LOPNA 15

Dak ma ŋolla ma hay Yerusalem

Gal 2:1-9

1Sum sara'a may hay Yudiya pa, nisi hat ɓosiyayna disi ala: La nigi may ka gosaya kuɗ data vi Mususɗi, nigi as fi su'daɗi. 2Law ta ŋolda fok kulo jarsiya, Paulus hiɗi Barnabas ci wayt hiɗi nisiya, bugol kayni sumuna col varta ala Paulus hiɗi Barnabas hiɗi sumuna visi sara lay, ma tuɗ hay Yerusalem tam sa Apostolayna hiɗi sa maariyana, kay ɗuw caw lawta kayni. 3Sa tapna tunsi dirsi hay hagata, nisi jik hay Fenisiya hiɗi Samariya, nisi di goy kay mu'da vi dik sa waana, nisi muɗ ɓosiyosina kaf firi ŋolo. 4Hay li ma nisi co hay Yerusalem, sa tapna, sa apostolayna hiɗi sa maariyana kaw visi ŋaa'a, nisi vi labara kay slena ŋulo ma Lawn lumay hiɗi nisina. 5May sum sara sa hay vokŋa vi sa Farisena sa viyna kaw, yaw kulo'o di ala: La linigekaw sa waana nigi kaasi gosaya, gatsi kay hum kuɗ gatta vi Musus kaw. 6Sa Apostolayna hiɗi sa maariyana tok tuwsiya kay fek caw lawta kayni. 7Hay li ma nisi ci wayta ŋol cina, Peter fokay kulo'o ka disi ala: ɓosiyonna, nigi wi'e: Hay jew ɓa-ɓata, Lawna li vilekka jargiya, kay hay vunanu sa waana fi hum yoboyna vi labara ma firina, nisi as vi kaw. 8Lawna nam ma wi dikga, li di-goytawa tisiya, hay li ma nam vulsi Ŋusta-Peldetta ŋray ca ki nay nala. 9Nam may li ɓurawta jaray hiɗi nisiɗi, kay nam lisi diksiyawa goy peldete hiɗi vida. 10Nigi nem Lawna wulini, hay li ma nigi tun jukŋa ma sumiyaya hiɗi nay kaw as ziyimɗina kel sa hatayna kayn kay mige? 11May nay vi'e, nay suɗawa kaw, kuɗ slugota vi Bum-Sumuna Yesu, ŋray ca ki nisi nala kaw.

12Sumun kaf zan ɦim', nisi lakay kay hum labara ma Paulus hiɗi Barnabas ka visita kay ɗekka hiɗi gul-yalda kaf ma Lawna lum hiɗi nisiya jar sa waana. 13Hay li ma nisi ba vunsi bana, Yakub sli lawtiya di ala: 14Nigi ɓosiyonna, humangi hawtige! Simon vi labar ala ir litige hay sem ma jewna Lawna tuɗ tam sa waana, kay vilek jaf ma vuli goyo hay semda valamu. 15Kay yoboyna vi sa jobta-Lawna ŋray hiɗi kayni, ki ɗoy nala:

16Bugol kayni nan ma hotiya,

nan ma in guɗukŋa vi David ma ɦo gaana kulo'o,

nan ma in ɦota valam ma gaa kurɓucukŋa kulo'o.

Nan ma colom kulo'o,

17Kay caw sumuna ma hinina ma gar Bum-Sumuna,

jaf-sumuna kaf sa semda van ka yiy jarsina kaw,

18Din mi Bum-Sumuna,

Ma li slen ma san wumu hay vatɗita pa.#15:18 Fi kayni hay Am 9:11-12.

19Hay na'ta nan col lawta ala, nay ma mar nekka kay sa waana sa muɗ irsi tam Lawnɗi, 20may nay ma ɗo tisiya kay nisi ma tel tuwsi kay liwista vi lawayn ma waana, kay zlata-bulota, kay slen ma muruɗiyna, hiɗi busuwna kaw. 21Kay hay jafna ma kalay ɓa-ɓana, hay hoyok-ziyna kaf sum sa kus Mususna ka'a,#15:21 Musus tan kayni mi Vun-ma gatna. kay nisi ka jaŋam goyo hay sinagogayna hay sabatna kafe.

