GATTA-SEM-MA'TA 25
25
1Hay li ma law ka jar sumuna, may la nisi coowa vokgiya kay nigi ka kitata visiya ni, sa ma lawta valam hay liya'ana nigi ma butum goyo, may sa ma lawta valam hay liya'ɗina nigi ma ka kitat kalamu may. 2La sa ma li joota as fi watta, sa ma ka kitata as burum gaa butuwu, gaa vok iramu, nisi ma watam ŋray hiɗi joo ma nam lumna. 3Nam as kay watam suw libet dok-fiɗi ɗi, kay la watta suwi ŋolo, nam cap sa'ata.
4Nigi ma jun vun putna hay li ma nam to wanɗi.
Musta vi cata
5Hay li ma ɓosiyom-tuwsin ka lakay ziy dar kepe, la kep jarsi mita bay hin gooro, cata vi ma mitina as tuɗ sli sa ma pulɗi, may ɓasum jufa'na ma tuɗ ta'a, nam as musa' kuɗum ca'a. 6Goor ma na' vuɗum jewna ma yum hiɗi sem ɓasulum ma mitna, kay selem ma li hasay goy jar sum sa Israyelɗi. 7La san kayni min mus hiɗi cata vi ɓasulumnaɗi, cata vi ɓasulumna ma tuɗ goy hay vun-galana kat sa maariyana, na' ma di ala: Ɓasum jufanna min sli sem ɓasulumna kulo'o jar sa Israyelɗi, nam min musan kuɗum caɗi. 8Sum sa maariyana vi hoyok-ziyna ma yumu, ma law hiɗi namu, la nam so vokom dok-dok ala nam mina'ɗi, 9ki kayn nala na' ma co katamu vok sum sa maariyan sa hay hoyok-ziyn kaf, na' ma patam tuguru ma selemna goyo, na' ma tufum nenen kulo kiramu, na' ma di talam ala: Van ma li ki kayn nala kat sa ma min in ziyna vi ɓasulum kulo'ɗina 10Bugolda ziyna valam hin ɗawni yum ala «ziyna vi sa ma tugurun selem patay goyna».
11La sumun ma' ka to tuwsiya jar-tuwsiya, la cata vi hena co'o kay but jufa' goy hay ɓam sa hena ma ka tomna, la na' meɗ ɓa'awa goyo, mok sa henawa kay huɗamu (lebo yuwamu), 12nigi ma ka' ɓa' goyo, nigi ma wa' hawa'ɗi.
13Nigi ma lak sle ma ŋaɓ nekka hay birimna vigi kuɗ batam ma'ɗi, kep gooro kep ŋoloɗi. 14Nigi ma lak tasa ma li ŋaɓta hay ziyna vigi ma'ɗi, kep gooro, kep ŋolo kayn may ŋaaɗi. 15Va ma ŋa nekka visiya ma li hay liyamu, tasata ŋaɓta vigi ma li hay liya'a kaw, kay buura vigi ma hur voko hay nagata ta Ma-Vatɗina Lawna visiya min vulgiya. 16Kay la gigekaw li ki kayn nala, la gigekaw li slen ma kulla, nam liwisi kir Ma-Vatɗina Lawna vigiya.
17Humgi ma gigi kay va ma Amalek li tigiya hay hagata, hay li ma nigi kalay goy hay Egipte pa, 18nanige nam ŋaf hiɗi nigiya hay hagata, nanige nam ka ir sum sa hin bugolgina, sum sa hinay goy giɗergina, kayn hay li ma nigi ay makay ŋolo, kayni kay nisi may li nar kay Lawnɗi. 19Hay li ma Ma-Vatɗina Lawna vigiya butgiyawa goyo hay ɓam sum sa gawta sa ŋuyi tigi kafna, hay li ma nam vulgi tun sukkawa hay nagata ta Ma-Vatɗina min vulgit voco'o kay nigi ma lak haya'a, nigi ma haz sem Amalek goy kay nagata: Yigi ma jok kaynɗi.
Currently Selected:
GATTA-SEM-MA'TA 25: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001