2 MULIYANA 16

Ahas mulla vi Yuda

2 Lml 28

1Co hay busata doogo yam siɗiyata vi Peka goora vi Remaliya kayni, Ahas goora vi Yotam mulla vi Yuda ti mulda. 2Busata vi Ahas asay dok-ma' hay li ma nam ti mulda. Nam ti mulda hay Yerusalem ir busat doogo yam karkiya. Nam min li sle ma ɗigera vok ir Ma-Vatɗin Lawna ki bulum David nala noŋɗi. 3Nam poy hay hagata vi muliyana vi Israyel; goora valam noŋ kaw nam ŋalam goy hay kuta, nam tap kuɗ liwista vi jaf sum sa Ma-Vatɗin digiɗsi vok gurona vi Israyel. 4Nam li ɗifini, ŋal urdin kaw kayn kulo kay liyn ma ɗiŋiriŋŋa, kulo kay hiɗiyna, gaa kuɗ gu-goɗayna kaf kaw.

5Ki kayn nala Retsin mulla vi Siriya, hiɗi Peka goora vi Remaliya mulla vi Israyel yaway kulo'o kay tuɗ dur Yerusalem. Nisi ŋuy Ahas, may nisi co a kol kalamɗi. 6Hay na'ta kayni, Retsin mulla vi Siriya kal Elat gaa kuɗ gaŋeraŋa vi Siriya. Yudiyana sa hay Siriya nam digiɗsi goyo, sum sa Siriyan co lak hay Elat. Nisi ka haya' lak ta-ta vaydi. 7Ahas cuk sumun kat Tiglat-Pileser mulla vi Asiriya kay dum ala: Nan mi sa ma sunda vaŋu, goora vaŋ kaw; naŋaya, butan goyo hay ɓam mulla vi Siriya hiɗi mulla vi Israyel, sa ka yaway kulo'o katanu. 8Ahas yaw doorota hiɗi ora ma ka hay ziyna vi Ma-Vatɗina, hiɗi timgilla vi ziyna vi mulla, nam li vulda-ɦawata tam mulla vi Asiriya hiɗi namu. 9Mulla vi Asiriya hum kayni; nam fokay kulo'o kat Damas, nam sla'a, sum sa haya'na nam kalsi hay Kir. Nam ci Retsin goyo may.

10Mulla Ahas kalay hay Damas, kay ŋaf hiɗi Tiglat-Pileser mulla vi Asiriya. Hay li ma nam wi giwin-ma-ɗifinna ma hay Damas, nam li ŋrata vi giwin-ma-ɗifin namna, ga' tam Uriyas kay nam ma kot giwin-ma-ɗifinna ŋray ca ki hena nala. 11Mul-ma-ɗifinna Uriyas kot giwin-ma-ɗifinna ŋray ca hiɗi ŋaɓta vi giwin-ma-ɗifinna ma mulla gumtay hay Damas nala. Mul-ma-ɗifinna kotom jew hotta vi Ahas hay Damas. 12Hay hotta valamu hay Damas, mulla wi giwin-ma-ɗifinna, nam co talamu, jik kulo kalamu; 13nam ŋal ɗifinna hiɗi sle ma vulda, yam mul kalamu, yam busuwna vi ɗifinna vi lop ma slugona kulo kay giwin-ma-ɗifinna. 14Giwin-ma-ɗifinna ma kawayna ma ka coli ɗiger vun ziyda vi Ma-Vatɗina nam jokom goyo, kay nam ma li coli jar giwin-ma-ɗifinna ma wulina hiɗi ziyna vi Ma-Vatɗinɗi; nam colom goy gal giwin-ma-ɗifinna ma wulina, hay gal ma gaana. 15Mulla Ahas vul dit kayni tam mul-ma-ɗifinna Uriyas ala: Naŋ ma ŋal ɗifin ma graw culumta hiɗi ɗifin ma vulatitna kulo kay giwin-ma-ɗifinna ma ŋolla, ɗifin ma ŋal-goyna vi mulla hiɗi sle ma vulda valamu, ɗifin ma ŋal-goyna vi sum sa hay nagat kaf hiɗi sle ma vulda, mul ma nisi maramna ɦokgit kalamu, busuwna vi faray ma ŋalam ɗifinna, hiɗi faray ma ŋatam ɗifinna kaw nigi ma yamam talam kafe; may giwin-ma-ɗifinna ma kawayna, ma li lop kalam mi nanu. 16Mul-ma-ɗifinna Uriyas tap kuɗ sle ma mulla Ahas dumna kafe.

17Mulla Ahas to kaway ma beɗayna ma gaa kuɗumna goyo, tasa ŋulo ma tuni kalamna nam yawam goyo. Ŋarakŋa ma tuni kay luway ma yori kawayna nam slum goy gaa'a, tunum gaa kay hiɗiyna. 18Vun-galana vi sabatna ma kalaf hay ziyna vi Ma-Vatɗina, ma nisi inim hay ziyna, hay liyn ma mulla kal goyna, nam muɗumu, kuɗ mulla vi Asiriya.

19Caw lopna vi Ahas ma hinina, sle ma nam lum kafna, kayni kay ɗoy hay ɗerwelda vi Labar-Ma-Liyna vi muliyana vi Yuda. 20Ahas miti kuɗ sumiyamu, nisi pum kat sumiyamu hay hoyok-ziyna vi David. Ezekiyas goora valamu ti mulda hay baŋalamu may.

Currently Selected:

2 MULIYANA 16: Massana

Highlight

Copy