GATTA-SEM-MA'TA 23
23
1Sa as bur hiɗi cata vi bulumɗi, may ŋaa'a kay san vi borgona vi bulum kuloɗi.
Sum sa as hinsi hay dakkaɗina
2Sa ma huɗam toya lebo yuwam goy kaaya as kal kalaf hay dakka vi Ma-Vatɗinɗi. 3Sa ma vuɗi mizewna as kal kalaf hay tokŋa vi Ma-Vatɗinɗi, ta-ta tam jafna valam ma bugolom sem doogona kaw as kalɗi.
4Sum sa Amonna hiɗi sum sa Mowabna as kal kalaf hay tokŋa vi Ma-Vatɗinɗi, ta-ta tam jafna visi ma bugolsi sem doogon kaw as cukɗi. 5Ma li ki kayn nala dok-doko, kay mige, nisi may co ŋafgi irgiya hiɗi niyna hiɗi funa hay hagatɗi hay li ma nigi kalay goy hay Egipte pa, kay nisi vul gurjut mi Balaam goora vi Bewor, ma Petor hay Mesopotamiyana kay nam ma co beɗgiya. 6May Ma-Vatɗina Lawna vigiya may hum dita vi Balaamɗi, be'da ta nam beɗgita Ma-Vatɗina muɗa' goy bolda kigiya, kay Ma-Vatɗina Lawna vigiya nam mingiya. 7Nigi ma li toyt hiɗi nisiɗi, var kay lisi ŋaaɗi kaw hay li ma nigi ka iri tuwa.
8Sum sa Edomna nigi ma ɗuwsi birek-cekɗi, kay nisi si guro-biyogina, sum sa Egiptena nigi as ɗuwsi birek-cekɗi kaw, kay nigi li ziy ay hay nagata visiya. 9Guro-ŋolona visi sa mul ɦidina as cuk kalafi hay tokŋa vi Ma-Vatɗina.
Bay-liwista hay kaŋŋa
10Hay li ma nigi cukawa goyo kay tun kaŋŋa vigi goy vok sa gawt kigina, ligi ŋali hiɗi slen ma liwisna kafe. 11La sa mara ka jargiya muɗi liwisi kay tuwam goɗ henjeta ni, nam ma kal goy hay kaŋŋa, mus kulo hay kaŋŋaɗi; 12hay vulatita nam ma muz tuwam goy hay niyna, bugolda hay li ma fatta ɗigawa, nam as hot kulo hay kaŋŋa. 13Nigi ma tum liy mara goy valamu hay gal kaŋŋa, sa ma kal goyna tuɗ mus kayn hayamu. 14Nigi ma bur ɗugum jar jakŋa vigi waŋ', hay li ma nigi tuɗ goy ok suɗoyo, nigi jugoɗ zulla, pi suɗoyna tosom gaa'a, bugolda nigi hotay hay kaŋŋa may. 15Kay Ma-Vatɗina Lawna vigiya ka poy jargiya hay kaŋŋa kay ŋomgiya, kay mun sa gawt kigin vokgiya; nala kaŋŋa vigi ma li (dok-dok) peldete, kay Ma-Vatɗina iram ma wi va ma liwisi hay nagata vigiɗi, kay nam ma muɗ ŋorom tigiɗi kaw.
Gatta kay sum sa gorvona
16La sa ma gorvona piriyawa goy vi mulamna pa kay ŋay tigiya, nigi ma vulum goy mi mulamnaɗi. 17Nam as mus jargi hay nagata vigiya, hay liyn ma nam ma vilekemna, hay hoyok-ziyna vigi kep ma kiram ŋaana, nala nigi ma curoɗomɗi.
Lita viyuwta
18Jar guro-boyna vi Israyel kaf tara ma li tuwa' gawlaŋɗi, jar jufayn kaf kaw mara ma li tuwam viyuwɗi. 19Gurju ma fum kuɗ gawlaŋga, hiɗi gurju ma gus diyn goyna nigi as maram hay ziyna vi Ma-Vatɗina Lawna vigiya kay hob vun va ma yiy kiginaɗi, kay nam ma' lakŋi kir Ma-Vatɗin liwisi.
Sle ma vulum balla hiɗi va ma yiy kamna
20La nigi ni bal mi ɓasukina: La gurju'u, la wa'a la va mara mige kaw nigi ma job niy kuɗumɗi. 21Nigi as job niy tam sa ma pulla, may ɓasukina nigi as job niy talamɗi, kay Ma-Vatɗina Lawna vigiya ma gi bolo kay lopna vigi kaf hay nagata ta nigi min kal haya'ta ɗawni.
22La nigi yi va kigiya vok Ma-Vatɗina Lawna vigiya, yigi ma jok kay hob vun va namnaɗi, kay Ma-Vatɗina Lawna vigi ɗawn ma jobgiya, nala nigi ma kal hay suluku. 23Hay li ma nigi tel tuwgi kay yi va kigiya, nigi tel tuwgi kayni kay li suluku kaw. 24May va ma kalay goy hay vungina, nigi ma ŋomomu, li kuɗum kaw, ŋray ca ki va ma nigi yum kigiya kuɗ minda vigiya vok Ma-Vatɗina Lawna vigiya nala, kay vungi di law namna.
25La sa kal hay sinen gulda-guldana vi sugolomna, nam as ti vuɗ gulda-guldana ki nam min nala ta-ta hoba, may nam as cuk mara kalam hay vaɗi. 26La sa kal hay sine alkamarena vi sugolomna, nam as rat yam alkamaren hiɗi ɓalamu, may nam as kay za alkamarena vi sugolomna hiɗi hiramnaɗi.
Currently Selected:
GATTA-SEM-MA'TA 23: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001