŋ sligara vi vata duhultaɗi kaw. 18Humgi ma gigi ala nigi ay gorvo'o hay Egipte, may Ma-Vatɗina Lawna vigiya butgi goyo; kuɗ na'ta nan vulgi gatta kayni kay nigi ma li kuɗa'a.
19Hay li ma nigi feɗ wa ma hay sinena, la yigi jok yam wan mara'a goy hay sinena, nigi ma hot kay yawamɗi, nam vi sa ma pulla, sa ma kuyuna hiɗi cata duhulta, kay Ma-Vatɗina Lawna vigi ma gi bol kaŋ lopna vi ɓigi kaf. 20Hay li ma nigi ja vuɗna vi olivena vigiya, ma hin kulona nigi ma jamɗi; nam ma hin vi sa ma pulla, vi sa ma kuyuna hiɗi cata duhulta. 21Hay li ma nigi ja gulda-guldana, diram ma hinina nigi ma jamɗi; nam ma hin vi sa ma pulla, sa ma kuyuna hiɗi cata duhulla. 22Humgi ma gigi ala nigi ay gorvo'o hay nagata Egipte; kuɗ na'ta nan vulgi hagata kay nigi ma li kuɗ slen kayni.
Currently Selected:
GATTA-SEM-MA'TA 24: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001