1 TESALONIKŊA 5
5
Buurta vi Bum-sumuna, musta-jigerta
Mat 24:36-51; Luk 12:35-40; Rom 13:11-14
1Ɓosiyonna, kay liyna hiɗi ŋaɓta vi liyna kayni, nam mi va ɦawa a sa ɗo tigi kalamu. 2Kay nigi kay tuwgi wi goy haraŋ ala buurta vi Bum-Sumuna co ɗawn ki sa ma kulla hay henjet nala. 3Hay li ma sumuna ma tun caw di ala toyta, va ma joo mayɗi! Ki vunay ma diyn nala, ɓulakka ma nig kisiya ki tuw-tita vi cata hayta nala, nisi ma pir goy noŋɗi.
4May nigiya, ɓosiyonna, nigi may hay jufundaɗi, a buur na'ta ma co kigiya ki sa ma kulla naɗi; 5kay nigi kaf si gurona vi haraŋa, gurona vi falayta kaw. Nay may vi henjetaɗi, vi jufundaɗi kaw. 6Kalay sene ki segena naɗi, may lakay jigere, lakay ŋali kaw. 7Kay nisi sa kal sene, kal sen henjeta, nisi sa ɦiwir kuɗ dolayna, ɦiwir henjeta kaw. 8May nay sa fi falaytna, lakay ŋal klas', cukay ŋoŋŋa vi vida hiɗi minda taya, cubta-sle'ta vi su'da ki ŋalayta duura nala. 9Kay Lawna vilekay goyo tam ɦiydaɗi, may kay fi su'da kuɗ Bum-Sumuna vaya Yesu Kristu, 10Nam ma miti kaya, kay la nay ka iriya, la nay mitiya kaw, nay ma lak iriya hiɗi namu. 11Kay na'ta, teŋgi irgiya jar-tuwgiya, ingi tuwgi kulo jar-tuwgiya, ki nigi li jew nala.
Gatta ma cawna hiɗi gi-deɓta
Rom 12:17-21
12Numa siɗawgiya, ɓosiyonna, kay nigi ma var ŋaa'a kay nisi sa li lop vokgina, sa ka ŋomgi hay Bum-Sumuna, sa ka hatgina kaw. 13Slisi yisi kulo ŋaa'a hay minda, kuɗ lopna visiya kaw.
Lakgi hay toyta jar-tuwgiya.
14Numa digiya bosiyonna, gatgi nisi sa poy hay gijum-gijumta. Teŋgi ir nisi sa ka hay makka, gutgi kuɗ sa maŋayna, ligi kaf hiɗi ŋalda.
15Ligi ŋali a sana ma hot joota kay jootaɗi; may gargi ŋaata dok-doko, jar-tuwgiya lebo tam segena.
16Firigiya dok-dok.
17Siɗawgi dok-dok. 18Gigi deɓ hay slen pet; kay kayni mi minda vi Lawna kigiya hay Kristu Yesu.
19Tewgi Ŋusta goyɗi. 20Nigi ma ɗuw yoboyna jobta-Lawna birek-cekɗi; 21may wakgi slen kaf, vigi sle ma ŋaan dono'o; 22Tel tuwgi kay joota kuɗ jafa' pet.
23Lawna vi toyta, nam kay tuwamu ligi goy peldet kafe, ŋusta, ciwta hiɗi tuwgi kaf ma li ŋomi bay joota ta-ta hay mata vi Bum-Sumuna vaya Yesu Kristu. 24Nam ma yigiyawa nam ɗigere, mi namu ma min li kayni.
25Ɓosiyonna, siɗawgi kuma'a.
26Gigi deɓ mi ɓosiyayn kaf hiɗi ŋaf-vunda ta peldetta.
27Nan digi hay sem Bum-Sumuna, a ɗerwelda kayni nigi ma jaŋa' goy vok ɓosiyayn kaf.
28Slugota vi Bum-sumuna vaya Yesu Kristu mus hiɗi nigi kafge.
Currently Selected:
1 TESALONIKŊA 5: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
