1 TESALONIKŊA 4

Gatta kay lak hay peldetta

1 Pet 1:1-16; 4:1-5; Efes 5:3-8; 1 Kor 6:13-20

1Ɓosiyonna, ma hinin kayni numa siɗawgiya, gatgi kaw hay Bum-Sumuna Yesu: Ki nigi hat kuɗma nala, ir nanige nigi as poy ŋaa'a vok Lawna ki nigi poyay jew nala. Nigi ma jor vokgiya vokgiya. 2Kay nigi wi gatta ta may tam Bum-Sumuna vaya Yesu ta numa vulgita. 3Va ma Lawna minim kayni ti lita goy peldetta vigiya; kay nigi ma tel tuwgiya kay zlata-bulota; 4kay gigekaw jargiya ma ŋom tuwam ŋaa'a hay peldetta hiɗi pasiyakka. 5a vul tuwam goy hay darta vi bulota ki sa waana sa wi Lawnɗina ka li nalaɗi. 6A san gigekaw li va ma guniya tam ɓasulumna hay slenɗi, li joot talamɗi kaw, kay Bum-sumuna ma ka kitata kay slen kayni kaf, ki numa digitawa goy jewe, li di-goytawa kalamu kaw nala. 7Kay Lawna yay kay liwistaɗi, may kay lita goy peldetta. 8Kay na'ta sa ma noy gatta kayni goyo, nam noyom goy mi sanaɗi, may nam noyom goy mi Lawna ma vulgi Ŋusta-Peldetta valamawa.

9May kay minda ta jar ɓosiyom-tuwsina kayni sa as ɗo tigi ka' loɗi, kay nigi kay tuwgi hatawa kuɗ Lawna kay minda ta jar-tuwgita; 10Kayni mi va ma nigi ka li tam ɓosiyay sa hay Makedoniya noŋ kafna. May ɓosiyoma'na, numa gatgiya, kay nigi ma ɦur kayni vok ŋol suwa, 11a tun ŋalda vigiya kay lak hay toyta, a nigi ma tun varta vigiya kay slena vigiya, li lop hiɗi ɓigiya kaw, ki numa'a gatgiyay nala; 12Kayni kay nigi ma ɗek tuwgi tam sa goyna ala nigi poy hay liyam ɗiger, nigi may gar va kay sa noŋɗi.

Dayta-kulota

1 Kor 15:19-58

13Ɓosiyonna, numa may min ala nigi lak hay bay-wida kay sa kalay sennaɗi, a nigi ma yor tuwgiya ki segena sa bay cubta-sle'ta naɗi, 14Kay, la nay vi ala Yesu mitiya, nam dayay kulo'o kaw, nay as vi kaw ala sa kalay senna, Lawna ma hotsiyay kulo iriya hay Yesu, tapay hiɗi namu kaw.

15Kay na'ta, kayni mi va ma numa dum tigiya, kuɗ yoboyna vi Bum-Sumuna: Nay sa ka iri tuwa, sa hini cub mata vi Bum-Sumuna, nay ma kal vok sa kalay senna noŋɗi. 16Kay Bum-Sumuna kay tuwamu ma jikay gaa wuralawn pa, hiɗi ɗekka, hiɗi siwelda vi della vi sunda-wuralawna ma ŋolla, hay buwna vi togolomna vi Lawna, sa miti hay Kristuna ma day kulo jewe. 17Bugol kayni, nay sa hini irina, nay ma yaways kulo hay ɗugulla hiɗi nisiya, kay ŋaf ir Bum-Sumuna hay simeɗna, hay na'ta kayni nay ma lak dok-dok hiɗi Bum-Sumuna. 18Teŋgi irgi jar-tuwgi teŋe hay yoboyna kayni.

Currently Selected:

1 TESALONIKŊA 4: Massana

Highlight

Copy