Romanos 2

Diospa imaynam juzgananmanta

1 # Mt 7.1; Lc 6.37. Chaynaqa, manam imananchu pim kasqaykipas, sichum runamasikita juzgaspaqa, paykuna hina huchallikusqaykiraykum kikillayki sentenciakuchkanki; chayraykum mana imayna librakuyta atiwaqchu. 2Yachasqanchikpi hinapas, mana allin ruwaqkunataqa Diosmi cheqap kaqwan juzganqa.

3Chaynaqa, runamasikita juzgachkaspa qampas paykuna hina ruwachkaspaqa ¿piensankichum Diospa juicionmanta lluptiruyta? 4¿Icha Diospa hatu-hatun kuyakuynintawan pacienciantachu wischupakunki? ¿Manachu yachanki paypa kuyakuyninqa wanakuyman pusasusqaykita? 5Ichaqa rumi sonqo kaspayki hinaspa mana wanakuyta munaspaykim, juicio punchawpi castigasqa kanaykipaq Diospa piñakuyninta kikillayki huñukuchkanki. Chay punchawpim cheqap kaqman hina juzgasqanta Dios qawaykachikunqa.

6 # Sal 62.12. Paymi sapakamaman imam ruwasqankuman hina pagapunqa. 7Haykam allin ruwaypi takyaspa alabasqa kayta, hatunchasqa kayta hinaspa mana haykapipas wañuyta maskaqkunamanmi wiñay kawsayta qonqa. 8Kikillanpaq munaqkunatawan cheqap kaqkunata mana kasukuspa mana allinllapi puriqkunatam ichaqa piñakuywan castiganqa.

9Llapallan mana allin ruwaqkunapaqqa ñakariywan sasachakuymi kanqa, puntataqa kanqa judiokunapaqmi chaynataq mana judiokunapaqpas. 10Llapallan allin kaqkuna ruwaqkunamanmi ichaqa Dios qonqa hatunchasqa kayta, reqsisqa kayta hinaspa hawkayayta, puntataqa judiokunaman chaynataq mana judiokunamanpas.

11 # Dt 10.17. Diosqa manam pimanpas sayapakunchu.

12Moisespa leyninta mana yachachkaspa huchallikuqkunaqa, manam chay leyman hinachu juzgasqa kanqaku; leyta yachachkaspanku huchallikuqkunam ichaqa chay leyman hina juzgasqa kanqaku. 13Diosqa manam chay ley uyariqtachu mana huchayuqpaqqa hapin, aswanqa kasukuqkunatam.

14Sichum mana judío kaqkuna leyta mana yachachkaspankupas leypa nisqanta ruwanqaku hinaspaqa, mana leyniyuq kachkaspankupas kikinkuñam ley hina kikinkupaq rikurirunku.

15Paykunaqa imapas ruwasqankuwanmi, sonqonkupi Diospa leynin qellqasqa kasqanta qawachikunku. Kikinkupa concienciankuwan yuyaymanayninkum acusanqa huchayuq otaq mana huchayuq kasqankutapas.

16Chaynataqa ruwanqa Jesucristontakama llapallan runakunata Dios juzganan punchawpim. Chay punchawpim runapa sonqonpi pakasqa kaqkunatapas Dios juzganqa, imaynam kay allin noticia willakusqayman hina.

Judiokunata Dios juzgananmanta

17Qanmi “judiom kani” ninki, Moisespa leyninpim hapipakunki, hinaspam Diosmanta alabakunki; 18reqsinkim Diospa munakuynintapas, leymi yachachisunki allinnin kaqta akllakunaykipaq.

19Qanmi ñawsakuna pusaqpaq hapikunki, tutayaypi kaqkunapaqpas “achkiymi kani” ninkim. 20Mana yachayniyuqkunata hinaspa warmakunatapas allinta yachachiqpaqmi hapikunki. Chaynataqa piensanki Diospa leyninpi cheqap kaqkunata yachasqaykiraykum.

21Chaynaqa, wakinkunata yachachichkaspaykiqa ¿imanasqataq kikikitaqa mana yachachikunkichu?. “Amam suwakunkichu” nichkaspaykiqa ¿imanasqataq suwakunki?

22“Amam waqllikunkichu” nispa yachachichkaspaykiqa ¿imanasqataq waqllikunki?. Idolokunata cheqnichkaspaykiqa ¿imanasqataq templonpi kaqkunataqa suwakunki?

23Qanmi leykunamanta alabakunki ¿hinachkaspachum chay leyta mana kasukuspa Diosta penqayman churanki?. 24#Is 52.5.Chuya Qellqaqa allintam nin:

“Qamkunapa huchaykichikmantam mana judío kaqkuna Diosta kaminku”, nispa.

25Moisespa leyninkunata mana kasukuptikiqa yanqapaqmi qari-kaynikipi señalachikusqaykipas. Leypa nisqanta mana kasukuspaykiqa mana señalasqa hinam kanki.

26Sichum pipas mana señalasqa kachkaspan leyman hina kasukuspanqa, mana señalasqa kachkaspapas señalasqapaq hapisqam kanqa. 27Cuerponpi mana señalasqa kachkaspan leyta kasukuqqa, cuerponpi señalasqa kachkaspan chaynataq leyta yachachkaspan mana kasukuqtam juzganqa.

28Judío kayqa manam hawallamantachu, nitaqmi aychapi señalarachikuyllachu. 29Cheqap judío kayqa ukumantam, señalachikuypas sonqopim, chayqa Espirituman hinam, manam letraman hinachu. Chayna ruwaqtaqa manam runachu alaban aswanqa Diosllam.

Currently Selected:

Romanos 2: RCHQ2

Highlight

Copy