LOPNA 14

Paulus hiɗi Barnabas hay Ikoniyum

1Hay Ikoniyum, Paulus hiɗi Barnabas cuk kalaf hay sinagogayna vi sa Yudiyana, nisi kus yoboyna ta-ta vok ma ŋolla vi sa Yudiyana hiɗi sa Grekŋa kaw vi'e. 2May Yudiyana sa min viɗina li yam sa waana kat ɓosiyosina. 3Nisi lakay hay Ikoniyum ir buura ŋolo, nisi law hiɗi diksi kaf hay Bum-Sumuna ma nisi li di-goyta kay yoboyna ma slugota valamu, ma vulsi kay wi ɗekka hiɗi sle ma gul-yalda ma nisi lum hiɗi ɓisiya. 4Vokŋa ma hay hoyok-ziyna ɓuraw gaa tis', sum sa hena tapay kuɗ sa Yudiyana, sa hena tapay kuɗ sa Apostolayna. 5Hay li ma sa waana hiɗi sa Yudiyana, hiɗi sa ŋulona visi kaw tun caw fok lawta kay lisi lasi, kay gisi hiɗi goorhoyona kaw, 6Paulus hiɗi Barnabas, hay li ma tuwsi disiya, nisi ŋay goy hay hoyok-ziyna vi Likawniya, Listra, Derbe hiɗi liyn ma galamna. 7Nisi kus labara ma firina haya kaw.

Paulus hiɗi Barnabas hay Listra

8Hay Listra, sa ma hurɓulina ay ɗawn musi dam', nam vuɗi hurɓuliya, nam may tuɗ noŋɗi. 9San kayni hum Paulus ka lawa. Paulus cuk iram kiram ŋiresl, hay li ma nam wi vida valam ta as muɗum goy ŋaa'a, 10Paulus di hiɗi delem kulo ala: colaŋ kulo ɗiger kay seŋu. Nam ɦal kulo gif', tun caw tuɗ kaw. 11Hay li ma sumuna wi va ma Paulus lum kayni, sumun siwel hiɗi delsi kulo'o hay vun Likawniyana ala: Lawayna ma sli tuw sumun nalana jikiyawa gaa taya. 12Nisi yi Barnabas ala Yupiter, Paulus nisi yum ala Merkuri may, kay sli lawti kayni mi namu.#14:12 Yupiter hiɗi Merkuri kayn mi sem mislekŋa. 13Mul-ma-ɗifinna vi Yupiter ma ka goy hay vun-galana vi hoyok-ziyna, mar luway-jufayna hiɗi zigewna ma torɗayna hay vun-galana, nam min li ɗifinna ŋray ca ki sumuna var nala kaw. 14Hay li ma sa Apostolayna, Barnabas hiɗi Paulus hum na kayni, nisi haw sligara visi goyo, pat jaŋ kulo jar sumuna, siwel tam sumuna kaw ala: 15Nigi li van kayni kay mige? Numa kaw numa si sumuna ŋray ca kigi nigi nala. Numa ka kus labara ma firina tigiya kay nigi ma muɗay goy tam slen ma waana kayni pa, muɗ irgi tam Lawn ma irina, ma li dukalawna, li nagata, li niy-lum ma ŋolla hiɗi slen ma hayamna kaf. 16Hay zaman ma kalayna, nam ra jaf-sumun kaf poy hay hagata visiya visiya, 17nir na'ta kepe, nam hin di-goyta goy kay ŋaata ma nam lumna noŋɗi, hay liyn ma nam hin niy ma sina ay kulo dukalawni pa, hiɗi liyna ma jafna li ŋaa'a, hay li ma nam hobgi hiɗi tina, hob dikgiya hiɗi firita kaw. 18Hiɗi dita kayni kaf, a tel sumuna kay li ɗifin tisiɗi kayni, ma li lop ŋolo.

19Sum sa Yudiyana may hay Antiokiya pa, hay Ikoniyum pa, gi yam sumuna, nisi gi Paulus hiɗi goorhoyona, sabam goy jiy hoyok-ziyna, nisi var ala nam mitiya. 20Sa hatayna ŋuy goy talamu, nam fok kulo'o, kal hay hoyok-ziyna kaw.

Hotta visi hay Antiokiya. Hay buurta ka'ta, nam kalay hay Derbe hiɗi Barnabas

21hay li ma nisi kus yoboyna hay hoyok-ziyna kayni kusna, bugol nisi muɗ sumuna ŋolo goy sa hatayna muɗna, nisi hotay hay Listra, hay Ikoniyum hiɗi Antiokiya kaw. 22Nisi vul donota mi sa hatayna, vulsi gatta kay nisi lak hay vida hiɗi dita ala: Nay as kal hay mulda-wuralawna ɗawni hiɗi zumalda ŋolo. 23Nisi siɗawa, li laata kaw, bugolda nisi vilek sa maariyana vi tapna vilekŋa, nisi vulsi goy hay ɓam Bum-Sumuna ma nisi vi kuɗumna.

24Hay li ma nisi raw hay Pisidiya rawna, nisi co hay Pamfiliya. 25Hay li ma yoboyna kusi hay Perge kusna, nisi kalay hay Ataliya. 26Goy ɗawni pa nisi dol hay Antiokiya, liyna ma sumuna vulsi goy hay slugota vi Lawna kay lopna ma nisi lum ay wulinna kayni. 27Hay cota visiya, nisi tok sa tapna, disi kay slena ma Lawna lum hiɗi nisin kaf, disi ala ir nanige Lawna mal vun-ziyna vi vida kay sa waana. 28Nisi lak hiɗi sa hatayna ir liyn kiɗayɗi.

Currently Selected:

LOPNA 14: Massana

Highlight

Copy