Hageo 1
1
Musoqmanta Diospa templon hatarichisqa kananmanta
1 #
Esd 4.24—5.2; 6.14. Rey Darío iskay wataña munaychakuchkaptinmi soqta kaq killapa punta kaq punchawninpi, profeta Hageontakama Tayta Dios rimapayarqa, Judapa kamachiqnin, Salatielpa churin Zorobabelta, chaynallataq Josadacpa churin sumo sacerdote Josueytapas.
2Tukuy Atiyniyuq Tayta Diosmi kaynata nin:
Kay runakunam ninakuchkanku, “manaraqmi Tayta Diospa templonta musoqmanta hatarichina tiemporaqchu”, nispanku.
3Chaymi profeta Hageontakama Tayta Dios kaynata nirqa: 4¿Suma-sumaq wasikichikpi yachakunaykichik tiempochum karqa, chaychum temployñataq purmachkan? nispa.
5Chayraykum Tukuy Atiyniyuq Tayta Dios kaynata nin: Imaynam kawsasqaykichiktayá sumaqta qawakuykuychik. 6Achkanpi tarpuspapas pisillatam cosechankichik, mikuspapas manam saksankichikchu, tomaspapas manam contentankichikchu, pachakuspapas manam qonirinkichikchu, llamkapakuqpas uchku wayqallamanmi pagonta chaskichkan, nispa.
7Tukuy Atiyniyuq Tayta Diosmi kaynata nin: Imaynam kawsasqaykichiktayá allinta qawakuykuychik. 8Orqokunaman rispa qerukunata apamuychik hinaspa temployta kaqllamanta ruwaychik. Chaynata ruwaptikichikqa, kusikuspaymi chaypi yupaychasqa kasaq.
9Qamkunaqa achkallataña maskaspapas asllatam tarinkichik, wasikichikpi taqesqaykichiktapas huk pukuyllawanmi chinkarachini. ¿Imanasqa? Temploy tuñisqa kachkaptin qamkunañataq wasikichikpi sapakama yachakusqaykichikrayku.
Tukuy Atiyniyuq Tayta Diosmi chaynata nin.
10Chayraykum qamkunapaqqa parapas mana chayamunñachu, allpapas manam rurunñachu. 11Ñoqam kay pachaman usyayta kacharimuni: Chakrakunaman, orqokunapa hawanman chaynataq trigoman, uvas plantakunaman, aceitunas sachakunaman, allpapi tukuy ima wiñaqkunapa hawanman hinaspa runakunapa hawanman, animalkunapa hawanman chaynataq makinkuwan imaña ruwasqankupa hawanmanpas, nispa.
12Hinaptinmi profeta Hageoman Tayta Diospa nisqanta imam kaqta uyariykuspanku, Salatielpa churin Zorobabelwan, Josadacpa churin sumo sacerdote Josué, chaynallataq puchuq runakunapas, Tayta Diosta kasukurqaku. 13Chaymi Tayta Diospa profetan Hageo, Diospa kamachisqanman hina llapa runakunata rimapayarqa kaynata:
Tayta Diosmi nin: “Ñoqam qamkunawan kachkani”, nispa.
14Chaynatam Tayta Dios kallpancharqa, Judapi kamachikuq Salatielpa churin Zorobabeltawan Josadacpa churin sumo sacerdote Josueyta, kallpancharqataqmi puchuq runakunatapas. Hinaptinmi paykuna qallaykurqaku Tukuy Atiyniyuq Tayta Diosninkupa templon ruwayta.
15Chaynapim rey Dariopa iskay wataña munaychakuynimpa, soqta kaq killapa iskay chunka tawayuq punchawninpi ruwayta qallaykurqaku.
Currently Selected:
Hageo 1: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
