Romanos 3

1Hinaptinqa, ¿imapaqtaq judío kayqa allin? ¿Imapaqtaq qari kayninpi señalasqa kaypas allin? 2Arí, allinpunim. Puntataqa judiokunamanmi Diospa palabran qomusqa karqa. 3Hinaptinqa, ¿paykunamanta wakiqninku mana kasukuq kasqankuraykuchu Diospas qepanchakurunqa? 4#Sal 51.4.Manam, llapallan runakunaña llulla kachkaptinkupas aswanraqmi Diosqa cheqap kaqwan imatapas ruwan. Chuya Qellqapim kaynata nin:

“Cheqap rimaq kasqaykitam reqsichikunki,

chaynapim juzgasqa kaspaykipas vencenkipuni”, nispa.

5Huchasapa kasqanchikmi reqsichiwanchik Diosqa mana pimanpas sayapakuspa juzgasqanta, hinaptinqa ¿imanisuntaq? Chaynaqa, huchanchikmanta Dios castigawaspanchikqa ¿cheqniwaspanchikchu chayta ruwanman? (Chaytaqa runa hinallam rimachkani). 6¡Manapunim! sichum pimanpas Dios sayapakuq kaspaqa ¿imaynataq llapa runakunata juzganman?

7Sichum ñoqapa llullakusqay Diospa cheqap kaqninkunata reqsichinman chaynapi Dios hatunchasqa kananpaq, hinaptinqa ¿imanasqataq huchasapata hinaqa juzgawanku? 8Chayna kaptinqa ¿imanasqataq mana allin kaqkunata mana ruwanchikchu allin kaqkuna hamunanpaq? Chaynata nispankum yanqamanta achkaq cargochawanku. Paykunam ninku: “Pablom chaynata yachachichkan” nispanku; chayna runakunaqa condenasqayá kachunku.

Lliw runakuna huchayuq kasqanchikmanta

9Chaynaqa, ¿judiokunachu wakin runakunamanta aswan allin kanchik? ¡Manapunim! Ñam yachanchikña, judiokunapas chaynataq mana judiokunapas huchapa watasqan kasqanchikta.

10Chuya Qellqapim kaynata nin:

Manam hukllapas allin ruwaqqa kanchu,

11manam pipas yachayniyuqqa kanchu,

manataqmi pipas Diostaqa maskanchu.

12 # Sal 14.1-3; 53.1-3. Llapallankum pantay ñanta pasakunku,

llapallankum mana allinman wichiykunku,

manam pipas allin ruwaqqa kanchu,

manam hukllapas kanchu.

13 # Sal 5.9. # Sal 140.3. Rimasqankupas sepultura hinam,

qallunkuwanmi llullakunku,

siminkumantapas maqta urupa venenon hinam lloqsimun.

14 # Sal 10.7. Rimankupas ñakaytawan piñakuyllatam.

15Chakinkupas runata wañuchinanpaqmi utqayman kallpan.

16Ñanninkupipas purmachiywan wakchayayllam kachkan.

17 # Is 59.7-8. Hawkayay ñantapas manam reqsinkuchu.

18 # Sal 36.1. Dios manchakuytapas manam yachankuchu, nispa.

19Yachanchikmi leypa nisqanqa leyman hina kawsaqkunapaqmi qosqa karqa, chaynapi siminku wichqasqa kananpaq hinaspa llapallan runakuna Diospa juzgasqan kanankupaq. 20#Sal 143.2; Gl 2.16.Leyman hinaqa manam pipas Diospa qayllanpiqa mana huchayuqqa kanmanchu, leyqa huchayuq kasqanchiktam reqsichiwanchik.

Iñispalla salvasqa kasqanchikmanta

21Kunanmi ichaqa, manaña leyman hinañachu imaynam mana huchayuqpaqña chaskiwasqanchikta Dios reqsichiwanchik. Chaytam leywan profetakuna kaynata nin: 22#Gl 2.16.Jesucristoman iñikuptillanchikmi Diosqa llapa runakunata mana huchayuqtaña ruwawanchik. Manam imananchu pim kasqanchikpas. 23Llapallankum huchallikurunku, Diospa kanchariq qayllanmantam qarqosqa kachkanku. 24Diosmi ichaqa kuyapayakuyninpi mana imallapaq, Cristo Jesús rantinchikpi wañusqanrayku mana huchayuqtaña ruwaykuwanchik. 25Diosmi ñawpaq huchanchikkunata pampachawananchikpaq Jesucristota churarqa, wañuspa yawarnin chaqchusqanwan salvasqa kananchikpaq, chaytaqa iñiyllawanmi haypanchik. Chaynatam Diosqa pacienciayuq kasqanta qawachiwanchik. 26Kunanmi ichaqa huchanchikkunata pampachawaspanchik haykam Jesusman iñikuqkunata mana huchayuqpaqña Dios chaskiwanchik. Chaynapim justo kasqanta qawachiwanchik.

27Hinaptinqa, Diospa qayllanpi runapa hatun tukuyninqa ¿maypitaq kachkan? ¡Chayqa chinkasqañam! ¿Imanasqa? Manam leyta cumplisqanraykuchu, aswanqa iñisqanraykullam. 28Chaynapim yachanchik, runakunaqa iñiyllawan mana huchayuqpaqña Diospa chaskisqan kasqanta. Chayqa manam leyta kasukusqanraykuchu.

29Chaynaqa, Diosqa ¿judiokunapa Diosnillanchu? ¿Manachu wakiq runakunapapas Diosninku? Arí, paykunapapas Diosninkum. 30Diosqa chullallam. Chaymi pipas iñikuptinqa mana huchayuqpaqña chaskin, qari kayninpi señalasqa judío kaptin otaq mana señalasqa kaptinpas. 31Chaynaqa, iñispallanchik salvakuspaqa ¿mana valeqpaqñachu leyta hapichwan? ¡Manapunim! Aswanqa valorninta reqsispam allinpaq hapinchik.

Currently Selected:

Romanos 3: RCHQ2

Highlight

Copy