Hebreos 12
12
Kallpanchaqninchikqa Jesuslla kasqanmanta
1Chaynaqa, ñoqanchikpas, muyuriqninchikpi puyu hinaña testigokuna kachkaptinqa, llasawaqninchik qepita saqechkaq hinayá llapa huchanchikkunata saqesunchik, hinaspayá pacienciawan puntaman kallpasunchik maymi kallpananchikta. 2Jesusta qawaspayá kallpasunchik, paymantam iñiyninchikqa hamurqa paytaqmi qespichiwaqninchikpas. Jesusmi penqakuytapas qepaman churaykuspan cruzpi ñakarirqa, chaypa qepanta kusikuy kananta yachaspanmi, Diospa alleq lawninpi tiyaykurqa.
3Chaynaqa, Señor Jesuspa ejemplonpiyá yuyaymanaychik, payqa ñakarirqa huchasapa runakunapa kamikuyninta, chaynapi mana pisiparunaykichikpaq nitaq hukmanyarunaykichikpaq. 4Huchapa contranpi peleaspaykichikqa, manaraqmi yawarnikichiktaqa chaqchurqanchikraqchu. 5Qamkunaqa churinkunaman hina Diospa kayna rimapayasusqaykichiktapas qonqarunkichikñam. Qellqam kaynata nin:
“Churilláy, Señorpa castigontaqa amayá despreciaychu.
6 #
Job 5.17; Pr 3.11-12. Churilláy, Señorpa anyasusqaykiwanqa amayá hukmanyaychu”, nispa.
7Sichum azotenta chaskiptikichikqa, Diosqa churinta hinam nanachikusunkichik, chaynaqa ¿ima taytataq churintaqa mana correginmanchu? 8Sichum Diosqa llapallan churinkunata corregichkaspan, qamkunatañataq mana corregisuptikichikqa hawa churinkuna hinachiki kawaqchik, manachiki cheqap churinchu kawaqchik. 9Ñoqanchikpas kay pachapi corregiwaqninchik tayta-mamanchiktaqa kasukurqanchikmi. Chaynaqa, ¿imanasqataq kawsachiqninchik hanaq pachapi Taytanchiktaqa manaqa kasukuchwanchu? 10Tayta-mamanchikqa pisi punchawlla kawsayninchikpim tanteasqankuman hina corregiwarqanchik, hanaq pachapi Taytanchikmi ichaqa aswan allinninchikpaq corregiwanchik pay hina mana huchayuq kananchikpaq. 11Cheqaptapunipas azotewasqanchik horaqa manam gustonchikpaqchu, aswanqa nanawanchikmi; chaywan yuyayta hapiptinchikmi ichaqa allin kaqkuna ruwayta hinaspa hawka kawsakuyta yachachiwanchik.
Mana kasukuqkunapa pagonmanta
12 #
Is 35.3. Chaynaqa, utisqa makikichiktapas hoqariychik, mana kallpayuq moqoykichiktapas kallpanchaychik. 13#Pr 4.26.Qewi-qewi ñannikichikta derechaychik, chaynapi wistukunapas ama huklawman pantarunankupaq, aswanqa sanoyanankupaq.
14Llapallanwanyá hawkalla kawsaychik, chuyanchakuypi kawsaychik, mana chuya kaspaqa manam pipas Señortaqa rikunqachu. 15#Dt 29.18.Cuidakuychikyá, yanqañataq Diospa kuyapayakuyninta mana haypawaqchikchu, chaynapi qatqe sachapa sapin hina wiñaspa achkaqta chaqwaspan lliwta qatqeyarachisunkichikman. 16#Gn 25.29-34.Amayá pipas huchapakuchunchu nitaq Diospa kaqninkunatapas despreciachunchu, imaynam Esaú huk plato mikuyllapaq piwi kayninta rantikusqanta hinaqa. 17#Gn 27.30-40.Yachasqaykichikpi hinapas Esauqa Diospa bendicionninta kutichikuyta munaspapas qarqosqañam karqa, maynataña waqaspapas tupaqnintaqa manañam kutichikuyta atirqañachu.
18Qamkunaqa manam Israel runakuna hinachu asuykuchkankichik ninapa rupasqan hapiy atina orqomanchu, yana puyumanchu, tutayaymanchu, sinchi wayrapa kasqanmanchu, 19#Ex 19.16-22; 20.18-21; Dt 4.11-12; 5.22-27.trompetapa waqayninmanchu nitaq Diospa rimayninmanchu. Chayta uyariqkunam mañakurqaku amaña masta paykunaman rimapayananpaq. 20#Ex 19.12-13.Chaytaqa mañakurqaku kay kamachikuyta mana kasukuy atisqankuraykum: “Kay orqoman asuykamuqqa cuchillowan otaq lanzawan wañuchisqam kanqa, runa kaspa otaq animal kaspapas” niqta. 21#Dt 9.19.Mancharikuypaqmi kay qawasqankuqa karqa, chaymi Moisespas kaynata nirqa:
“Mancharikuymantam katkatatachkani”, nispa.
22Qamkunam ichaqa asuykurunkichik Sión moqoman, hanaq pachapi kawsaq Diospa Jerusalén llaqtanman, Diosta yupaychanankupaq wara-waranqa angelkunapa huñunasqa kasqankuman. 23Chaypitaqmi kachkan ñawpaqmanta Diosman iñikuqkunapa huñunakuyninpas paykunapa sutinkuqa hanaq pachapim qellqasqa kachkan. Asuykurunkichiktaqmi llapallan runakuna juzgaq Diosmanpas hinaspa chuyanchasqa runakunapa espiritunmanpas, 24#Gn 4.10.musoq pactoman pusawaqninchik Jesusmanpas chaynataq chaqchusqan yawarninmanpas. Paypa yawarninqa Abelpa yawarninmantapas aswanraqmi yachachiwanchik.
25 #
Ex 20.19. Chaynaqa, rimapayasuqnikichiktaqa amayá qepanchakuychikchu. Kay pachapi willakuqkunata mana kasukuqkunapas castigomantaqa manam lluptirqakuchu. Hanaq pachamanta rimamuqta mana kasukuspaqa aswanraqchiki mana lluptichwanchu. 26#Hag 2.6.Chay tiempopim Diospa vozninqa kay allpatapas kuyurichirqaraq. Kunanmi ichaqa kaynata nin:
“Huktawanraqmi katkatatachisaq, ichaqa manam kay pachallatañachu, aswanqa cielokunatawanmi”, nispa.
27“Huktawanraqmi” nispaqa nichkan tukuruqlla kaqkunata chinkachispan manaña haykapipas tukuqta wiñaypaq takyachinanmantam. 28Diospa manaña tukuq munaychakuyninta chaskichkaspanchikqa Diosman graciasta qospayá, munasqanta ruwaspa respetowan yupaychaspa servisunchik. 29#Dt 4.24.Diosninchikqa rupaq nina hina rupaspa tukukuqmi.
Currently Selected:
Hebreos 12: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
