Habacuc 3
3
Habacucpa mañakusqanmanta
1Kaymi profeta Habacucpa mañakuynin.
2Dios Taytalláy, ancha reqsisqa kasqaykitawan
tukuy imapas ruwasqaykita uyarispaymi manchakurqani.
Kunanpas ñawpaq watakunapi hinayá
kawsayniykupi hatun atiynikita hatarichiy,
chaynapi ñoqaykupas reqsinaykupaq.
Chaynatayá piñakuynikipa chawpinpipas
llakipayakuynikita qawaykachiwayku.
3Temán lawmantam Diosqa hamuchkan,
Parán orqomantam Chuya Diosqa hamuchkan.
Kanchariyninpas cielokunatam huntaykun,
kay pachapas payta yupaychaywanmi huntasqa.
4Kanchariyninpas achki hinaraqmi,
makinmantapas llipyakunaraqmi lloqsimun,
atiyninpas chaypim pakasqa tarikun.
5Paypa ñawpaqnintam wañuy hamuchkan,
qepantañataqmi peste hamuchkan.
6Pay sayaykuptinqa kay pachapas kuyurinmi,
qawariptinqa nacionkunapas katkatatanmi.
Ñawpa tiempomantaraq kaq orqokunapas wichimunmi,
ñawpa tiempomantaraq kaq moqokunapas chullurinmi.
Diospa ñanninkunam ichaqa wiña-wiñaypaq takyan.
7Cusán lawpi yachaqkunatapas
hatun ñakariypi kachkaqtam rikurqani,
Madián lawpi yachaqkunatapas
manchakuywan katkatatachkaqtam rikurqani.
8Dios Taytalláy,
¿Mayukunapa contranpichum piñakurunki?
¿Lamar qochapa contranpichum rabiakurunki?
¿Chayraykuchu caballoykikunapi sillakuspa kallpanki?
¿Chayraykuchu venceruq carretaykikunapi kallpanki?
9Flechaykikunawan flechanayki arcopas listollañam kachkan.
Llapa runakunaman juramentowan qosqayki simikiqa takyanqapunim.
Qamqa mayukunawanmi allpatapas raqrarachinki.
10Orqokunapas rikususpaykim katkatatanku,
parapas cielomantam lloqlla hinaraq tallikamun,
lamar qochapa ukunkunañataqmi
olankuna orqochakuspa hoqarikuptin qaparimun.
11Intiwan killapas,
flechaykikunapa achkiriyninwanmi,
lanzaykipa kanchariyninwanmi,
maymi kasqanpi sayarunku.
12Piñakuynikipim kay pachatapas saruparunki,
rabiakuynikipim nacionkunatapas saruparunki.
13Llaqtaykita salvanaykipaqmi lloqsimurqanki,
akllakusqayki reyta salvanaykipaqmi hamurqanki.
Mana allin runapa wasinpa qatantam paskarurqanki,
cimientonkamam pasaypaqta tuñirachirqanki.
14Capitanninkunatapas kikinpa flechallanwanmi wañurachirqanki,
chaynataqa ruwarqanki cheqerachiwanankupaq
kallpasapa wayra hinaraq pawaykamuwaptinkum,
mana pipa yachasqallanta chinkarachiwanankupaq pawaykamuwaptinkum.
15Qamqa caballoykikunawanmi lamar qochapipas purinki,
tinpurichkaq yakukunapim kallpanki.
16Kaykunata uyariykuspaymi mancharikurqani,
simillaypas katkatatarqam,
chakillaypas manam sayayta atirqachu,
cuerpollaypas mana kallpayuqñam rikurirurqa.
Chaywanpas ñoqallayqa qasillallam
ñakarichiqniyku llaqtata Diospuni ñakarichinan punchawta suyallasaq.
17Higos sachakuna manaña waytaptinpas,
uvaskuna manaña ruruptinpas,
aceitunas sachakuna manaña ruruptinpas,
chakrakunapi kawsaykuna manaña qespiptinpas,
kanchanpi ovejakuna tukuruptinpas,
corralpi vacakuna manaña kaptinpas,
18ñoqaqa Tayta Diosllapim kusikusaq,
Salvaqniy Diosllapim kusikusaq.
19 # 2 S 22.34; Sal 18.33. Tukuy Atiyniyuq Tayta Diosmi kallpanchaqniyqa,
chakillaytapas luwichupa chakinta hinaraqmi ruwaykapuwan,
hinaspanmi altonkunata purichikuwan.
Currently Selected:
Habacuc 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012