2 MULIYANA 15

Azariya, mulla vi Yuda

2 Lml 26

1Co hay busata dok-ma' yam siɗiyata vi Yerobowam mulla vi Israyel kayni, Azariya goora vi Amatsiya, mulla vi Yuda ti mulda. 2Busata valam doogo yam karkiya hay li ma nam tun hay mulda. Nam ti mulda ir busat dok-vasl yam ma' hay Yerusalem. Sulum ya' Yekoliya, ti goot ta Yerusalemta. 3Nam li sle ma ɗigera kir Ma-Vatɗina, ŋray ca ki bulum Amatsiya li'ays nala. 4May liyn ma ini kulo ɗiŋiriŋŋa may vat goy noŋɗi; hay na'ta sumun ka li ɗifini, ŋal urdin kaw kayni kulo hay liy ma ɗiŋiriŋŋa. 5Ma-Vatɗina wat mulla, moy-kuturun vumu. Nam mus hay ziy ta goy va' kepta ta-ta hay buur ma mitta valamu. Yotam goora vi mulla ay tuni mi ma ŋolla hay ziyna, ka kitat sumun hay nagat kayn mi namu.

6Caw lopna vi Azariya ma hinina, sle ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Yuda. 7Azariya mitiya, nisi pum tam sumiyamu, hay hoyok-ziyna vi David. Goora valam Yotam ti mulda hay baŋalamu.

Zakariya mulla vi Israyel

8Co hay busata dok-ɦidi yam glafandita vi Azariya mulla vi Yuda kayni, Zakariya goora vi Yerobowam ti mulda kay sa Israyella hay Samariya. Nam ti mulda ir til karkiya. 9Nam li slen ma joo'o kir Ma-Vatɗina, ki sumiyam li'ays nala; suluk ma Yerobowam goora vi Nebat kal sum sa Israyel hayna nam min ja jaram goy hiɗi namɗi. 10Sallum goora vi Yabek fok lawt kalamu, calam gaa vok sumuna cap cum mati; mus mul hay baŋalamu may. 11Caw lopna vi Zakariya ma hinina, kayni ka ɗoy hay ɗerwelda vi Labar-Ma-Liyna vi Muliyana vi Israyel.

12Kay na'ta hob kayni mi vun sle ma Ma-Vatɗina dum tam Yehu ala: Gurona vaŋu ta-ta tam jaf ma fiɗina, ma lak kay zlamda-mulda vi Israyel. Nam li ki kayn nala.

Sallum mulla vi Israyel

13Sallum goora vi Yabek, ti mulda hay busata dok-ɦidi yam zleeŋeta vi Oziyas mulla vi Yuda. Nam ti mulda ir til kepe hay Samariya. 14Menahem, goora vi Gadi, fokay hay Tirsa pa, nam co hay Samariya, hay Samariya nam cal Sallum, goora vi Yabek, cum goy mati; nam ti mulda hay baŋalamu may. 15Caw lopna vi Sallum ma hinina, law ma nam fokomna, kayni ka ɗoy hay ɗerwelda vi Labar-Ma-Liyna vi muliyana vi Israyel.

16Menahem cal sum sa hay hoyok-ziyn Tifsak goy kafe, hiɗi naga ma kuɗa'na, tun caw ay hay Tirsa pa; nam cal sum sa hayna kay nisi may mal vun-galana visi goyɗi, boy sa hayna kaw nam munsi haysi goy kafe.

Menahem, mulla vi Israyel

17Hay busata dok-ɦidi yam zleeŋeta vi Azariya mulla vi Yuda, Menahem goora vi Gadi ti mulda kay Israyel. Nam ti mulda hay Samariya ir busat doogo. 18Nam li sle ma joo'o kir Ma-Vatɗina, hay buura vi irita valam kaf kayni, suluk ma Yerobowam goora vi Nebat kal sum sa Israyel hayamna, nam min ja jaram goy hiɗi namɗi. 19Pul mulla vi Asiriya co hay nagata; Menahem vulum gurjuta ir talente birim kepe, kay Pul ma gutumu a muɗ mulda hay ɓalam dono'o. 20Menahem tar gurju na'ta kayni hay ɓam sum sa Israyel kaf sa ka hiɗi farayn hay ɓisiya, kay nam min vulum mi mulla vi Asiriya. Gigekaw nam yaw gurjut hay ɓalam ir sikel dok-vasl dok-vasl. Ki kayn nala mulla vi Asiriya kaliya, nam min col hay nagata loɗi.

