Jeremías 48
48
Moab nacionpa contranpi profetizasqanmanta
1 #
Is 15.1—16.14; 25.10-12; Ez 25.8-11; Am 2.1-3; Sof 2.8-11. Israelpa yupaychasqan Tukuy Atiyniyuq Tayta Diosmi Moab nacionpa contranpi kaynata nirqa:
Nebo llaqtam pasaypaq tuñichisqa kachkan,
Quiriataim llaqtam vencesqa kaspa penqaypi kachkan.
Murallankunapas pasaypaq tuñichisqam kachkan.
2Moab nacionpa hatun tukuyninmi tukurun,
Moab nacionta chinkachinankupaqmi
llapa enemigonkuna Hesbón llaqtapi rimanakurunku.
Madmena llaqta, qampas puchukachisqam kanki,
wañuymi qatikachasunki.
3Horonaim llaqtapim qapariy uyarikun:
¡Llaqtam pasaypaq tuñichisqa kachkan! nispa.
4Moab nacionmi tuñichisqa kachkan,
wawakunapa qapariyninmi Zoar lawkamaraq uyarikuchkan.
5Luhit qatata qespiqkunam waqastin richkanku;
Horonaim llaqtamanta uraykuq ñanpim nanaywan qaparichkanku,
llapa enemigokuna llaqtata purmarachisqanmanta.
6¡Vidaykichikta salvanaykichikpaq ayqeychik!
¡Chunniqpi wiñaq sacha hinayá kaychik!
7Moab runakuna
qamkunaqa kallpaykichikpiwan qori-qollqekichikpim hapipakurqankichik,
ichaqa qamkunapas pasaypaq vencesqam kankichik.
# 48.7 Quemosqa karqa Moab nacionpa idolonmi. Quemos sutiyuq idoloykichikpas,
llapa sacerdotenkunawan hinaspa ancha reqsisqa runakunawan kuskam
preso apasqa kanqaku.
8Tuñichiqkunaqa sapa llaqtamanmi hamunqaku,
manam chulla llaqtapas puchunqachu;
qechwankunatawan pampakunatapas pasaypaqtam purmachinqaku.
Ñoqa Tayta Diosmi chaynata nini.
9Moab nacionmanyá raprata qoychik,
chaynapi pawakunanpaq,
llaqtankunam pasaypaq purmachisqa kanqa,
manaña runayuq kanankamam chunnichisqa kanqa.
10Tayta Diospa kamachisqanta qellapakuspa ruwaqqa
ñakasqayá kachun.
Wañuchinanpaq kamachichkaptin mana wañuchiqqa
ñakasqayá kachun.
11Moab nacionniyuq runakunaqa
warma kasqankumantaraqmi hawkalla kawsakurqaku,
paykunataqa manam haykapipas presotaqa aparqakuchu.
Paykunaqa urpupi mana kuyuchisqa vino hinam kachkanku,
chayraykum paykunaqa hina kaqlla hawka kakurqaku.
12Chayraykum ñoqa Tayta Dios nini:
Chayamunqam punchaw,
urpupi vinota talliruq runakunata kachamunaypaq,
manaña imayuq urpukunatapas pakiparunankupaq.
13Moab nacionmi Quemos sutiyuq idolonmanta penqakunqa,
imaynam Israelpas hapipakusqan Bet-elmanta penqakusqanta hina.
14Moab nacionqa amayá nichkachunchu:
“Allinnin qari-qari soldadokunam kaniku” nispaqa,
nitaq “guerrapi peleaq tropakunam kaniku” nispapas.
15Moab nacionqa tuñichisqam kanqa,
llaqtankunam taqmasqa kanqa,
allinnin jovenninkunam wañuchisqa kanqa.
Ñoqa Tukuy Atiyniyuq Tayta Diosmi chaynata nini.
16Moab nacionpa sasachakuyninmi hichpamuchkanña,
tuñichisqa kanan punchawmi chayamuchkanña.
17Moab nacionpa hichpanpi yachaqkuna,
ancha reqsisqa kasqanta yachaqkuna,
paymanta waqaspa kaynata niychik:
Qawariychik,
“¡Pakisqa kaspi hinam atiynin rikurirun!
¡Pakisqa tawna hinam sumaq kayninpas rikurirun!” nispaykichik.
18Dibón llaqta,
altopi tiyanaykimanta uraykamuy,
chaki allpapiña tiyay.
Moab nacionta purmachiqmi qampa contraykipi hamuchkan,
murallaykikunatam tuñirachinña.
19Aroer llaqtapi yachaqkuna,
ñanpa patanpi sayaykuspa qawaychik,
wañuymanta lluptimuqkunata imam pasakusqanta tapuychik.
20Moab nacionmi penqayman churasqa kaspa mancharisqa kachkan.
Moabmantayá hatun llakikuywan waqaychik,
Moab nación tuñichisqa kasqanmanta
Arnón mayupi willakuychik.
21Pampakunapi kaq llaqtakunapa contranpi sentenciasqanmi chayaramun. Chay llaqtakunam kaykuna: Holón, Jahaza, Mefaat, 22Dibón, Nebo, Bet-diblataim, 23Quiriataim, Bet-gamul, Bet-meón, 24Queriot, Bosra, hichpa lawkunapi kaq llaqtakuna chaynataq karukunapi kaq llaqtakunapas.
