Números 32
32
Rubenwan Gad allpankuta mañakusqankunamanta
(Dt 3.12-22)
1Rubenpa chaynataq Gadpa mirayninkunam animalsapa kasqankurayku, Jazer lawpi hinaspa Galaad lawpi allpakunata animalkunapaq kusallaña kasqanta qawaykurqaku. 2Hinaspam Moisesman, sacerdote Eleazarman chaynataq llaqtapa kamachiqninkunaman rispanku nirqaku:
3Atarot, Dibón, Jazer, Nimra, Hesbón, Eleale, Sebam, Nebo hinaspa Beón lawpi 4allpakunatam Tayta Dios qechuruspan Israelpa mirayninkunaman qoykurqa. Chay allpakunaqa animalkuna uywanapaqpas allinmi; ñoqaykuqa achkallaña animalniyuqmi kaniku. 5Chaynaqa, ama hina kaspayá chay allpakunata qoykuwayku, chaynapi Jordán mayuta amaña chimpanaykupaq, nispanku.
6Chaymi Gadpa chaynataq Rubenpa mirayninkunata Moisés nirqa:
¿Aylluykichikkuna guerraman richkaptinchu qamkunañataq kaypi qepakuykunkichik? 7¿Imanasqataq Israelpa mirayninkunata hukmanyachinkichik Tayta Diospa qosqan allpaman mana rinankupaq? 8Chaynatam taytaykichikkunapas ruwarqaku Cades-barnea lawmanta wak chimpa allpata qawamunankupaq kachamuptiy. 9#Nm 13.17-33.Escol wayqokama chayaruspankum allpata qawaykamuspanku Israelpa mirayninkunata hukmanyachirqaku Tayta Diospa qosqan allpaman mana rinankupaq. 10Chayraykum Tayta Dios anchata piñakurqa, hinaspam juraspan kaynata nirqa:
11“Abrahamman, Isaacman hinaspa Jacobman juraspa prometesqay allpamanqa, Egipto nacionmanta lloqsimuq runakunaqa iskay chunka watayuqmanta hanaymanmi mana yaykunqakuchu, paykunaqa manam tukuy sonqonkuwanchu qatiwarqaku. 12Cenezeo Jefonepa churin Calebwan, Nunpa churin Josueyllam yaykunqaku. Paykunallam ñoqa Tayta Diostaqa tukuy sonqonkuwan qatiwarqaku”, nispa. 13#Nm 14.26-35.Chayraykum Tayta Dios anchata piñakurqa Israel runakunapa contranpi hinaspam tawa chunka wata chunniqpi purichirqa, paypa qayllanpi mana allin ruwaq miraykuna wañuspa tukunankukama. 14Yaw, huchasapa runakunapa mirayninkuna, qamkunaqa taytaykichiktañam qatipakuchkankichik, chaynapi Israel runakunapa contranpi Tayta Diosta astawan piñachinaykichikpaq. 15Tayta Diosmanta karunchakuptikichikqa huktawanmi chunniqpi saqerusunkichik. Qamkunaraykutaqmi kay llaqtatapas chinkarachinqa, nispa.
16Chaymi Rubenpa hinaspa Gadpa mirayninkuna Moisesman asuykuspa nirqaku:
Kaypiyá animalniykupa kanchanta perqarusaqku chaynataq aylluykupaqpas llaqtata hatarirachisaqku. 17Ñoqaykuñataqmi allinta armakuspa Israelpa mirayninkunapa ñawpaqninta risaqku, yachananku allpaman chayachinaykukama. Aylluykuñataqmi allin murallasqa llaqtakunapi qepanqaku kaylawpi yachaq runakuna mana atacarunanpaq. 18Israelpa mirayninkuna sapakama allpankuta chaskinankukamam wasiykumanqa mana kutimusaqkuchu. 19Jordán mayupa chimpanpiqa manañam paykunawan kuskaqa allpata mañakusqaykikuñachu, Jordán mayupa kaylawnin intipa qespimunan lawpi allpayku kasqanrayku, nispanku.