22Nala van kayni li ŋaa'a kir sa Apostolayna hiɗi sa maariyana, hiɗi sa tapna kaf kaw, kay vilek sara goy jarsiya, kay cuksi hay Antiokiya hiɗi Paulus hiɗi Barnabas, nisi vilek Yudas ma gileta valam Barsabas hiɗi Silas, sumuna sa ɓosiyosin tiysi sesiya. 23Nisi vulsi ɗerwelda ta ɗota haya' ɗoy ki kayn nala: Ɓosiyogina, sa Apostolayna hiɗi sa maariyana tam ɓosiyomana sa jar sa waana sa hay Antiokiya, sa hay Siriya hiɗi sa hay Kilikiya, gi-deɓta tigiya!

24Numa humi ala sum sara ays jarma pa, sa numa'a vulsi hagatis noŋɗi, nisi ɦiwirgi kulo hiɗi ɓakŋa visiya, ta-ta muɗ ciwta vigi yora. 25Nala, bugolda hay li ma varta vuma'a col zaw, van kayni ɗuw kirma ŋaa'a, kay vilek sumuna, cuksis hiɗi sa hayma kisina, Barnabas hiɗi Paulus, 26Nisi sa vul irita visi goyo, kay sem Bum-Sumuna vaya Yesu Kristu. 27Numa cuk Yudas hiɗi Silas ays tigiya, nisi ma di yoboyn namna kayni goy tigiya hiɗi vunsiya. 28Kay van kayni ɗuw ŋaa'a kir Ŋusta-Peldetta, kirma numa'a kaw, a tun slen ma nekŋa kigiya kayni may ŋaaɗi: 29Kayn ala, nigi ma tel tuwgiya kay sliwna ma liy goy ɗifin mi lawayn ma waana, kay busuwna, kay muuriyana ma muruɗiyna, kay zlata-bulota kaw; nigi ma li ŋaa'a hay li ma nigi ŋom tuwgiya kay kayni. Lakgi ŋaa'a!

30Sum nisina hinsiya, kal hay Antiokiya, nisi vul ɗerwelda mi vokŋa ma dakayna. 31Hay li ma nisi jaŋ ɗerwelda goy jaŋŋa, nisi li firi ŋolo kuɗ teŋ-irta kayni. 32Yudas hiɗi Silas, nisi ay sa jobta-Lawna kaw, nisi vul teŋ-irta tam ɓosiyosina, vulsi donota hay ɓakŋa ŋolo ŋolo kaw. 33Hay li ma nisi musi hiɗi nisiya ir liyn neeɗa, ɓosiyosina gisi cawsi goy hiɗi sle'ta, kay hot tam sa cuksi ay sunna. 34May Silas ɗuw kiram ŋaa'a kay hina. 35Paulus hiɗi Barnabas lakay hay Antiokiya, hiɗi sum sara ŋolo kaw, nisi ka hata, kus labara ma firina vi yoboyna Bum-Sumuna kaw.

Rogoyta ta ma'ta hay lopna vi sunda Paulus hiɗi Silas hay Asiya ta goota

Gal 4:13-15

36Buur neeɗa bugolda, Paulus di tam Barnabas ala: Hotay hay hoyok-ziyna ma nay kus yoboyna vi Bum-sumuni hayna pet, kay ɗuw ɓosiyayna la nisi ka lakay laktige kla. 37Barnabas min vi Yohana ma gileta valam Markus kuɗsiya; 38May Paulus ɗuw kayni, sa ma hinsi ay goyo hay Pamfiliya pana, nam min ala tapam kuɗsiɗi, kay nam min tap kuɗsi hay lopna visiɗi. 39Ci-wayta fokay kulo jarsi ŋolo, ta-ta nisi ɓuraw goyo. Barnabas vi Markus kuɗumu, nisi kal hay Kiprus. 40May Paulus vilek Silas, bugol ɓosiyomna vulum goy tam slugota vi Bum-Sumuna vulla, nam kal may. 41Nam raw hay Siriya hiɗi Kilikiya, nam vul donota mi sa ziyna-Lawna kaw.

Currently Selected:

LOPNA 15: Massana

Highlight

Copy