Sofonías 3
3
Jerusalén llaqta castigasqa kananmanta
1¡Imallapiraq rikukunqa! mana kasukuq huchapa intusqan ñakarichikuq llaqta.
2Payqa manam Diospa Chuya siminta uyarirqachu,
manam corregichikuytapas munarqachu,
Tayta Diospipas manam hapipakurqachu,
nitaqmi asuykuytapas munarqachu.
3Kamachiqninkunapas piña león hinam,
juezninkunapas chunniqpi atoq hinam,
paykunaqa manam tullutapas paqarinnintinkamaqa puchunkuchu.
4Profetankunapas hatun tukuq hinaspa iskay uya llullakunam,
sacerdotenkupas Diospa altarnintam qachacharunku,
Diospa kamachikuynintam saruparunku.
5Tayta Diosmi ichaqa chawpinkupi allinllata ruwan,
mana allintaqa manam ruwanchu,
Payqa sapa achikyaqtam kamachikuyninkunata rimarin.
Mana allin runam ichaqa mana penqakuq qara uya.
6Tayta Diosmi kaynata nin:
Nacionkunatam chinkarachini,
torrenkunatapas murallankunatapas lliwtam tuñirachini,
callenkunatapas pasaypaqtañam chunnirachini,
runakunapas chaynintaqa manañam purinñachu.
Purmasqa llaqtakunapiqa, manañam chulla runapas kanñachu.
7Hinaspaymi nirqani:
Jerusalenqa manchakuwanqañachá,
corregisqaytapas chaskikunqañachá,
wasinkunapas manañachá castigasqayraykuqa purmanqañachu, nispay.
Ichaqa paykunam tukuy rikchaqmana allinkuna ruwayta chaylla qallaykurqaku.
8Chayraykum Tayta Dios kaynata nin:
Contraykichikpi hatarispay juzganay punchawta suyaykuychik.
Nacionkunata llaqtakunatam huñunarusaq
hinaspaymi hatun piñakuyniywan paykunata castigarusaq.
Piñakuyniypa rupariynin kañaruptinmi
kay allpa pacha puchukanqa.
9Chay punchawkunapim ñoqa Tayta Diosta qayakamuwanankupaq
runakunapa siminta chuyanchaykusaq,
hinaptinmi huk sonqollaña serviwanqaku.
10Etiopía nacionpi mayukunapa waklawninkunamantaraqmi,
cheqechisqa llaqtay mañakuwaqniy hamuspa
ofrendakunatapas apamuwanqa.
11Kuyasqay llaqtalláy,
chay punchawpiqa manañam penqakunkiñachu
mana allinkunata ruwaspa contraypi hatarisqaykimantapas,
pay tukuqkunatawan hatun tukuqkunata
chawpikimanta chinkarachisqayrayku.
Chaynapim sapaqchakusqay orqopiqa
manaña haykapipas mastaqa contraypi hatarinkiñachu.
12Chawpikipim saqeykusaq
uchuychakuqkunatawan wakchakunallataña,
paykunam ñoqa Tayta Diospi hapipakuwanqaku.
13 #
Ap 14.5. Israelpi puchuqkunapas
manañam mana allintaqa ruwanqakuñachu,
nitaqmi llullakunqakuñachu,
manañam pitapas engañanqakuchu.
Michisqa kaspankum hawkaña samakunqaku,
manchachiqninkupas manañam kanqañachu, nispa.
Jerusalenpa kusikuyllawan takinanmanta
14Sión llaqtapi yachaqkuna, kusikuymanta takiychik,
Israel nacionniyuq runakuna, kusikuymanta qapariychik,
Jerusalén llaqtapi yachaqkuna, tukuy sonqomanta kusikuychik.
15Tayta Diosmi castigasunaykipaq rimarisqanta suchurachin,
enemigoykikunatam qarqorun.
Israel llaqta, reyniki Tayta Diosmi chawpikipi tarikun,
manañam imamantapas manchakunkiñachu.
16Chay tiempopim Jerusalenta ninqaku:
“Sión llaqta ama manchakuychu,
amayá makikipas hukmanyachunchu.
17Tayta Diosmi chawpikipi tarikun,
payqa Tukuy Atiyniyuqmi, salvaykusunkim.
Señorqa anchatam qamrayku kusikunqa.
Kuyakuyninwanmi musoq kawsayta qosunki,
qamraykum kusikuspan takinqa”, nispanku.
18Tayta Diosmi kaynata nin:
Kusikuy punchawpi hinam sasachakuyta qanmanta suchurichisaq,
hatun penqaynikimantam librasqayki.
19Chay tiempopim
lliw ñakarichisuqnikikunata ñakarichisaq,
wistu ovejakunatam salvaykusaq,
chinkaqtapas maskamuspaymi huñumusaq.
Penqaypi kaynikitam reqsisqa kaymanwan pipapas alabananmanña tikrarusaq.
20Chay tiempopim huñumuspa kutichimusqaykichik,
hinaspaymi kay pachapi lliwpa reqsisqantaña,
chaynataq lliwpa respetanantaña ruwasqaykichik.
Chaynataqa ruwasqaykichik,
preso risqaykichikmanta kutichimuspaymi.
Ñoqa Tayta Diosmi chaynata nini.
Currently Selected:
Sofonías 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