25Tayta Diosmi kaynata nin:
Moab nacionpa kallpanmi kuchusqa rikurirun,
makinkunam pakisqa rikurirun.
26Tayta Diospa contranpi hatarisqanmanta
Moab nacionta sinkachiychik,
chaynapim Moabqa kutichisqanpipas qochpanqa
hinaptinmi llapallanku asipayanqaku.
27Moab nación ¿manachu Israelta burlakurqanki?
¿Manachum suwamanta hina rimaspa sapa kuti asipayarqanki?
28Moab nacionpi yachaqkuna
llaqtaykichikkunata saqeychik;
qaqa uchkupi qesachakuq paloma hina
qaqakunapiña yachaychik.
29Moab nacionpa hatun tukuq,
pay tukuq, qari tukuq, badulaki,
hinaspa mana kasukuq kasqantaqa yachanchikmi.
30Ñoqa Tayta Diosmi kaynata nini:
Moab nacionpa mana kasukuynintawan,
badulaki kayninta hinaspa rimaysapa kasqantaqa reqsinim.
31Chayraykum Moab nacionrayku waqasaq,
Kir-harespi yachaqkunaraykum llakikusaq.
32Sibma lawpi uvas chakra
qamraykum waqasaq,
Jazer llaqtarayku waqasqaymantapas mastaraqmi waqasaq.
Kallmaykikunapas lamar qochapa waklawninkamaraqmi chayarqa,
Jazer llaqtakamaraqmi chayarqa.
Kunanmi ichaqa uvas cosechaynikipas tukunqa.
33Moab nacionpi kaq huertakunapiqa
manañam kusikuymanta qapariypas kanñachu,
uvas saruna pozopi vinotam chinkarachisaq,
takiwan uvas saruqkunapas manañam kanqachu,
kusikuymanta takiypas manañam kanqachu.
34Hesbón llaqtapi yachaqkunam nanaywan qaparichkanku,
qapariyninkum Eleale llaqtamanta Jahaza llaqtakama uyarikuchkan,
Zoar llaqtamanta Horonaim llaqtakamam uyarikuchkan,
Eglat-selisiyá lawkamam uyarikuchkan.
Nimrim wayqopi pukyukunapas lliwmi chakirun.
35Tayta Diosmi kaynata nin:
Moab nacionmantam chinkarachisaq
orqokunaman rispa capillakunapi sacrificio ofreceqkunatapas,
chaynataq llapa idolokunaman incienso kañaqkunatapas.
36Moabmantam qena hinaraq sonqoy waqachkan,
Kir-hares llaqtayuqkunamantam qena hinaraq sonqoy waqachkan,
tukuy ima huñusqanku chinkarusqanmantam sonqoy waqachkan.
37Lliw runapa umanmi paqlayachisqa kachkan,
lliw runapa barbanmi rutusqa kachkan,
llapallankum makinkuta ikipakurunku,
llapallankum qachqa pachawan churakurunku.
38Moab naciontam ñutuparuni,
mana valeq allpa mankata hinam pakiparuni;
chayraykum Moab nacionpa altosninkunapipas,
llapallan callenkunapipas,
waqayllaña uyarikuchkan.
39¡Moab nación taqmasqa kasqanmanta waqaychik!
Manchakuypa huntasqanmi kachkan,
penqakuymantam qepanpakurun,
lliw nacionkunapa burlakunanñam rikurirun,
lliw nacionkunapa manchakunanñam rikurirun.
40Tayta Diosmi kaynata nin:
Moab nacionpa contranpim enemigonkuna hamunqaku,
rapranta mastarispa pawaykuchkaq anka hinaraqmi atacanqaku.
41Llaqtakunapas enemigopa munaychakusqanmi kanqa,
amparakuna sitiokunapas tuñichisqam kanqa.
Chay punchawmi
Moab nacionniyuq allinnin qari-qari runakunapa sonqonkum hukmanyarurqa,
wachakuywan ñakariq warmi hinaraqmi rikurirurqa.
42Moab nacionmi pasaypaq chinkachisqa kanqa,
ñoqa Tayta Diospa contraypi hatunchakusqanrayku.
43Moab runakunaqa monte animalkuna hapiqkunapa qatikachasqan hinam kanqaku,
uchkumanpas otaq toqllamanpas wichiykuchkaqña hinam kanqaku.
44Ñoqa Tayta Diosmi kaynata nini:
Manchakuymanta lluptiqkunam uchkuman wichiykunqaku,
uchkumanta lluptiqkunam toqllaman wichiykunqaku.
Moab runakunata castiganay tiempo chayaramuptinmi chayna kanqa.
45Wakin runam mana kallpayuqña lluptirunku,
Hesbón llaqtapi amparakunankupaqmi lluptirunku;
ichaqa Hesbón llaqtamantam nina lloqsiramun,
Sehón llaqtanmantam lenwachkaq nina lloqsiramun,
Moab naciontam kuchun-kuchun ruparun,
chaqwakuq llaqtatam uma puyukninkama ruparun.
46¡Ay, Moab nación!
Quemos sutiyuq idolota yupaychaq nación,
¡imaynaraq kanki!
Qari churikikunatawan warmi churikikunatam
presota aparunku.
47Chaywanpas tukupay tiempokunapim
Moabmanta preso apasqa kaqkunata kutichimusaq.
Chaynatam Moab nacionta juzgasaq.
Ñoqa Tayta Diosmi chaynata nini.
Currently Selected:
Jeremías 48: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012