Marcos 12

Mana allin llamkaqkunawan rikchanachisqanmanta

(Mt 21.33-46. Lc 20.9-19)

1 # Is 5.1-2. Rikchanachiykunawan yachachispanmi Jesús nirqa:

Huk runam chakranpi uvasta plantaruspan muyuriqninta perqarachirqa, vino ruwananpaqpas huk pozotam ruwachirqa, hinaspam cuidanankupaq huk torretapas ruwachirqa. Chaymantam llamkaqkunaman chakranta arriendakuruspan karuta illarurqa. 2Cosecha tiempo chayaramuptinmi, arriendaqninkunamanta tupaqninta mañamunanpaq serviqninta kacharqa. 3Paykunañataqmi chay serviqninta hapiruspanku maqaparurqaku, hinaspam mana imayuqta kutirichirqaku. 4Chaymantam huknin serviqnintaña kacharqa, paytapas umanta pakiruspankum penqakuypaqta ruwarurqaku. 5Kaqllamantam huktaña kacharqa, hinaptinmi paytapas wañurachirqaku. Chaymantam achka serviqninkunataña kacharqa, hinaptinmi wakinta maqaparurqaku, wakintañataq wañurachirqaku.

6Chaynapim kuyasqan sapallan churillanña puchururqa, hinaptinmi paytaña kacharqa: “Churiytaqa respetanqakum” nispan. 7Ichaqa chay llamkaqkunam ninakurqaku: “Paymi herencia chaskiqqa, ñoqanchikña chakrawan qepakunanchikpaq wañurachisunchik”, nispanku. 8Chaymi hapiruspanku wañurachirqaku, hinaspam cuerpontapas chakramanta hawa lawman wischururqaku. 9Hinaptinqa ¿imatataq chay chakrayuqqa ruwanqa? Rispanmi chay llamkaqkunata wañurachinqa, hinaspam uvas chakrantapas hukkunamanña arriendakurunqa. 10¿Manachu Qellqapi leerqankichik:

“Perqaqkunapa wischupakusqanku rumim

cimientopa esquinan hapiq rumiña rikurirun.

11 # Sal 118.22-23. Kaytaqa Diosmi ruwarun,

chaywanmi llumpayta admirakunchik”, nispa, nisqanta?

12Hinaptinmi tapuqninkuna musyakururqaku Jesuspa rikchanachiy rimasqanqa paykunapa contranpi kasqanta, chaymi hapiruyta munarqaku; ichaqa llapa runakunata manchakuspankum mana ima ruwayta atispan pasakurqaku.

Impuesto paganamanta

(Mt 22.15-22. Lc 20.20-26)

13Jesusmanmi kachamurqaku wakin fariseokunatawan Herodespa wakin qatiqninkunata, imapas rimasqanpi pantarachispanku chaywan acusanankupaq. 14Chaymi hamuruspanku Jesusta nirqaku:

Yachachikuq, yachanikum qamqa cheqap rimaq kasqaykita, qamqa manam pimanpas sayapakunkichu, nitaqmi runatapas hawallantachu qawanki, aswanqa cheqap kaqwanmi Diospa ñanninmanta yachachinki. ¿Allinchu rey Cesarman impuesto pagay icha manachu? ¿Pagasaqkuchu icha manachu? nispanku.

15Jesusñataqmi paykunapa iskay uya kasqankuta yachaspan nirqa:

¿Imanasqataq pantachiwaypi rinkichik? Qollqeta apamuwaychik qawanaypaq, nispa.

16Aparamuptinkum paykunata Jesús tapurqa:

¿Pipa uyantaq hinaspa pipa sutintaq kay qollqepi kachkan? nispa.

Chaymi paykunañataq nirqaku:

Rey Cesarpam, nispanku.

17Hinaptinmi Jesusñataq nirqa:

Cesarpa kaqtaqa Cesarmanyá qoychik, Diospa kaqtapas Diosmantaqyá qoychik, nispa.

Chaynata niruptinmi llumpayta hukmanyarurqaku.

Wañuqkunapa kawsarimunanmanta

(Mt 22.23-33. Lc 20.27-40)

18 # Hch 23.8. Chaymantam wañuqkunapa kawsarimunanmanta mana creeq saduceokuna Jesusman hamururqaku, hinaspam kaynata tapurqaku:

19 # Dt 25.5. Yachachikuq, Moisespa qellqasqanpim nin: “Sichum casado runa manaraq churiyuq kachkaspa wañuruptinqa, wawqenmi viudanwan casarakunqa, chaynapi wañukuqpa miraynin kananpaq”, nispa. 20Wawqentin qanchis qarikunam karqaku. Piwi kaqmi casarakururqa, ichaqa manaraq churiyuq kachkaspam wañukurqa. 21Chaymi viudanwan qatiqnin wawqenña casarakurqa, ichaqa paypas mana churiyuqmi wañukurqa. Chaynallam pasakurqa kimsa kaq wawqenkuwanpas. 22Chaynallam qanchisnintinwan pasakurqa, ichaqa manam mayqanpapas churin karqachu. Chaymantam warmipas wañukurqa. 23Chaynaqa, wañuqkuna kawsarimuptinqa ¿mayqanninpa warmintaq kanqa qanchisnintinwan casarakuchkaptinqa? nispanku.