20Chaymi Moisés nirqa:
Chaynaqa, nisqaykichikpi hinayá allinta armakuspa guerrapi peleanaykichikpaq Tayta Diospa ñawpaqninta riychik. 21Tayta Diospa ñawpaqnintam llapallaykichik Jordán mayuta chimpankichik, hinaspam qayllanmanta enemigonkunata wischunankama chaypi kamunkichik. 22Chay allpakunata Tayta Dios qoykusuptikichikñam kutikamunkichik, chaynapim kay prometekusqaykichikmanta Tayta Diospaqpas chaynataq Israel miraykunapaqpas libreña kankichik, hinaptinmi kay allpaqa qamkunapaña kanqa imaynam Tayta Diospa nisqanman hina. 23Nisqaykichikta hina mana ruwaspam ichaqa Tayta Diospa contranpi huchallikunkichik, chaymantaqa cheqaptapunipas castigasqam kankichik. 24Chaynaqa, nisqaykichikpi hinayá aylluykichikpaq llaqtakunata ruwaychik hinaspa llapa animalnikichikpaqpas kanchanta ruwaychik, nispa.
25Hinaptinmi Moisesta Gadpa hinaspa Rubenpa mirayninkuna nirqaku:
Kamachiwasqaykikuman hinam ruwasaqku. 26Churiykuwan warmiykum ichaqa lliw animalniykupiwan Galaadpi qepanqaku. 27Ñoqaykuñataqmi llapallayku niwasqaykikuman hina guerrapi peleamunaykupaq allin armasqa Tayta Diospa ñawpaqninta risaqku, nispa.
28Chaymi sacerdote Eleazartawan Nunpa churin Josueyta hinaspa Israelpa mirayninkunapi kamachikuqkunata Moisés kaynata kunarqa:
29Sichum Gadpa chaynataq Rubenpa mirayninkuna guerrapaq armasqa qamkunawan kuska Tayta Diospa ñawpaqninta Jordán mayuta chimpaptinku, chay allpakuna makikichikpiña kaptinqa, Galaad allpatam paykunaman qonkichik. 30Mana peleaq rispankum ichaqa qamkunawan kuska Canaán allpapi tupaqninkuta chaskinqaku, nispa.
31Hinaptinmi Gadpa chaynataq Rubenpa mirayninkuna nirqaku:
Kay serviqnikikunaqa Tayta Diospa niwasqankuman hinam ruwasaqku. 32#Jos 1.12-15.Guerrapaq armasqam Tayta Diospa ñawpaqninta Canaán allpaman chimpasaqku, tupaqniyku allpam ichaqa Jordán mayupa kaylawninpi kanqa, nispa.
33Chaynapim Gadpa mirayninman, Rubenpa mirayninman chaynataq Joseypa churin Manasespa wakin mirayninman Moisés qorqa amorreokunapa reynin Sehonpa allpanta chaynataq Basán nacionpa reynin Ogpa allpanpa muyuriqninpi llaqtakunata. 34Chaymi Gadpa mirayninkuna musoqmanta kay llaqtakunata hatarichirqaku: Dibón, Atarot, Aroer, 35Atarot-sofán, Jazer, Jogbeha, 36Bet-nimra chaynataq Bet-aranta; chay llaqtakunatam murallayuqtakama ruwarqaku. Ovejankupa kanchantapas ruwarqakum. 37Rubenpa mirayninkunam musoqmanta kay llaqtakunata hatarichirqaku: Hesbón, Eleale, Quiriataim, 38Nebo, Baal-meón hinaspa Sibmata; chay llaqtakunata hatarirachispam musoq sutikunataña churarqaku.
39Manasespa churin Maquirpa mirayninkunam Galaad lawta hapikuykurqaku hinaspam chaypi yachaq amorreokunatapas qarqorurqaku. 40Chayraykum Manasespa churin Maquirpa mirayninkunaman Galaad lawpi allpata Moisés qoykurqa, hinaptinmi chaypiña yacharqaku. 41Manasespa miraynin Jairpas Galaad lawpi taksa llaqtakunatam hapikuykurqa, hinaspam “Havot-jair” nispa suticharqa. 42Nobapas Kenat llaqtatawan taksa llaqtankunatam hapikuykurqa, hinaspam kikinpa sutinwan “Noba” nispa suticharqa.
Currently Selected:
Números 32: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012