Marcos 11
11
Jerusalenman Jesuspa yaykusqanmanta
(Mt 21.1-11. Lc 19.28-40. Jn 12.12-19)
1Jerusalén llaqtaman hichparamuspankum Betfagé hinaspa Betania llaqtakunaman chayarurqaku. Chay llaqtakunaqa karqa Olivos moqopa waqtanpim. Chaymantam iskay discipulonkunata kachaspan 2nirqa:
Wak chimpa llaqtata riruychik, chayaruspaykichikmi manaraq pipapas sillakusqan malta asnota watasqata tarinkichik, paskaramuspa pusaramuychik. 3Sichum pipas: “¿Imapaqtaq paskachkankichik?” nispa tapusuptikichikqa kaynatam ninkichik: “Señormi necesitachkan, chayllam kutichipamusunki”, nispaykichik.
4Chaymi pasaspanku malta asnota ñanpa patanpi kaq wasipa punkunpi watasqata tariykuspanku paskarqaku.
5Chaypi kaqkunañataqmi nirqaku:
¿Imatataq ruwachkankichik? ¿Imapaqtaq chay asnota paskachkankichik? nispanku.
6Paykunañataqmi Jesuspa imam nisqanta hina nirqaku, chaymi manaña harkakuptinku pusamurqaku. 7Jesuspa kasqanman asnota aysaramuspankum capankuwan caronaykuptinku Jesusñataq sillakuykurqa. 8Hinaptinmi llapa runakuna capankuta ñanman mastarqaku, wakinñataqmi sachapa kallmankunata kuchuspanku pasanan ñanman mastarqaku.
9 #
Sal 118.25. #
Sal 118.26. Jesuspa qepanta chaynataq ñawpaqninta riqkunañataqmi kaynata qaparirqaku:
¡Yupaychasunchik! ¡Señorpa sutinpi hamuqqa alabasqayá kachun! 10¡Taytanchik Davidpa hamuq munaychakuyninyá hatunchasqa kachun! ¡Hanaq pachapi kawsakuq Dios salvaykullawayku! nispanku.
11Jesusñataqmi Jerusalén llaqtaman chayaruspan temploman yaykurqa, ichaqa tardeña kaptinmi tukuy imata qawarispallan Betania llaqtaman chunka iskayniyuq discipulonkunawan kuska pasakurqa.
Higosta Jesuspa ñakasqanmanta
(Mt 21.18-19)
12Paqarinnintin punchawmi, Betaniamanta lloqsichkaptinku Jesús yarqarachikurqa, 13chaymi karullamantaraq llaqesapallaña higosta rikururqa, hinaspam “icha ima rurullanpas kachkan” nispan asuykurqa, ichaqa manaraq tiempon kasqanraykum mana ima rurutapas tarirqachu, aswanqa llaqellantam. 14Chayraykum chay higos sachata nirqa:
Kunanmantaqa manañam pipas ruruykita mikunqañachu, nispa.
Chay nisqantam discipulonkuna uyarirqaku.
Templopi rantikuqkunata Jesús qarqosqanmanta
(Mt 21.12-17. Lc 19.45-48. Jn 2.13-22)
15Jerusalén llaqtaman chayaruptinkum, temploman Jesús yaykuruspan chaypi llapa rantiqkunatawan rantikuqkunata qarqoyta qallaykurqa, qollqe cambiananku mesakunatapas chaynataq paloma rantikuqkunapa sillankunatapas wikaparurqam. 16Hinaspanmi templontakama imapas aparisqa pasanankuta mana munarqachu. 17#Is 56.7.#Jer 7.11.Chaypim Jesús kaynata yachachirqa:
¿Manachu Qellqapi nichkan:
“Wasiyqa llapallan nacionkunapaqmi
mañakuwananku wasiwan sutichasqa kanqa”, nispa?
Qamkunam ichaqa suwakunapa machayninta hinaña ruwarunkichik.
18Chayta uyariruspankum, sacerdotekunapa kamachiqninkunawan Diospa leynin yachachiqkunaqa imaynam wañurachiyta maskarqaku, ichaqa manchakurqakum, llapa runakuna Jesuspa yachachisqanwan admirakusqankurayku. 19Tutaykaramuptinmi llaqtamanta discipulonkunawan Jesús pasakurqa.
Higos sachapa chakirusqanmanta
(Mt 21.20-22)
20Paqarinnintin punchawmi, chay higos sachapa hichpanta pasachkaspanku sapinmanta chakisqataña rikururqaku. 21Chaymi Pedro yuyariruspan Jesusta nirqa:
Yachachikuq qawariy, qayna punchaw ñakasqayki higos sacham chakirusqa, nispa.
22Chaymi Jesusñataq nirqa:
Diospi iñiynikichik kachun. 23#Mt 17.20; 1 Co 13.2.Cheqaptapunim nikichik, pipas sonqonpi mana iskayrayaspa kay orqota ninman: “Kaymanta suchuspa lamar qochaman wischukaykamuy” nispa, chay nisqan cumplikunanta creeptinqa, ruwasqam kanqa. 24Chaynaqa, nikichikmi, imatapas Diosta mañakuspaykichikqa, chaskisqaykichikpaqña hapiychik, hinaspaqa chaskinkichikmi. 25Diosta mañakuspaykichikqa piwanpas piñanakusqaykichiktayá puntataqa pampachaychik, chaynapi hanaq pachapi kaq Taytaykichikpas huchaykichikta pampachasunaykichikpaq. 26#Mt 6.14-15.#11.26 Kay textoqa ñawpaq manuscritokunapiqa manam kanchu, qepa copiaqkunam Mateopa nisqanta churamurqaku. (Mt 6.15)[Sichum qamkuna mana pampachaptikichikqa, hanaq pachapi kaq Taytaykichikpas manam pampachasunkichikchu], nispa.
Jesuspa atiyninmanta
(Mt 21.23-27. Lc 20.1-8)
27Jerusalenman huktawan kutiruptinkum, templopi Jesús purichkarqa, hinaptinmi sacerdotekunapa kamachiqninkunawan Diospa leynin yachachiqkuna hinaspa ancianokuna asuykuspanku 28tapurqaku:
¿Pipa kamachisqantaq kaykunata ruwanki? ¿Pitaq kamachisurqanki kaykunata ruwanaykipaq? nispanku.
29Chaymi Jesusñataq nirqa:
Ñoqapas tapusqaykichikyá, sichum contestawaptikichikqa, ñoqapas pipa kamachikuyninwanmi kaykuna ruwasqaytam nisqaykichik. 30Niwaychikyá: ¿Pitaq bautizananpaq Juanta kamachimurqa, Dioschu icha runakunachu? nispa.
31Chaynata Jesús tapuptinmi kikinkupura atipanakurqaku:
Sichum “Diosmi kachamurqa” niptinchikqa, “¿imanasqataq manaqa creerqankichikchu?” niwasunchiki. 32Manataqmi nichwanchu “runakunallam kachamurqa nispapas”. Aswanqa llapa runakunatam manchakurqaku Juanta profetapaq hapisqankurayku. 33Chaymi Jesusta nirqaku:
Manam yachanikuchu, nispanku.
Jesusñataqmi nirqa:
Chaynaqa, manam ñoqapas nikichikmanchu pipa kamachikuyninwanmi kaykuna ruwasqayta, nispa.
Currently Selected:
Marcos 11: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
