Zacarías 8
8
Jerusalén musoqmanta hatarichisqa kananmanta
1Tukuy Atiyniyuq Tayta Diosmi rimapayawaspan kaynata niwarqa:
2Tukuy Atiyniyuq Tayta Diosmi kaynata nin:
Sión llaqtataqa ñoqallapaqñam munani,
tukuy sonqoywanmi kikillaypaqña munani, nispa.
3Tayta Diosmi kaynata nin:
Sión llaqtatam musoqmanta hatarichisaq,
hinaspaymi chawpinpi yachakusaq,
Jerusalén llaqtam cheqapwan,
Tukuy Atiyniyuq Tayta Diospa orqonwan,
chuyanchakuna orqowan sutichasqa kanqa.
4Tukuy Atiyniyuq Tayta Diosmi nin:
Jerusalén llaqtapa plazankunapim,
machuchakunawan payachakuna
huktawan tiyanqaku.
Sinchi yuyaqña kasqankuraykum
sapakama tawnayuqkama kanqaku.
5Callenkunapipas qari warmakunam
warmi warmakunam huntarinqaku,
hinaspam plazankunapi pukllakunqaku, nispa.
6Tukuy Atiyniyuq Tayta Diosmi kaynata nin:
Sichum tukuy kaykuna,
chay tiempopi puchuq runaykunapaq
mana ruway atinapaq hina rikchakuptinpas,
ñoqapaqqa manam sasachu kanqa, nispa.
7Tukuy Atiyniyuq Tayta Diosmi kaynata nin:
Ñoqapunim llaqtayta libramusaq,
intipa qespimunan lawpi nacionkunamanta,
intipa seqaykunan lawpi nacionkunamantapas.
8Kutichimuptiymi Jerusalenpi yachakunqaku,
paykunam kanqa llaqtay,
ñoqañataqmi Diosninku kasaq,
paykunam ñoqapi hapipakunqaku,
ñoqañataqmi nanachikuqninku kasaq, nispa.
9Tukuy Atiyniyuq Tayta Diosmi kaynata nin:
Chaynaqa, temploy musoqmanta hatarichisqa kananpaq cimientonkuna churasqa kasqanmanta kay punchawkunakama profetakunapa willakuyninta uyariqkuna kallpanchakuychik. 10Kay punchawkunakamaqa, runakunapas, uywakunapas, manam pagota chaskirqakuchu, enemigonkuraykum runakunapas hawkaqa mana puririyta atirqakuchu; runakunatapas runamasinpa contranpim churarurqani. 11Kunanmi ichaqa runaykunamanta puchuqkunata manaña ñawpaqta hinañachu ruwasaq. 12Aswanqa chawpinkupi hawkayay kaptinmi, uvaspas sumaqllataña rurunqa, allpapas achkanpim rurunqa, cielokunapas sullantam chayachimunqa. Tukuy chaykunatam munaychakunankupaq kay llaqtamanta puchuqkunaman qosaq. 13Judá nacionpi, Israel nacionpi yachaqkuna, imaynam huklaw nacionkunapi ñakasqa karqankichik, kunanñataqmi salvaykuspay bendición kanaykichikpaq churasqaykichik. Chaynaqa, ama manchakuspa kallpanchakuychik, nispa.
14Chaynaqa, Tukuy Atiyniyuq Tayta Diosmi kaynata nin:
Ñawpaq taytaykichikkuna piñarachiwaptinmi paykuna castigaruyta tantearurqani, manam llakipayarqanichu. 15Kunanmi ichaqa Jerusalentawan Judá nacionta yanapaytaña tantearuni. Ama manchakuychikchu. 16#Ef 4.25.Chaynaqa, kaykunata ruwaychik: Runamasikichikwan cheqap kaqta rimaychik, mana pimanpas sayapakuspa allin arreglota ruwaychik, cortekunapipas hawkayayta maskaychik. 17Ama runamasikichikpa contranpi mana allin ruwayta piensaychikchu, amataq yanqamantapas juraychikchu. Tayta Diosmi nin: Tukuy chaykunatam ñoqaqa cheqnini, nispa.
18Tukuy Atiyniyuq Tayta Diosmi nin: 19Tawa kaq killapi, pichqa kaq killapi, qanchis kaq killapi hinaspa chunka kaq killapi ayuno ruwasqaykichikmi kusikuymanña tikrakunqa, Judá nacionpaqmi hatun kusikuy fiestamanña tikrakunqa. Chaynaqa, cheqap kaqtawan hawka kawsakuyta kuyaychik, nispa.
20Tukuy Atiyniyuq Tayta Diosmi kaynata nin: Achkallaña llaqtakunamantam llapa runakuna hamunqaku. 21Hinaptinmi huk llaqtapi yachaqkuna huklaw llaqtapi yachaqkunata ninqaku: “Bendeciykuwananchikpaq Tukuy Atiyniyuq Tayta Diosta mañakuq hakuchik nispanku, hinaptinmi wakinñataq ninqaku, ñoqaykupas risaqkum”, nispanku. 22Hinaspam achkallaña nacionkunawan nana-nanaq llaqtakuna Jerusalén llaqtaman hamuspanku, Tukuy Atiyniyuq Tayta Diosta maskaspa bendicionninta mañakunqaku, nispa. 23Tukuy Atiyniyuq Tayta Diosmi kaynata nin: Chay punchawkunapim, tukuy rikchaq rimayniyuq huklaw nacionkunamanta chunka runakuna, Judá nacionniyuq runata capanmanta hapipakuruspa ninqaku: “Qamkunawan riytam munaniku, qamkunawan Dios kasqantam uyariruniku”, nispanku.
Currently Selected:
Zacarías 8: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