21Caw lopna vi Menahem ma hinina, hiɗi sle ma nam lum kafna, kayni ka ɗoy hay ɗerwelda vi Labar-Ma-Liyna vi Muliyana vi Israyel. 22Menahem miti kuɗ sumiyamu, goora valam Pekakiya ti mulda hay baŋalamu may.

Pekakiya, mulla vi Israyel

23Co hay busata dok-vaslta vi Azariya mulla vi Yuda kayni, Pekakiya goora vi Menahem ti mulda kay Israyel hay Samariya. Nam ti mulda ir busat ma'. 24Nam li slen ma joo'o kir Ma-Vatɗina; suluk ma Yerobowam goora vi Nebat kal sum sa Israyel hayamna nam min ja jaram goy hiɗi namɗi. 25Peka goora vi Remaliya, soje ma ŋolla valamu fok lawt kalamu; nam calamu hay Samariya, hay ziyna ma mulda, Argob hiɗi Ariye kaw, sumun sa jar gurona vi Galaadna ka kuɗum dok-vasl. Ki kayn nala nam ci Pekakiya goyo, nam vurna baŋalamu hay mulda may. 26Caw lopna vi Pekakiya ma hinina, slen ma nam lum kafna, kayni ka ɗoy hay ɗerwelda vi Labar-Ma-Liyna vi gurona vi Israyel.

Peka, mulla vi Israyel

27Hay busata dok-vasl yam ma'ta vi Azariya mulda vi Yuda, Peka goora vi Remaliya ti mulda kay sa Israyella hay Samariya. Nam ti mulda ir busat dok-ma'. 28Nam li slen ma joo'o kir Ma-Vatɗina, suluk ma Yerobowam kal sum sa Israyel hayamna nam min ja jaram goy hiɗi nam noŋɗi. 29Hay liyna vi Peka mulla vi Israyel kayni, Tiglat-Pileser mulla vi Asiriya co'o, nam sli Iyon, Abel-Bet-Maaka, Yanowa, Kedes, Hatsor, Galaad hiɗi Galileya, nagata vi Neftali noŋ kafe, sumun noŋ kaf nam kalsi gorvo'o hay Asiriya. 30Hoseya goora vi Ela, fok lawt kay Peka goora vi Remaliya, nam calamu, cap cum mati; nam ti mulda hay baŋalamu. Kayni hay busata dok-ma'ta vi Yotam goora vi Oziyas. 31Caw lopna vi Peka ma hinina, slen ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Israyel.

Yotam mulla vi Yuda

2 Lml 27

32Co hay busata ma'ta vi Peka goora vi Remaliya mulla vi Israyel kayni, Yotam goora vi Oziyas mulla vi Yuda ti mulda. 33Nam muɗ mul kayni busata valam asay dok-ma' yam vasl. Nam ti mulda hay Yerusalem ir busat doogo yam karkiya. Sulum ya' Yerusa goota vi Sadok. 34Nam li sle ma ɗigere kir Ma-Vatɗina; nam li ŋray ca ki bulum Oziyas li'ays nala. 35May liyn ma kulo ɗiŋiriŋŋa may vat goy noŋɗi, sumun li ɗifini, ŋal urdi kaw kayn kulo kay liyn ma ɗiŋiriŋŋa. Yotam in vun-galana vi ziyda ŋolda vi Ma-Vatɗina. 36Caw lopna vi Yotam ma hinina, sle ma nam lum kafna, kayni ka ɗoy hay ɗerwelda vi Labar-Ma-Liyna vi Muliyana vi Yuda.

37Hay li namna kayni, Ma-Vatɗina tun caw gi Retsin mulla vi Siriya kat Yuda, hiɗi Peka goora vi Remaliya kaw. 38Yotam miti kuɗ sumiyamu, nisi pum kat sumiyamu hay hoyok-ziyna vi bulum David. Ahas, goora valamu ti mulda hay baŋalamu may.

Currently Selected:

2 MULIYANA 15: Massana

Highlight

Copy