24Chaymi Jesusñataq nirqa:

Qamkunaqa Qellqapa nisqantapas chaynataq Diospa atiynintapas mana reqsisqaykichikraykum pantaypi kachkankichik. 25Wañuqkuna kawsarimuspankuqa manañam casarakunqakuchu nitaqmi casarachinakunqakuchu, paykunaqa hanaq pachapi angelkuna hinañam kanqaku. 26#Ex 3.6.Wañuqkuna kawsarimunanmantaqa ¿manachu Moisespa libronpi leerqankichik, rupachkaq tankar kichkamanta Dios rimapayamuspan: “Ñoqaqa kani Abrahampa, Isaacpa hinaspa Jacobpa Diosninmi” nispa, nisqanta? 27Diosqa manam wañusqakunapa Diosninchu, aswanqa kawsaqkunapa Diosninmi. Qamkunaqa hatun pantaypim kachkankichik, nispa.

Punta kaq kamachikuymanta

(Mt 22.34-40)

28 # Lc 10.25-28. Tapuqninkunata allinta Jesús contestarusqanta qawaykuspanmi, Diospa leynin yachachiqkunamanta hukninku asuykuspan tapurqa:

Llapan kamachikuykunamantaqa ¿mayqantaq punta kaq kamachikuy? nispa.

29Chaymi Jesusñataq nirqa:

Kamachikuykunamanta punta kaqqa kaymi: “Israel, uyariy: Señorninchik Diosqa, Señorninchikqa chullallam. 30#Dt 6.4-5.Chaynaqa, Señor Diosnikitam tukuy sonqoykiwan, tukuy vidaykiwan, tukuy yuyaynikiwan hinaspa tukuy kallpaykiwan kuyanki”, nispa. 31#Lv 19.18.Iskay kaqñataqmi nin: “Runamasikitam kikikita hina kuyanki”, nispa. Kaykunam llapallan kamachikuykunamanta aswan hatun kamachikuykunaqa, nispa.

32 # Dt 4.35. Diospa leynin yachachiqñataqmi nirqa:

Yachachikuq, allintam nirunki. Cheqaptam Diosqa chullalla, paymanta huk diosqa manam pipas kanchu. 33#Os 6.6.Tukuy sonqowan, tukuy yuyaywan, tukuy kallpawan Diosta kuyaymi hinaspa runamasinchiktapas kikinchikta hina kuyaymi aswan allinqa, altarpi lliw kañana sacrificiokunamantawan, wakin sacrificiokunata kañaspa ofreceymantapas, nispa.

34Yachaywan contestaruptinmi Jesús nirqa:

Manam llumpayñachu Diospa munaychakuyninman yaykunaykipaq faltasunki, nispa.

Chaymi manaña pipas imatapas tapurqañachu.

Pipa mirayninmi Cristo kasqanmanta

(Mt 22.41-46. Lc 20.41-44)

35Jesusmi templopi yachachispan nirqa:

¿Imaynanpitaq Diospa leynin yachachiqkuna ninku “Cristoqa Davidpa churinmi” nispanku? 36#Sal 110.1.Kikin Davidmi Chuya Espiritupa yachachisqan nirqa:

“Señor Diosmi Señorniyta nirqa:

Enemigoykikunata chakikipa sarupakunanman churanaykama

alleqniypi tiyaykuy nispa”.

37Sichum Davidpuni “Señorniy” nispa Cristota nichkaptinqa ¿imaynataq churinqa kanman? nispa.

Llapa runakunañataqmi Jesusta ganasllawanña uyarirqaku.

Diospa leynin yachachiqkunata ama qatipakunamanta

(Mt 23.1-36; Lc 11.37-54; 20.45-47)

38Jesusmi yachachispan nirqa:

Amayá qatipakuychikchu Diospa leynin yachachiqkunataqa, paykunaqa qoysu pachawan puriytam gustanku, plazakunapipas respetollawanña rimaykunankutam munanku. 39Sinagogakunapipas chaynataq convidokunapipas ñawpaqllapi tiyaytaraqmi munankupas. 40Paykunaqa viudakunapa tukuy imanta qechuspam mana musyachikunankupaq Diostapas una-unaytaraq mañakunku. Chayraykum paykunaqa hatun castigota chaskinqaku, nispa.

Viudapa ofrendanmanta

(Lc 21.1-4)

41Jesusmi templopi tiyachkarqa ofrendakuna churanankupa ñawpaqninpi, llapa runakunapa qollqe churasqankuta qawaspan. Apu runakunam achka qollqeta churarqaku. 42Chaynataqmi wakcha viudapas chayaramuspan iskay qollqechata churaykurqa. 43Hinaptinmi discipulonkunata qayaykuspan Jesús nirqa:

Cheqaptapunim nikichik, wak wakcha viudam llapa apukunapa churasqanmantapas aswan mastaqa churarun. 44Wakiqninkuqa puchuqllankutañam churarqaku, wak viudam ichaqa wakcha kayninpi vida pasananpaq kaqta lliwta churaykun, nispa.

Currently Selected:

Marcos 12: RCHQ2

Highlight

Copy