Hebreos 13
13
Diospa munayninman hina ruwanamanta
1Wawqe-panintin kuyanakuytaqa amayá saqeruychikchu. 2#Gn 18.1-8; 19.1-3.Wasikichikpi samaykachiytapas amayá qonqaruychikchu, wakinkunam chayta ruwaspanku mana yachastin angelkunata samaykachirqaku.
3Presokunamantayá yuyariychik, imaynam qamkunapas paykunawan preso kachkawaqchikpas hina. Ñakariqkunamantapas yuyariychikyá imaynam qamkunapas ñakarichkawaqchik hina.
4Casado kayqa llapallanpa respetasqanyá kachun, respetasqataqyá kachun camankupas. Waqllikuqkunatawan huchapakuqkunatam ichaqa Dios juzganqa.
5 # Dt 31.6, 8; Jos 1.5. Amayá qollqella maskaymanqa qokuruychikchu, aswanqa imam kapusuqnikichikwanyá contentakuychik. Diosmi nirqa:
Manapunim qonqasqaykichu nitaqmi saqesqaykichu, nispa.
6 #
Sal 118.6. Chaynaqa, confianzawanmi ninanchik:
“Señormi ñoqapa yanapawaqniyqa manam manchakusaqchu,
runapa imapas ruwawanantaqa manam manchakusaqchu”, nispanchik.
7Diospa palabranta yachachispa puntaman pusasuqnikichik michiqnikichikkunatayá yuyariychik. Imaynam kawsasqankuta qawarispayá iñiyninkuta qatipakuychik.
8Jesucristoqa qaynapas, kunanpas, wiña-wiñaypaq hina kaqllam. 9Tukuy rikchaqmana uyarisqaykichik rikurimuq yachachikuykunawanqa amayá apachikuychikchu. Diospa kuyakuyllanwan sonqoykichik takyachiymi allinqa kanman. Mikuykunallaqa manam haykapipas kallpancharqachu haykam leyman hina hapipakuqkunataqa.
10Ñoqanchikpaqa huk altarmi kapuwachkanchik, chay altarmantaqa ñawpaq altarpi servikuq sacerdotekunaqa manam mikunmankuchu. 11#Lv 16.27.Sumo sacerdoteqa hucha pampachasqa kananpaqmi animalkunapa yawarninta Chuyay-chuyay lugarman apaykuq, aychantañataqmi campamentopa hawa lawninpi kañaq. 12Chaynataqmi Jesuspas kikinpa yawarninwan runankunata chuyanchaspa Diospaq sapaqchananpaq, llaqtapa hawa lawninpi wañukurqa. 13Chaynayá ñoqanchikpas campamentomanta lloqsispa Jesusta qatisunchik payta imayna kamisqankuta hina kamiwaptinchik ñakarispapas. 14Kay pachapiqa manam wiñaypaq llaqtanchikqa kanchu, chaymi hamuq llaqtata suyachkanchik. 15Chaynaqa, kañasqa ofrendata hinayá takikunata Jesucristontakama Diosman tukuy tiempo ofrecesunchik, chaykunaqa kanan sutinmanta siminchikpa yupaychayninkunam. 16Allin ruwaytawan kapuqnikichikwan yanapanakuytaqa amayá qonqaychikchu, chay sacrificiokuna ruwasqaykichikmi Diosta agradan.
17Michiqnikichikta kasukuspa paykunaman sujetakuychik. Paykunam almaykichikmanta nanachikunku, hinaspam Diosman cuentata qonqaku. Kasukuptikichikqa mana hukmanyaspam kusisqalla pusasunkichik, mana chayqa manam allinnikichikpaqchu kanman.
18Ñoqaykupaqyá Diosta mañakuychik, ñoqaykupa sonqoykuqa hawkallam kachkan, tukuy kawsayniykupipas hawkalla kaytataqmi munaniku. 19Tukuymanta llalliqtaqa qamkunaman chaylla kutichimuwananpaqyá Diosta mañakuychik.
Diospa bendicionnin mañakusqanmanta
20Hawkayay qokuq Diosyá, yawarninwan wiñaypaq musoq pactota ruwaq otaq ovejakunapa hatun michiqnin Señorninchik Jesucristo kawsarichiq Diosyá 21munasqanman hina ruwanaykichikpaq tukuy allin kaqkunata qosunkichik. Jesucristoraykuyá Diospa agradonpaq ruwawasun. ¡Jesucristoyá wiña-wiñaypaq yupaychasqa kachun! Amén.
22Wawqe-panikuna, ruegakuykichikmi, kallpanchanaypaq qellqamusqaytayá aslla kaptinpas pacienciawan qawaykuychik. 23Yachaychikyá, wawqenchik Timoteoqa ñam carcelmanta lloqsirunña, chaylla hamuptinqa paywan kuskam qawaykuqnikichik hamusaq.
24Michiqnikichikkunatayá rimaykuychik, rimaykuychiktaqyá llapallan iñiqkunatapas. Italiapi kaqkunam rimaykamusunkichik.
25Diospa kuyakuyninyá qamkunawan kachun. Amén.
Currently Selected:
Hebreos 13: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
