Lucas 16
16
Sakri mayordomomanta
1Jesusmi discipulonkunata nirqa:
Apu runapam huk mayordomon karqa. Paymantam patronninman willaykurqaku kapuqninkuna yanqachasqanmanta. 2Chaymi qayaykuspan tapurqa: ¿Imatataq qanmanta kaykunata uyarini? Llamkasqaykimanta cuentata qoway, mayordomo kaynikitam saqenkiña, nispa.
3Hinaptinmi chay mayordomoñataq yuyaymanaspan nirqa: ¿Imatataq ruwasaq patronniy llamkayniymanta qarqoruwaptinqa? Llamkanaypaqpas manam kallpay kanchu, limosna mañakuytapas penqakunim. 4Chaynaqa, mayordomo kayniymanta wischuruwaptin, runakunañataq wasinkupi chaskiykuwananpaqyá kaynata ruwasaq, nispa.
5Chaymi haykam patronnin debeqkunata sapakamata qayaspan, hukninta nirqa: “¿Haykataq patronniyta debenki?” nispa.
6Hinaptinmi chay runa nirqa: “Pachak barril aceitem”, nispa. Chaymi mayordomoñataq nirqa: “Kayqa contrato ruwasqayki papel. Kunanqa pichqa chunkallamantaña musoq papelta ruwaykuway”, nispa.
7Huknintapas nirqataqmi: “¿Haykataq patronniyta debenki?” nispa. Hinaptinmi payñataq nirqa: “Pachak tupu trigom”, nispa. Chaymi paytapas nirqa: “Kayqa papelniki. Pusaq chunkallamantaña papelta ruwaykuway”, nispa. 8Hinaptinmi patronnin chay mana allin ruwaq mayordomopa sakri kaywan ruwasqanta allinpaq hapirqa.
Arí, runamasinwan imatapas ruwanankupaqqa kay pachapi runakunam aswan sakri kanku Diospa churinkunamantaqa.
9Chaynaqa, nikichikmi: Mana allinkunamanta chaskisqaykichik qori-qollqewanqa amistadkunatayá armaychik, chaynapi qollqekichik manaña kaptinpas hanaq pachapi chaskisunaykichikpaq.
10Asllatapas nanachikuq runaqa, achkatapas allintam nanachikunqa; asllatapas yanqacharuq runaqa, achkatapas yanqacharunqam.
11Sichum mana allinkunamanta chaskisqaykichik qori-qollqeta mana allinta nanachikuptikichikqa ¿pitaq cheqap kaqtaqa confiasunkichikman? 12Sichum runapa kaqta yanqachaptikichikqa ¿pitaq kikikichikpa kaqtaqa qosunkichikman?
13 #
Mt 6.24. Manam pipas iskay patrontaqa servinmanchu, hukninta kuyaruspachá huknintañataq cheqnirunman, hukninman ratakuruspachá huknintañataq qepancharunman. Manam Diostawan qollqetaqa serviwaqchikchu, nispa.
14Tukuy chaykunatam qollqella kuyaq fariseokunapas uyarirqaku, hinaspam Jesusmanta burlakurqaku. 15Chaymi Jesusñataq nirqa:
Qamkunaqa runakuna qawanallanpaqmi allin tukunkichik, Diosmi ichaqa sonqoykichikta reqsisunkichik. Runakunapaq sumaqllaña rikchakuqpas Diospaqqa millakuypaqmi.
Leymantawan Diospa munaychakuyninmanta
16 #
Mt 11.12-13. Kamachikuykunawan profetakunapa yachachisqanqa Bautizaq Juanpa willakuy qallarisqankamallam karqa. Chaymanta qepamanñataqmi Diospa munaychakuyninmanta willakusqa kachkan, chaymi llapallanku yaykunankupaq kallpanchakuchkanku.
17 #
Mt 5.18. Kay pachawan hanaq pachach chinkarunman, Diospa kamachikuyninpam ichaqa huk letrallanpas mana chinkanqachu.
Casadokunaqa mana rakinakunankumanta
(Mt 19.1-12. Mr 10.1-12)
18 #
Mt 5.32; Mr 10.11-12; 1 Co 7.10-11. Warminmanta rakikuruspan huk warmiwan casarakuq runaqa chay warmiwanmi waqllikurun. Qosanpa saqesqan warmiwan casarakuqpas waqllikuruntaqmi.
Apumantawan Lazaromanta
19Huk apu runam karqa grosellamanta hinaspa linomanta fino pachakunawan churakuq, paymi sapa punchaw munayllapaqña convidokunata ruwachiq. 20Karqataqmi limosna mañakuq Lázaro sutiyuq runapas, paymi chay apupa punkunpi pasaypaq heridasqallaña tiyallaq, 21apupa mesanmanta wichiq puchukunawan wiksallan huntaykachiyta munaspan, allqokunapas asuykuspankum heridankunata llaqwaykuq.
22Chay limosna mañakuq runam wañukurqa, hinaptinmi Abrahampa kasqanman angelkuna aparurqaku. Chaynataqmi apupas wañururqa, hinaptinmi pamparurqaku.
23Chay apum, wañusqakunapa kasqanpi ñakarichkaspan karumanta qawarispan Abrahamta rikururqa, Lazarotañataq waqtanpi tiyachkaqta. 24Chaymi qaparispan nirqa: “¡Taytáy Abraham, llakipayariykullaway! ama hina kaspaykiyá Lazarota kachamuway dedollanpipas yakuta apamuspan qallullaytapas chiriykachinanpaq, ñoqaqa kay ninapim llumpa-llumpayta ñakarichkani”, nispa.
25Abrahamñataqmi nirqa: “Churilláy, yuyariyyá kawsaspaykiraq allin kaqkuna chaskisqaykita, Lazaroñataq ñakariyllapi kasqanta. Kunanmi ichaqa kusisqaña kaypi tarikuchkan, qamñataqmi ñakarichkanki.
26Chaywanpas qamkunatawan ñoqaykutaqa uku-uku wayqom rakiwachkanchik, chaynapim kaymanta chaylawman chimpayta munaspapas mana atinmankuchu, nitaqmi chaymanta kawlawmanpas atimunmankuchu”, nispa.
27Chaymi apuñataq nirqa: “Chaynaqa, taytáy Abraham, ruegakusqaykim taytaypa wasinman Lazarota kamachinaykipaq, 28kachkanraqmi pichqa wawqeykuna, paykunamanyá willamuchun, chaynapi kay ñakariypa kasqanman amaña hamunankupaq”, nispa.
29Hinaptinmi Abrahamñataq nirqa: “Chaypaqmi Moisespa hinaspa profetakunapa qellqanta hatallinku, chaytayá kasukuchunku”, nispa.
30Chay apuñataqmi nirqa: “Taytáy Abraham, manam kasukunmankuchu. Sichum wañuqkunapa kasqanmanta kutispa pillapas willaykuptinmi ichaqa wanakunqaku”, nispa.
31Chaymi Abrahamñataq nirqa: “Moisespa hinaspa profetakunapa nisqankunata mana kasukuspankuqa, wañuqkunamanta hukkaqnin kutispan willamuptinñapas manam creenqakuchu”, nispa.
Currently Selected:
Lucas 16: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
