Lucas 17
17
Ama pitapas huchallichinanmanta
(Mt 18.6-7, 21-22. Mr 9.42)
1Discipulonkunatam Jesús nirqa:
Runapa huchaman aysaqninqa kanqapunim. Ichaqa ¡imaynaraq kanqa runamasinta huchaman urmachiq runaqa! 2Ñoqapi iñiq taksakunamanta hukninta pipas huchallichiqtaqa, allinchá kanman molino rumita kunkanman wataruspa lamar qochaman wischuykuyninkuqa. 3#Mt 18.15.Chaynaqa, cuidakuychikyá. Sichum runamasiki imapipas pantarusuptikiqa qaqchaykuyá. Huchanta reqsikuptinqa pampachaykuyá. 4Sichum huk punchawpi qanchis kutikama pantarusunkiman hinaspa pampachaykunaykipaq qanchis kutikama hamuptinqa, pampachaykuyá, nispa.
Iñiypa atiyninmanta
5Apostolninkunam Señorta mañakurqaku:
Iñiytayá yapaykuwayku, nispanku.
6Chaymi Señorñataq nirqa:
Mostazapa muhun hinallapas iñiynikichik kaptinqa kay purun higos sachatam niwaqchik: “Sapikimanta chutakuspa lamar qochapiña sapichakamuy” nispa, hinaptinqa kasusunkichikmanmi.
Sirvientepa imam ruwananmanta
7¿Yaqachu yapusqanmanta otaq animal michimusqanmanta sirvientekichik kutiramuptin niwaqchik: “Mesapi tiyaykuspa mikumuy” nispaykichik? 8Manam, aswanqa niwaqchikmi: “Cenayta ruwaspa servimuway, mikuruptiy tomaruptiyñam qampas mikunki hinaspa tomanki”, nispaykichik. 9Manataqmi kamachisqaykichik ruwasqanmantaqa chay serviqnikichikmanqa graciastapas qonkichikchu. 10Chaynayá qamkunapas, tukuy kamachisusqaykichikta ruwaruspaqa kaynata niychik: “Mana imapaq valeq sirvientekunam kanchik, kamachiwasqallanchiktam ruwarunchik”, nispaykichik.
Leprawan onqoqta Jesús sanoyachisqanmanta
11Jesusmi Jerusalenman rispan, Galileanta hinaspa Samarianta pasarqa. 12Huk llaqtaman chayaruptinmi leprawan onqoq chunka runakuna taripaykurqaku. Paykunam karullamanta, 13kaynata qayakurqaku:
¡Yachachikuq, Jesús, kuyapayariykullawayku! nispanku.
14 #
Lv 14.1-32. Jesusñataqmi paykunata qawarispan nirqa:
Rispaykichik sacerdotekunawan qawachikamuychik, nispa.
Chaymi richkaspanku sanoyarurqaku. 15Hinaptinmi paykunamanta hukninku, allinyarusqantaña qawakuykuspan qaparillawanña Diosta yupaychastin kutirirqa. 16Hinaspam graciasta qospan Jesuspa ñawpaqninpi qonqorakuykurqa. Payqa karqa Samaria lawmanta kaqmi.
17Jesusñataqmi tapurqa:
¿Manachum chunka sanoyarqankichikqa? ¿Maytaq wakin isqonqa? 18¿Kay huklaw llaqtayuq runallachum Diosta yupaychananpaq kutiramun? nispa.
19Chaynata niruspanmi chay runata nirqa:
Hatarispayki pasakuy, iñiynikim sanoyarachisunki, nispa.
Diospa munaychakuynin haykapim chayamunanmanta
(Mt 24.23-28, 36-41)
20Haykapim Diospa munaychakuynin hamunanmanta fariseokuna tapuptinmi, Jesusñataq nirqa:
Diospa munaychakuyninqa mana pipapas yachasqallantam hamunqa. 21#Mr 13.21-22.Manam ninqakuchu: “Kaypim kachkan” otaq “wakpim kachkan” nispankuqa. Diospa munaychakuyninqa ñam qamkuna ukupiña kachkan, nispa.
22Discipulonkunatapas nirqataqmi:
Chayamunqam punchaw runapa Churinpa hukkaqnin punchawninta rikuykuy munanaykichikpaq, ichaqa manam rikunkichikchu. 23Nisunkichikmi: “Kaypim kachkan” otaq “wakpim kachkan”, nispa; ichaqa amam rinkichikchu amataqmi qatinkichikchu. 24Imaynam llipyay tukuy hinastinman kancharin, chaynam runapa Churinpa punchawninpas kanqa. 25Ichaqa puntatam llumpayta ñakarinan, hinaspam kay miraykunapa wischupakusqan kanan. 26#Gn 6.5-8.Imaynam Noeypa tiemponpi karqa, chaynam runapa Churin kutimuptinpas kanqa. 27#Gn 7.6-24.Llapa runakunam mikukuypi, upyakuypi, casarakuypi hinaspa casarachinakuypi kakuchkarqaku, arcaman Noé yaykunankama, chaymi sinchi para chayaramuspan lliwta chinkarachirqa. 28#Gn 18.20—19.25.Lotpa punchawninkunapipas chaynam pasakurqa. Runakunam mikukuypi, upyakuypi, rantikuypi, tarpukuypi, wasikuna ruwakuypi kakuchkarqaku. 29Ichaqa Sodoma llaqtamanta Lot lloqsiruptinmi, azufreyuq nina para chayaramuspan llapa runata chinkarachirqa. 30Chaynapunim kanqa runapa Churin rikuriykamuptinpas.
31 #
Mt 24.17-18; Mr 13.15-16. Chay punchawpiqa, wasipa hawanpi kaqpas amañayá uraykamuchunchu imanpas hurqoqqa. Chakrapi kaqpas amañayá wasinmanqa kutichunñachu. 32#Gn 19.26.Lotpa warminmantayá yuyariychik. 33#Mt 10.39; 16.25; Mr 8.35; Lc 9.24; Jn 12.25.Pipas vidanta waqaychay munaqqa chinkarachinqam, pipas vidanta chinkarachiqmi ichaqa kawsanqa.
34Nikichikmi, chay tutam iskay runakuna camapi kachkanqaku, hukninmi apasqa kanqa, hukninñataqmi saqesqa. 35Iskay warmikunam kutakuchkanqaku. Hukninmi apasqa kanqa, hukninñataqmi saqesqa. 36#17.36 Kay textoqa, Lucaspa qellqasqan originalpiqa manam kanchu, Mateomanta apamuspa copiasqam kayqa. (Mt 24.40)[Iskay runakunam chakrapi kachkanqaku, hukninmi apasqa kanqa hukninñataqmi saqesqa kanqa], nispa.
37Chaymi Jesusta tapurqaku:
Señor ¿maypitaq chaykuna pasakunqa? nispanku.
Hinaptinmi Jesusñataq nirqa:
Maypim ayapa kasqanpim ullachkukuna huñunakunqaku, nispa.
Currently Selected:
Lucas 17: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
