Romanos 4

Abrahampa iñiyninmanta

1¿Imatataq ñawpaq taytanchik Abraham tarirurqa? 2Imapas ruwasqallanwan Abrahamta Dios chaskiptinqa alabakunmanchá karqa, ichaqa manam Diospa qayllanpichu. 3#Gn 15.6; Gl 3.6.Qellqapas kaynatam nin:

“Abrahamqa Diospi iñisqanraykullam

mana huchayuqpaqña chaskisqa karqa”, nispa.

4Chaynaqa, llamkaqqa pagontam chaskin, ichaqa manam regalota hinachu aswanqa llamkasqanmantam. 5Aswanqa pipas mana llamkachkaspalla Diosman iñikuptinqa mana huchayuqpaqñam chaskin. Iñiptillankum huchasapakunatapas Diosqa mana huchayuqtaña ruwan. 6Davidmi rimarqa imatapas mana ruwachkaptillan mana huchayuqpaqña Diospa chaskisqan kusikuyniyuq runamanta. 7Paymi kaynata nirqa:

¡Mayna kusisqam huchankunamanta pampachasqa runaqa

Mayna kusisqam huchankunamanta chuyanchasqa runaqa!

8 # Sal 32.1-2. ¡Mayna kusisqam kanqa mana huchayuqpaqña Diospa hapisqan runaqa! nispa.

9Hinaptinqa, ¿kay kusikuyniyuq kayqa qari kayninkupi señalasqa judiokunallapachu icha mana señalasqa kaqkunapaqwanchu? Ñam nirqanchikña Abrahampas iñisqanraykulla mana huchayuqpaqña Diospa chaskisqan kasqanmanta. 10¿Haykapitaq chayna karqa? Abrahamtaqa chaskirqa ¿qari kayninpi señalasqa kachkaptinñachu icha manaraq señalasqa kachkaptinchu? Manaraq señalasqa kachkaptinmi. 11#Gn 17.10.Chaymantañam Abrahamqa señalachikurqa iñisqanrayku mana huchayuqpaqña Diospa chaskisqan kasqanta qawachikunanpaq. Chaynapim Abrahamqa mana señalachikuq llapallan iñikuqkunapa taytankuña rikurirun. Chayna iñikuptillankum Diosqa paykunatapas mana huchayuqpaqña chaskin. 12Arí, Abrahamqa señalasqa judiokunapapas taytanmi, manataqmi haykam señalasqakunallapaqchu, aswanqa haykam taytanchik Abrahampa manaraq señalachikuchkaspa iñiynin qatiqkunapapas taytanmi.

Diospa promesantaqa iñikuspalla chaskisqanchikmanta

13 # Gl 3.29. Diosmi kay pachata herencianku kananpaq Abrahammanwan mirayninkunaman prometerqa. Ichaqa kay promesataqa qorqa manam leyta kasukuptinkuchu aswanqa iñisqakuraykullam. 14#Gl 3.18.Leyta kasukuqkunalla herenciata chaskiptinqa yanqapaqñam iñikuyqa kanman, hinaptinqa Diospa promesanpas manachá valenmanchu. 15Leyqa castigotam apamun, mana leypa kasqanpim ichaqa mana ima pantaypas kanchu.

16 # Gl 3.7. Chaymi iñiptillan promesatapas Diosqa Abrahamman qorqa regalota hina llapallan mirayninkunapaqpas cheqaptapuni chay promesa kananpaq. Kaytaqa nichkani, manam leyta kasukuqkunallapaq chay promesa kasqantachu, aswanqa Abraham hina llapallan iñiqkunapaqpas kasqantam. Chaynapim Abrahamqa llapallanchikpa taytanchik. 17#Gn 17.5.Qellqapipas kaynatam nin:

Achka nacionkunapa taytan kanaykipaqmi churayki, nispa.

Abrahammi creerqa wañuqkuna kawsarichiq Diospi hinaspa imapas manaraq kaqkunamantam riman, yaqapas kachkanmanñapas hina.

18 # Gn 15.5. “Churiyqa manam kanmanñachu” nichkaspapas Abrahamqa Diospa prometesqanpi confiakuspam churin kananta suyarqa. Chaynapim Diospa nisqanman hina “Abrahamqa achka nacionkunapa taytan karqa”. Diosqa kaynatam nirqa:

Mana yupay atinam miraynikikuna kanqa, nispa.

19 # Gn 17.17. Yaqa pachak watayuqña kachkaptinpas Abrahampaqa manam iñiyninqa pisirqachu. Payqa yacharqam kikinpas chaynataq warmin Sarapas wañusqa hinaña kasqankuta, paykunaqa llumpay yuyaqñam karqaku. 20Manapunim iskayrayarqachu, aswanqa Diospa prometekusqanpi confiakuspam kallpanchakuspa Diosta yupaycharqaku. 21Chikantapas mana iskayrayaspam nikurqa:

Diosqa llumpay atiyniyuqmi imam prometekusqantaqa cumplinqapunim, nispa.

22Chaymi Abrahamqa iñisqanrayku mana huchayuqpaqña chaskisqa karqa.

23Chayna Qellqasqaqa karqa manam Abrahamllapaqchu, 24aswanqa ñoqanchikpaqwanmi. Señorninchik Jesús kawsarichiq Diosman iñikuptillanchikmi payqa mana huchayuqpaqña chaskiwanchik. 25Diospa munasqanman hinam Jesusqa huchanchikrayku wañuspan kawsarimurqa, chaynapi mana huchayuqña Diospa chaskisqan kananchikpaq.

Currently Selected:

Romanos 4: RCHQ2

Highlight

Copy